Zefanaya 3:14 - BAYỊBURU Izii

¹⁴ Gụa ebvu ẹhu-ụtso; gụbe nwada Zayọnu! Gụbe Ízurẹlu; tụa ụzu ẹhu-ụtso! G'ẹhu tsọje ngu ụtso; l'iigude obu ngu g'ọ ha tee ẹswa; gụbe nwada Jierúsalẹmu.

Zefanaya 3:14 ပူးပေါင်းရင်းမြစ်များ

Nehemaya 12:43

Mbọku ono bẹ ẹphe gwerụ ngwẹja, parụ ẹka apaa; ẹhu tsọo phẹ ụtso; noo kẹle Chileke bẹ meru g'ẹhu tsọo phẹ ụtso shii. Ụnwanyi mẹ ụnwegirima tụko ete ẹswa. A -gbẹ l'ẹka dụ ẹnya anụ ụzu ẹhu-ụtso, aatụ lẹ Jierúsalẹmu.

Ebvu-ọma 14:7

Ọ dụ mu g'e shi lẹ Zayọnu bya adzọo ndu Ízurẹlu. Jiékọpu e-te ẹswa; ẹhu atsọo Ízurẹlu ụtso mẹ Chipfu dophuẹpho ndibe iya azụ l'ọnodu phẹ.

Ebvu-ọma 149:2

Gẹ ndu Ízurẹlu tee ẹswa l'ẹka onye meru phẹ nụ. G'onye eze ndu Zayọnu mee g'ẹhu tsọo phẹ ụtso.

Ebvu-ọma 97:8

Ndu bu lẹ Zayọnu nụmaru iya; ẹphe teahaa ẹswa. Ndu Jiuda bẹ ẹhu atsọ ụtso lẹ gẹ gụbe Chipfu egudeje ekpe ikpe.

Azáya 12:6

Unubẹ ọha, bu l'úbvú Zayọnu; unu tụa ụzu ẹhu-ụtso; kẹle onye ono, nọ l'echilabọ unu ono parụ ẹka; mbụ Onye Nsọ kẹ ndu Ízurẹlu.”

Azáya 29:19

Ndu wozeru onwophẹ alị bẹ a-nọdu l'ẹka Chipfu ẹhu atsọ phẹ ụtso. Mbụ lẹ ndu adụdu g'ọ dụ phẹ a-nọdu l'ime Onye Nsọ kẹ ndu Ízurẹlu ete ẹswa.

Azáya 35:2

Mbụ l'ọo-jashịkpoo igwerigwe. Ẹhu atsọo ya tsọshikpoo ya ike; l'o rwua okwe kpua ya. L'e mee ya g'ọ dụ biribiri g'úbvú úbvú Lébanọnu; dụ akpabiri g'úbvú Kamẹlu; yẹe nsụda Sharọnu. Ẹphe egude ẹnya phẹ hụma ọdu-biribiri kẹ Chipfu; mbụ akpabiri kẹ Chileke anyi.

Azáya 37:22

Waa iphe, Chipfu pfuru l'opfu ẹhu Senakeribu baa: Nwada Zayọnu ta adụekwa iphe, ọ gụberu ngu; tẹme ọ nọdu aja ngu ewenu. Nwada Jierúsalẹmu ekwe l'ishi l'ẹka ịigba ọso lẹ ndaba agbala.

Azáya 40:1

Unu dụnaa ndibe mu obu! Unu dụnaa phẹ obu! Nokwa iphe, Chileke unu pfuru bụ onoya.

Azáya 40:9

Je apfụru l'eli úbvú, ha shii; gụbe Zayọnu; onye byaru ezi ozi-ọma. Gụbe Jierúsalẹmu, byaru ezi ozi-ọma; wolinaa olu chia mkpu! Wolia olu; gẹ ndzụ ba agụshi ngu! Sụ mkpụkpu, dụgbaa l'alị ndu Jiuda-a: “Wakwa Chileke unu baa!”

Azáya 51:11

Ọo ya bụ gẹ ndu ono, a gbatarụ ono alwa. Ẹphe agụru ebvu bahụ lẹ Zayọnu. Ẹhu-ụtso ojejoje abụru okpulishi, ẹphe e-kpuru. Ete ẹswa; yẹle ẹhu-ụtso asọpyabe phẹ asọpyabe. Agụ aphụ; yẹle atsụ ude e-gude ọso ghata.

Azáya 52:9

Unu tụko wata ebvu ẹhu-ụtso mgbo lanụ; unubẹ mkpọkpo iphe, tụkoru lẹ Jierúsalẹmu; kẹle Chipfu dụwaru ndibe iya obu. Ọ gbatawaru Jierúsalẹmu.

Azáya 54:1

“Gụa ebvu; gụbe nwanyị, ta atsụdu ime! Mbụ gụbe onye teke ezedaswee nwa. Chikpọta ebvu! Rwua gerwugerwu; mbụ gụbe onye ono, ime teke emeswee ono; kẹle ụnwu gụbe nwanyị, dabyiru mgbegere a-kakwa shii eme l'ụnwu nwanyị alụ ji.” Nokwa iphe, Chipfu eepfu.

Jieremaya 30:19

Ẹphe awata agụ ebvu-ekele; atụ ụzu ẹhu-ụtso. Mu emee g'ẹphe kabaa igwe; ọphu ẹphe abyadụ alwa alị alị. Mu e-me g'ẹphe bụru ndu aakwabẹ ùbvù; ọphu ẹnya abyadụ alwa phẹ.

Jieremaya 31:13

Teke ono bẹ ụnwumgboko a-wata ete ebvu; ẹhu atsọ phẹ; mẹ ụnwokorobya; mẹ ndu bụ ọgerenya kwaphọ. Noo teke mu e-me g'aphụ, ẹphe shi agụ bụru phẹ ẹhu-ụtso. Mu a-dụ phẹ obu; mu agbanwee aphụ, tsọru phẹ nụ g'ọ bụru phẹ ẹhu-ụtso.

Jieremaya 33:11

olu ẹhu-ụtso; mẹ olu ndu ete ẹswa; olu ụnwumgboko, ala ji; mẹ k'unwoke, alụ nwanyị ọ̀phúú; yẹe olu ndu gude ngwẹja ekele abya l'eze-ụlo Chipfu; ẹka ẹphe agụ ebvu asụje: “Kele Chipfu, bụ Ọkalibe-Kakọta-Ike ekele; kẹle Chipfu dụ ree; n-yemobu iya anọje jasụ l'ojejoje. Ọ bụru iphe, a-kpa iya nụ bụ lẹ mu e-dophu alị-a azụ l'ọnodu iya. Noo iphe, Chipfu epfu.”

Jiowẹlu 2:23

G'ẹhu tsọje unu ụtso; unubẹ ụnwu Zayọnu! Unu nọdu l'ẹka Chipfu, bụ Chileke unu tee ẹswa; kẹle ọ watawarụ edzeru unu mini ishi-apha ono g'ọ gbaru. Ọ watawarụ edzeru unu mini ono edzeshi iya ike; edzeru unu mini ishi-apha bya edzekwaphọ mini ụla-apha; g'o shi edzejehawaru iya unu.

Mayịka 4:8

“A -bya lẹ gụbe nwada Zayọnu, bụ ẹka a nọ eche ndu Ízurẹlu g'onye eche atụru-a; bya abụru ẹka ndu Ízurẹlu agbabajẹ je ezeeru ndzụ; ii-mechaa bụru ishi g'i shi bụru teke ndiche; mbụ l'abụru eze e-mechaa rwubebaa gụbe nwada Jierúsalẹmu ọzobaa.

Matiyu 21:9

Ikpoto ndu awụ etso iya l'azụ mẹ ndu ọphu nọ iya l'iphu nọdu akpọ okwe asụje: “Nwa Dévidi, deejee! Deejee! Owoo! Onye Chileke gọru ọnu-ọma nụ bẹ ọ bụ; mbụ onye ono, bụ Nnajịuphu ziru iya g'ọ bya ono. Deejee! Deejee! Ọkalibe-kangokọtaru-nụ, shi l'imigwe!”