Zefanaya 3:8 - BAYỊBURU Izii

⁸ “Ọo ya bụ lẹ-a; wakwa iphe, Chipfu epfu baa: Ngabẹnuru mu jasụ mbọku ono, mu a-gbalihu gbaa ngu ekebe. Mu pfuakwaru iya hoo haa lẹ mu e-kukọbe ọha, dụ iche iche l'ẹka lanụ; mu achịkobe alị-eze, dụ iche iche; tụ-koshi phẹ oke ẹhu-eghu mu l'ophu. Mbụ l'okophoo, mu eko e-tsufu mgboko l'ophu g'ọku, etsu etsutsu.

Zefanaya 3:8 ပူးပေါင်းရင်းမြစ်များ

Ebvu-ọma 12:5

Obenu lẹ Chipfu byakwanụ eyeru phẹ ọnu bya asụ phẹ: “O rwuakwaru teke ya a-byapfuta unu; kẹle ndu ụkpa bẹ unu kpatashiwaru ẹhu; tẹme ndu adụdu g'ọ dụ phẹ gụnukawa aphụ unu. Nta-a bẹ o rwuwaru teke ya a-gbaru phẹ mkpu ono, ẹphe ele ẹnya iya ono.”

Ebvu-ọma 123:2

Ọo ẹgube ono nwoke, bụ ohu anọduje ele nnajịuphu iya ẹnya l'ẹka-a; bya abụru ẹgube ono nwanyị, bụ ohu anọduje ele nwanyị, nwe iya nụ ẹnya l'ẹka-a; bụkwapho g'anyịbedua a-nọdu ele Chipfu, bụ Chileke anyi ẹnya l'ẹka gbiriri jasụ teke ọo-phụru anyi obu-imemini.

Ebvu-ọma 27:14

Nọdu kwabẹru Chipfu! Shihukpọepho ike; gude ẹka l'obu; kwabẹru Chipfu.

Ebvu-ọma 37:34

Nọdukpoepho kwabẹru Chipfu; tsoje ụzo iya! Ọo ya e-kutse ngu mee ngu l'i nworu alị-a. Ii-gude ẹnya ngu hụma teke ee-me gẹ ndu ẹjo-iphe chịhu.

Ebvu-ọma 37:7

Zẹkpoepho kụpya l'ẹka Chipfu; taa nshi kwabẹru iya. G'ẹhu te eghukwa ngu eghu teke iphemiphe, ndu ẹjo-iphe eme ejehuru phẹ; mbụ teke ẹjo-idzu, ẹphe achị anọduje eje g'ẹphe chịru iya.

Ebvu-ọma 62:1

Ọo ẹpho Chileke kpoloko bẹ mu daru ngabẹru. Kẹle ọo ya bụ onye a-dzọta mu nụ.

Ebvu-ọma 62:5

Gụbe obu mu; nọdukwa kwabẹru Chileke nwẹkiya. Kẹle ọo ya bụ onye mu ele ẹnya l'ẹka kpoloko.

Ebvu-ọma 79:5

?Bụ teke ole bẹ ẹhu e-ghuberu ngu eghu gụbe Chipfu? ?Ẹhu e-ghuwa ngu rọ eghu jasụ l'ojejoje tọo? ?Bụ teke ole bẹ okophoo ngu e-nwuberu phuruphuru g'ọku kparụ?

Ebvu-ọma 79:6

Wonụru ẹhu-eghu ngu tukoshi ndu ọhozo ono, amadụ ngu nụ ono! Tukoshikwa iya phọ alị-eze ono, ete ekujedu ẹpha ngu ono!

Ẹkwo Ẹtu 20:22

B'asụkwa l'ọo gụbedua l'a-pfụ nemadzụ ụgwo iphe-ẹji, o meru ngu. Nọdu kwabẹru Chipfu; l'ọo ya a-dzọ ngu.

Ebvu Sólomọnu 8:6

Mee mu gẹ mu dụ g'iphe-olu, ịnya l'olu, egude mee iphe-ọhubama; ọ nọdu achịchi ngu l'ọkpoma. Mee mu rọ gẹ mu dụ g'iphe-ọhubama, ị gba l'ẹka. Kẹle n-yemobu dụ-bekwa ọkpehu g'anwụhu. Okophoo ya dụkwapho g'ilu, a ta rwọ-butajẹdu arwọ-buta. Ọ nọdu ahụje g'ọ ta pfụpfupfu ọku; mbụ g'ọku enwu phoophoophoo.

Azáya 14:26

Nokwa gẹ mu chịru l'ọo-dụru ụnwu-eliphe l'ophu bụ ono. Nokwa ẹka njọ, mu machịru l'ẹhu ọhamoha l'ophu.

Azáya 30:18

Ọle ọo-nọdulekwa-a agụ Chipfu g'o meeru unu eze-iphe-ọma. Ọo-gbalihulẹ-a phụaru unu obu-imemini; kẹle Chipfu bụ Chileke, ekpeje ikpe, pfụru nhamụnha. Ẹhu-ụtso bẹ a gọru nụ iphe, bụkpoo ndu pfụru echeru iya nụ.

Azáya 34:2

Chipfu bẹ avụkwaru ọhamoha ọvuma. Oke ẹhu-eghu iya bẹ ọ tụ-koshiakwaru ndu ojọgu phẹ l'ophu. Oo-mebyishikọtakwa phẹ g'ẹphe hakọtakpoo rengurengu. Oo-woru phẹ haa g'e gbushia.

Azáya 63:6

Mu gude ẹhu-eghu mu zọo ọhamoha pyakapyaka; gude oke ẹhu-eghu mu mee; mẹe tsụahaa phẹ. Mu woru mee phẹ wụa l'alị.”

Jieremaya 10:25

Tụ-koshi ọhamoha ono oke-ẹhu-eghu ngu; mbụ ndu ono, ekwedu nkengu ono. Tụ-koshi iya ndu ono, te ekujedu ẹpha ngu ono; kẹle ẹphe riwaru oshilọkpa Jiékọpu ripyaa. Ẹphe kewaru iya gburugburu gbẹshi; bya emebyishia alị iya, bụ ibe iya l'ophu.

Hosiya 12:6

Ọle ọ bụ; unu lwaphutakwa azụ lwapfuta Chileke unu! Unu eyee ya obu; unu ekpee ikpe, pfụru ọto! Unu anọduje kwabẹru Chileke unu mkpụrumkpuru!

Jiowẹlu 3:2

bẹ mu a-chịkobe ọhamoha tụko g'ẹphe ha chịta jeshia lẹ nsụda Jiehoshafatu. Noo ẹka mu a-nọdu kpee phẹ ikpe; ikpe ẹhu ndu ono, bụ okiphe mu ono; mbụ ndibe mu, bụ ndu Ízurẹlu; kẹle ẹphe chịkaru ndibe mu; ẹphe dzuru ọhamoha; bya eworu alị mu kekashịa.

Mayịka 7:7

Obenu lẹ mbẹdua a-nọdunupho ele ẹnya Chipfu. Mu a-kwabẹru Chileke, bụ Onye ndzọta mu. Mbụ lẹ Chileke mu a-nụma-a olu mu.

Habakuku 2:3

Kẹle ọphulenya ono bẹ teke oo-me dụkwa adụdu. Oopfu iphe, e-me teke ikpazụ; ọphu ọodzudu ụka. O -betakpọnu ọ nọo ọdu ememe; kwabẹru iya; kẹle o mefụtaje; ọphu ọonoedu ọdu.

Zefanaya 1:18

“Ọphu mkpọla-ọchaa phẹ mẹ mkpọla-ododo phẹ adụkwa ike anafụta phẹ mbọku ono, Chipfu a-tụ-koshi ndiphe oke ẹhu-eghu iya ono; mbụ l'okophoo, ọo-nọdu eko e-tsufu mgboko l'ophu g'ọku, etsu etsutsu. Oo-mee g'iphe, bụkpoo ndu nọ lẹ mgboko l'ophu chịhu nchịhu lanụ.”

Hagayi 2:22

Mu a-gha aba-eze ndu bụ eze ịgharaphu. Mu emebyishia ike ndu-ishi l'ọhamoha. Mu a-gha ụgbo-ịnya yẹe ndu agba iya nụ ịgharaphu; ịnya yẹe ndu agba iya nụ adaa ndatẹwo; onyenọnu bụ nwibe iya e-gude ogu-echi iya gbua ya.

Matiyu 25:32

Teke ono bẹ ndiphe mgburugburu e-dzukọta l'iphu iya. L'ọobya eworu phẹ họo g'onye eche atụru, l'ahọshije eghu l'ẹka atụru iya kụru; dobe phẹ iche iche-a.

2 Pyịta 3:10

Mbụ lẹ mbọku, Nnajịuphu a-bya bẹ ọo-byakwa g'onye-oshi byaru oshi l'ẹnyashi. Mbọku ono bẹ igwe e-deru riiriirii mihu. Iphemiphe, dụ l'igwe; kpokpode mẹ ọnwa mẹ ẹnyanwu bẹ ọku e-kekọta. Mgboko l'ophu mẹkpoo akanya, ndiphe seru dobe l'ime iya bẹ ọku e-kepyashịkotakwa.

Ọphulenya 16:1

Tọbudu iya bụ; mu nụma olu-opfu, e shi l'ime eze-ụlo Chileke ono chia g'e chiru mkpu sụ ojozi ẹsaa ono: “Unu je eworu ẹjo iphe-ẹhuka ono, shi l'oke-ẹhu-eghu Chileke ono wụshikota lẹ mgboko l'ophu; mbụ ẹjo iphe-ẹhuka ono, dụ l'ochi ẹsaa ono.”

Ọphulenya 16:14

Ẹphe bụgbaa ọbvu, shikọta l'ẹka Nsetanu; emegbaa iphe-ọhumalenya. Ẹphe jepfugbaa ndu eze ndiphe mgburugburu je achịkobe phẹ dzua ọgu l'ẹka lanụ kwabẹru mbọku ono, Ọkalibe-Kakọta-Ike, bụ Chileke a-bya egoshi ndiphe onye ya bụ ono.