Zefanaya 3:20 - BAYỊBURU Izii

²⁰ O -rwua teke ono bẹ mu a-chịkobe unu. Mbụ l'o -rwua teke ono bẹ mu a-chịlata unu unuphu. Mu emee g'a kwabẹ unu ùbvù jaa unu ajaja l'echilabọ ndu nọkota lẹ mgboko l'ophu; mbụ teke ono, mu e-dophu unu azụ l'ọnodu unu ono; mbụ lẹ mu e-me iya l'ọ gbaa unu l'iphu gẹdegede.” Nokwa iphe, Chipfu l'epfu.

Zefanaya 3:20 ပူးပေါင်းရင်းမြစ်များ

Ebvu-ọma 35:6

G'ụzo phẹ gbakọtakwa ọchii; chikwaphọ kẹ bụrukutuku teke Ojozi-imigwe Chipfu a-nọdu achị phẹ ịkpabaka.

Azáya 56:5

“Ọ kwa phẹ bẹ mu a-nụ iphe nkọmepha l'ime eze-ụlo mu. Mu agụkwaa phẹ phọ ẹpha, l'a-ka l'a nwụtaru ụnwegirima. Mu a-gụ phẹ ẹpha, a-nọ jasụ l'ojejoje; ọphu oochihudu echihu.”

Azáya 56:8

Nnajịuphu, bụ Chipfu epfukwa sụ-a; mbụ onye ono, aachịlata ndu Ízurẹlu ono, a kpụru lẹ ndzụ ono: “Mu a-chịlatabakwa ndu ọzo bya eyeru phẹ; a -gụfukwaro ndu ọphu mu chịlatawaru.”

Azáya 60:15

A makwarụ-a l'a jịkaru ngu bya akpọo ngu ashị; ọphu ọ dụdu onye aghajajẹ ngu nụ. Obenu lẹ mu e-mechaa mee ngu mkpụkpu, ọgbo l'ọgbo e-gude eku onwophẹ; gude iya ete ẹswa. Ọ bụru g'ọo-dụwaro bụ ono jasụ l'ojejoje.

Azáya 61:9

Oshilọkpa phẹ abụru ndu a maru amaru l'ọhamoha. Nokwaphọ gẹ ndiphe a-maru awa phẹ. Iphe, bụkpoo onye hụmaru phẹ nụ a-majeẹrupho l'ẹphe bụ ndu Chipfu keberu l'ọma.”

Azáya 62:12

“Iphe, ee-ku ndu ono bụ ‘Ndu-nsọ kẹ Chileke’; ọzoo ‘Ndu Chipfu gbatarụ’. L'e kua gụbe Zayọnu ‘Nwanchọta’; ọzoo ‘mkpụkpu, a ta gbadoẹduru agbado’.”

Azáya 62:7

Ọphu unu ahakwa iya g'ọ tụta unme jasụ teke oo-me Jierúsalẹmu g'ọ ngụru angụru; mee ya g'ọ bụru iphe, eliphe l'ophu e-gude aja Chileke ajaja.

Azáya 66:22

“Sụ-a; ọ kwa g'igwe ọ̀phúú; yẹle eliphe ọ̀phúú, mu e-me a-nọ jasụwaruroya l'iphu mu; nokwa g'ẹpha unu; yẹle awa unu a-nọ.” Nokwa iphe, Chipfu eepfu.

Jieremaya 23:3

“Ọo mbẹdua l'onwomu e-je achịkota nwa ndu phọduru nụ l'ụnwu atụru mu ono l'iphe, bụkpoo alị ẹka mu chịru phẹ jeye g'ọ ha; duphuta phẹ azụ l'ẹka ẹphe a-tajẹ nri, bụ ẹka ẹphe a-nọdu wata azụzu; aka igwerigwe eje.

Jieremaya 29:14

Teke ono bẹ unu a-chọ mu chọta; nokwa iphe, Chipfu epfu. Mu emee unu; unu taa bụeduru ndu a kpụru lẹ ndzụ. Mbụ lẹ mu e-jeẹpho l'iphe, bụkpoo ọhamoha; mẹkpoo ẹkameka ono, mu chịru unu laa ono je achị-phuta unu azụ l'ẹka ono, mu meru; a kpụa unu lẹ ndzụ ono. Nokwa iphe, Chipfu eepfu.”

Jieremaya 30:3

Kẹle-a: wakwa iphe, Chipfu epfu baa: mbọku abyakwa; teke mu e-je l'ẹka a kpụru ndibe mu lẹ ndzụ laa; mbụ ndibe mu bụ ndu Ízurẹlu ẹphe lẹ ndu Jiuda; je eduphuta phẹ azụ; bya edophu phẹ azụ l'alị ono, mu nụru nna phẹ oche g'ọ bụru nkephẹ ono. Nokwa iphe, Chipfu eepfu.”

Jieremaya 33:9

Ọo ya bụ ẹpha mkpụkpu-a emeahaa g'ẹhu tsọo ụtso. Ọhamoha, nọkota lẹ mgboko l'ophu, bụ ndu a-nụma iphemiphe, bụ iphe, dụ ree, mu a-nọdu emeru phẹ ajaahaa mu ajaja; kwabẹahaa mu úbvú. Ẹphe awata atsụ ebvu; wata anma pyaapyaapyaa; kẹle mu e-meru ndu mkpụkpu-a iphe, dụ ree; mee g'ẹhu dụ phẹ guu.”

Ezekẹlu 16:53

“Ọle-a; Sọdomu yẹe ụnwada iya; mẹ Samériya yẹe ụnwada iya bẹ mu e-mekọta g'iphe bya adụru lẹ ree; ẹgube o shi dụhawaru phẹ. Mu e-mekwaphọ g'iphe dụru ngu lẹ ree teke ono, mu e-me g'ọ dụru phẹ lẹ ree ono.

Ezekẹlu 28:25

Wakwa iphe, Nnajịuphu, bụ Chipfu epfu baa: Teke mu dufutaẹrupho ndu Ízurẹlu l'ẹka a chịkashiru phẹ ẹphe laa bẹ bụ l'ime phẹ bẹ mu e-goshi ọhamoha lẹ mu bụ onye dụ nsọ. Ọo ya bụ; ẹphe abya eburu l'alị nkephẹ, bụ iya bụ alị ono, mu nụru nwozi mu, bụ Jiékọpu ono.

Ezekẹlu 34:16

“Mu a-chọ ndu ọphu tuphahụru etuphahụ; bya achịlata ndu ọphu gbakashịhuru nụ. Mu ekee ndu ọphu iphe-ẹhuka mekarụ iphe; l'ẹka e mekarụ phẹ iphe. Mu emee g'ike dụ ndu ọphu ike bvụru. Obenu lẹ ndu ọphu ha okporokpo; mẹ ndu ọphu ike dụ bẹ mu e-me g'ẹphe bụru mkpurupyata. Mu a-nọdu eche atụru ono ẹgube ọ gbaru g'e cheje phẹ.

Ezekẹlu 37:12

Ọo ya bụ; pfuru mabẹru mu phẹ; sụ phẹ-a: Nnajịuphu, bụ Chipfu sụru: ‘Unubẹ ndibe mu; mu e-kpuhakọta ilu unu; mee g'unu shi l'ime iya lụfuta; mu eduta unu duba l'alị Ízurẹlu.

Ezekẹlu 37:21

L'ị bya asụ phẹ; Wakwa iphe, Nnajịuphu, bụ Chipfu epfu baa: Mu e-dufutakọta ndu Ízurẹlu l'iphe, bụ ọhamoha, ẹphe lakọtaru. Mu e-shi l'ẹkameka rwukọbe phẹ; duta phẹ duba l'alị nkephẹ.

Ezekẹlu 39:13

Ndu bukọta l'alị ono g'ẹphe ha bẹ a-tụko phube iphu wata phẹ elili. Mbọku ono, mu e-goshi lẹ mu dụ biribiri ono bẹ aa-kwabẹ phẹ úbvú. Nokwa iphe, Nnajịuphu, bụ Chipfu epfu.

Ezekẹlu 39:28

Ọo ya bụ; ẹphe a-makwanụru l'ọo mbẹdua bụ Chipfu, bụ Chileke phẹ; kẹle ọ bụchakpo eviya l'ọo mu meru g'a kpụa phẹ lẹ ndzụ lashịgbaa ọhamoha; obenu lẹ mu e-duphuta phẹ azụ l'alị phẹ; ọphu ọ tọ dụdu m'onye lanụ, mu a-ha l'ẹka ono.

Jiowẹlu 3:1

“Kẹle-a; o -rwuẹpho lẹ mbọku ono, bụ teke mu e-dophu ndu Jiuda ẹphe lẹ ndu Jierúsalẹmu azụ l'ọnodu phẹ;

Émọsu 9:14

Ndibe mu ono, bụ ndu Ízurẹlu ono, a kpụru lẹ ndzụ ono bẹ mu e-duphutachaa azụ. Ẹphe abya akpụkwachaa mkpụkpu ono, shi bụgbaaru ochobu ono; bya ebuchishia ya ọzo. Ẹphe akọahaa opfu-vayịnu; ngụahaa mẹe, shi iya nụ. Ẹphe agbahaa mgbabu; riahaa akpụru-iphe, e meberu iya.

Mayịka 2:12

“Ọ tọ dụkwa iphe, e-me gẹ mu ta atụko g'unu ha chịkobe; unubẹ oshilọkpa Jiékọpu! Ọ tọ dụkwa iphe, e-me gẹ mu ta achịkobe unubẹ nwandu wafụru nụ l'ọnu-ụlo Ízurẹlu l'ẹka lanụ! Mu a-chịkota phẹ g'ẹphe nọkobe l'ẹka lanụ g'onye chịru atụru ye l'ụlo atụru; g'onye doberu eghu yẹe atụru l'ẹka ọ nọ ata nri. Ẹphe e-ji ẹka ono pyịmu pyịmu atụ wọowoowoo kẹle ẹphe a-pa igwerigwe.

Mayịka 4:7

Ndu ẹniyeni bẹ mu e-me g'ẹphe bụru ndu warụ nụ. Mu emee ndu a chịfuru l'alị phẹ g'ẹphe bụru ọha, ike dụ. Ọ bụru Chipfu a-bụru eze phẹ l'eli úbvú Zayọnu e -shi mbọku ono jasụ l'ojejoje.

Zefanaya 2:7

Ndu e-mechaa nweru iya nụ a-bụru nwa ndu a-wafụ nụ lẹ ndu ọnu-ụlo Jiuda; ọ bụru ẹka ono bẹ ẹphe e-cheje iphe-edobe phẹ. Ọ bụru l'ụlo ndu Ashikelọnu bẹ ẹphe a-kwajẹ mẹ o -be l'ẹnyashi. Ọ bụru Chipfu, bụ Chileke phẹ a-nọdu eche phẹ nche; kẹle oo-dophu phẹ azụ l'ọnodu phẹ.

Zefanaya 3:19

Lekwa; iphe, bụkpoo ndu eme unu ewere bẹ o -rwua teke ono bẹ mu e-mekwa phẹ iphe. Ndu ẹniyeni bẹ mu a-dzọta; mu abya achịkobe iphe, bụkpoo ndu e shi chịkaa nanụnanu. Mu e-me g'a jaa phẹ ajaja kwabẹ phẹ ùbvù l'iphe, bụkpoo alị ono, bụ ẹka e shi mee phẹ iphe-iphere ono.

Zekaraya 8:13

Ọ kwa ẹgube ono, ọhamoha shi gude unubẹ ndu ọnu-ụlo Jiuda yẹe Ízurẹlu ephu l'iphu ono; bụkwapho gẹ mu a-dzọ unu; l'a gọtaahaa unu l'ọpho. Unu ba atsụkwa ebvu; ọo ẹkwapho g'ẹka shihu unu ike.”

Zekaraya 8:8

Mu e-duphuta phẹ azụ g'ẹphe bya eburu lẹ Jierúsalẹmu. Ẹphe a-bụru ndibe mu; mu abụkwanuru phẹ onye ire-lanụ; pfụberu phẹ ẹka ọto; bụru Chileke phẹ.”

Malakayi 3:12

Noo teke ọhamoha a-wata unu eku ndu Chileke keberu l'ọma; kẹle alị unu a-bụaharu ẹka agụ ẹgu eburu.” Nokwa iphe, Chipfu, bụ Ọkalibe-Kakọta-ike epfu.

Ditoronomi 26:18

Tẹme Chipfu bya epfuakwaa ya hoo haa ntanụ-a; sụ l'unu bụwaa ndibe iya, ya nwe k'iche, bụ iphe, o kwehawaru unu ukwe iya; bya asụ g'unu mekọtaje iphe, ọ sụru g'unu meje l'ophu.

Ditoronomi 26:19

Ọzo bụ lẹ ya e-me g'unu ha shii; kakọta ọhamoha ọzo, ya meru ememe shii. Unu aka phẹ enweru ẹpha; ọha m'ọha ono aka unu etu ẹpha; ka unu akwabẹ ùbvù. Unu abụru ọha, dụru Chipfu, bụ Chileke unu nsọ, bụ iphe, o pfuhawaru.”