Zefanaya 3:11 - BAYỊBURU Izii

¹¹ O -rwua mbọku ono bẹ e tee meẹdu ngu iphe-iphere k'iphe, i meru gude kwefuru mu ike; kẹle mu a-tụkokpoo iphe, bụkpoo ndu gude eku-onwonye ete ẹswa l'echilabọ unu ono woshichaa g'ẹphe ha. Ọphu unu abyadụ ekubaa onwunu ekuku l'úbvú nsọ mu.

Zefanaya 3:11 ပူးပေါင်းရင်းမြစ်များ

Ebvu-ọma 131:1

Mu te egudedu obu mu eku onwomu; jiko Chipfu; ọphu mu aradu ẹnya k'etsetse. Mu ta ayọjedu ọshi l'iphe, parụ ẹka; ọphu mu ejejedu ekobe ẹka l'iphe, mu asụdu.

Ebvu-ọma 49:5

Ndzụ ta abyadụ agụ mu mẹ mbọku oke iphe-ẹhuka rwuẹpho. Ọ tọ dụdu m'obeta ndu achị mu lẹ njọ nọ-phee mu mgburugburu; mu ta atsụkpodaa phẹ ebvu;

Ebvu-ọma 59:12

Iphe, bụkotakpoo opfu, eshije phẹ l'ọnu abụjeerupho mkpọkoro opfu. Mbụ l'opfu, eshije phẹ l'ogbogboromọnu fụta abụkotajeerupho iphe-ẹji. Tẹme ẹphe nọdu egudeje ọnu phẹ adzụ ụka; bya egude iya atụ nwibe phẹ ọnu. Ọo ya bụ; g'ekuku ono, ẹphe anọduje eku onwophẹ ono nmakwaa phẹ g'ọ́nyà.

Azáya 11:9

Iphemiphe ono ta adụdu ọphu emeka nemadzụ iphe; ọphu ọ bụro k'emegbu l'úbvú, e doberu mu nsọ l'ophu; kẹle ọo gẹ mini do-jiru ọma ẹnyimu-a bụ g'eliphe l'ophu a-madzuru Chipfu.

Azáya 2:12

O nwekpọerupho ujiku lanụ, Chipfu, bụ Ọkalibe-Kakọta-Ike doberu iphe, bụkpoo ndu eku onwophẹ yẹe ndu akpa nggangga; bya edobekwaru iya phọ ndu ekutse onwophẹ. Ọo mbọku ono bẹ ee-kuze phẹ alị.

Azáya 45:17

Obenu lẹ ndu Ízurẹlu bụ Chipfu a-dzọta phẹ. Mbụ l'adzọdzo, ọo-dzọ phẹ a-bụru ojejoje. Ọphu a byadu eme unu iphe-iphere; ọphu unu abyadụ emephe bọtorii gburu jeye lẹ gbururu.”

Azáya 5:15

Noo teke ee-woze nemadzụ alị. Mbụ l'amadụ ta adụedu iphe, ọo-bụkwaduru. Ẹnya alwa ndu etse etsetse.

Azáya 54:4

Gẹ ndzụ ba agụkwa ngu! E tee mekwa ngu iphe-iphere. Gẹ ndzụ ba agụkwa ngu k'a nọnyaa e kpua ngu iphu lẹ ntụ! Kẹle a ta abyadụ eme ngu iphe-iphere. Ii-mecha zọhachaa iphere ono, meru ngu teke ị bụ ọgbolanu ono; ọphu ị byadu anyatabaa mkpatsu aphụ, dụ l'abụ onye ji iya nwụhuru;

Azáya 56:7

“Ọo ndu ono bẹ mu e-gude je l'eli úbvú mu ono, dụ nsọ ono. Mu emee g'ẹhu tsọo phẹ ụtso l'ụlo, eepfuje anụ mu. Ngwẹja-akpọ-ọku phẹ; yẹle ngwẹja ọzo, ẹphe gude abyapfuta mu bẹ aa-natachaa l'ọru-ngwẹja mu. Noo kẹle iphe, ee-ku ụlo mu bụ ụlo, ọhamoha a-nọduje epfu anụ mu.”

Azáya 61:7

L'ọzori iphe-iphere, e gege anọdu eme ndibe mu bụ-chia iphe, e-me nụ bụ lẹ ndibe mu a-nata okiphe nnakwasẹ l'ẹka phẹ. Tẹme l'ọzori ekpu iphu lẹ ntụ bẹ ẹphe a-nọdu etechia ẹswa l'okiphe, ẹphe ketarụ. Ẹhu-ụtso ojejoje abụru nkephẹ.

Jieremaya 13:9

“Wakwa iphe, Chipfu epfu baa: Nokwa gẹ mu e-mebyishi eku-onwonye kẹ ndu Jiuda; yẹe oke eku-onwonye kẹ ndu Jierúsalẹmu.

Jieremaya 7:4

Unu ta akpọkwaru obu ye l'opfu ndephu ono sụ: ‘Wakwa eze-ụlo Chipfu; eze-ụlo Chipfu; eze-ụlo Chipfu!’

Ezekẹlu 20:40

Ọo l'úbvú mu, dụ nsọ; mbụ l'eze úbvú Ízurẹlu bẹ mụbe Nnajịuphu, bụ Chipfu sụru l'iphe, bụ ndu Ízurẹlu a-nọdukota; abajẹru mu ẹja. Ọ bụru ẹka ono bẹ mu a-nọdu nata phẹ; tẹme ọ bụru l'ẹka ono bẹ unu a-nọduje gwaa mu agwagwa; nụ mu iphe, kachakpọo ree, unu nweru; yẹe iphe, dụkota nsọ, unu egwejeru nụ mu.

Ezekẹlu 24:21

gẹ mu sụ ndu Ízurẹlu: “Wakwa iphe, Nnajịuphu, bụ Chipfu epfu baa: Mu abyaakwaa eme ẹka-dụ-nsọ mu g'ọ tọ dụhe nsọ; mbụ ẹka ono, a kpụru o shihu ike, bụ ẹka unu gude eku onwunu ono; mbụ ẹka ono, unu yeru ẹnya ono; bya abụru ẹka ono, dụ unu ree ono. Ụnwu unu unwoke mẹ ụnwu unu ụnwanyi, bụ ndu ọphu unu harụ l'azụ; bẹ bụ ogu-echi bẹ ee-gude gbushia phẹ.

Danẹlu 9:16

Gụbe Nnajịuphu: eshinu ị bụhakpowaa onye emeje iphe, pfụru ọto; g'ẹhu ghubuhunụ ngu eghu; vụbuhunuru ndu Jierúsalẹmu ọvuma; mbụ mkpụkpu ngu onoya; mbụ úbvú ngu ono, dụ nsọ ono. Iphe-ẹji, anyi meru; mẹkpoo ẹjo-iphe, nna anyi phẹ meru mewaru ndu Jierúsalẹmu; yẹe ndibe ngu; ẹphe bụru iphe, ndu nọru anyi mgburugburu gude achị ọchi.

Danẹlu 9:20

Teke ono, mu epfu anụ Chileke; epfushiru iya iphe-ẹji, mu meru; mẹe ọphu ndibe anyi, bụ ndu Ízurẹlu meru ono; mbụ arwọ Chipfu, bụ Chileke mu l'iswi ẹhu úbvú iya ono, bụ úbvú dụ nsọ ono;

Mayịka 3:11

Ndu-ishi phẹ bụ a -nụada phẹ iphe-ụphalazu tẹme ẹphe ekpee ikpe. Ndu-ishi-uke phẹ nọdu ezije iphe mẹ a -pfụada phẹ ụgwo; tẹme ndu mpfuchiru phẹ nọdu agbajẹ ẹja mẹ a -nụada phẹ okpoga. Ọle ẹphe tụkokwaru-a dakobe Chipfu epfu sụ: “Chipfu nọkwa l'echilabọ anyi; ọphu ọ dụkwa ẹjo-iphe, byaru adapfuta anyi.”

Ọ́gú 16:3

Ẹphe kpakọ onwophẹ byapfutashịa Mósisu yẹle Erọnu bya asụ phẹ: “Unu metawaru iphe ọbu; o tsobe paa! Ndu Ízurẹlu l'ophu bẹ unu maru l'ẹphe dụ nsọ l'ẹhu l'ẹhu; tẹme Chipfu swiru phẹ eswiru. ?Bụ gụnu meru g'o gude unu palia onwunu eli eli dobe doghata ndu kẹ Chipfu l'ophu?”

Matiyu 3:9

Unu ta arịkwa k'asụ: ‘?Ọ kwa lẹ Ébirihamu bụwanu onye-iche anyi phẹ.’ Unu ta amakwa l'o -beta g'ọ tọ dụ bẹ Chileke a-dụ ike meshia mkpuma-a g'ọ nwụshia ụnwu, a-bụru ụnwu Ébirihamu.

Romu 2:17

A bya l'ẹhu gụbedua, bụ onye Jiu; ị nọdu etu onwongu onye Jiu bya akpọru obu ye l'ekemu; bya egude gụle Chileke aba l'abaa.

Romu 9:33

Ọ bụru iya bụ iphe, e deru sụ: “Unu hụmakpodapho! Mu woakwaru mkpuma, a-nọdu adụ ndiphe ụpfu tọgbo lẹ Zayọnu; mbụ mkpuma ẹphe e-vukota daa iko. Ọphu onye kweru nkiya abyadụ akwa izimanụ.”

1 Pyịta 2:6

Kẹle e deru l'ẹkwo-opfu Chileke sụ: “Lenu; mu gudeakwa ẹka mu tọgbo mkpuma lẹ Zayọnu. Mkpuma ono bẹ mu họtaru; ọ bụru mkpuma vu oke-aswa; tẹme ọ bụru itso gude ụlo. Iphe, bụkpoo onye daphuberu iya nụ bẹ ta abyakwa akwa izimanụ.”