Oziphe 12:11 - BAYỊBURU Izii

¹¹ L'opfu onye maru iphe adụjekwa gẹ mpyịpyi oshi, ụnwu-eswi egudeje eche eswi. Tẹme ẹtu ẹtu, Onye Eche Atụru ono nmashịru kụbe nọdu angụbajeepho angụba gẹ nggu, a kpọberu kpọshia ike.

Oziphe 12:11 ပူးပေါင်းရင်းမြစ်များ

Mbụlembu 49:24

Ọle apfụ iya keẹrupho jịngujingu g'o keru; tẹme e mee ọkpu ẹka iya; o shihu ike. Ọ bụru shita l'ike k'onye bụ Ọkalibe kẹ Jiékọpu; mbụ onye ono, bụ onye-nche; waa onye mgbobuta kẹ Ízurẹlu.

Ẹzura 9:8

Ọle kẹ nwanta bẹ gụbe Chipfu, bụ Chileke mewaru anyi iphe-ọma; kẹle i meru anyi nweru nwa ndu ọphu, phọduru nụ; bya emee g'anyi ngụru angụru l'ẹka-a, dụru ngu nsọ-a; k'ọphu bụ lẹ gụbe Chileke anyi e-me g'ẹnya sahụ anyi; bya emekwaphọ g'anyi shi l'abụ ohu, anyi bụ-a jakerehu.

Ebvu-ọma 23:1

Chipfu eche mu g'onye eche atụru; ọphu ọ dụkpodaa iphe, ụko iya bya adụru mu.

Ebvu-ọma 80:1

Ngabẹnu anyi nchị l'olu; gụbe onye eche Ízurẹlu g'onye eche atụru; bya abụru onye anọduje erwu Jiósẹfu g'onye erwu igwe atụru eje lẹ nri. Gẹ gụbe onye ono, sụgaru l'echilabọ chierobu ono chinaa g'anwụ l'iphu ndu Ifuremu; waa ndu Benjiaminu; yẹe ndu Manásẹ! Jiko rụkotanu ike ngu bya adzọta anyi!

Ẹkwo Ẹtu 1:6

Tẹme g'e gudekwa iya phọ mee g'ẹtu doo ẹnya; bya emekwaphọ g'ílù, ndu maru iphe atụ; yẹe opfu phẹ doo ẹnya.

Ẹkwo Ẹtu 10:21

Olu-opfu onye pfụberekoto azụjije ndu dụ igwerigwe ẹpho. Obenu lẹ ndu eswe anwụhuje lẹ b'enwe egomunggo.

Ẹkwo Ẹtu 22:17

Ngabẹ nchị nụma olu-opfu ndu maru iphe. L'i woru ọkpoma ngu kpọru ye l'iphe, mu ezi.

Oziphe 10:12

Opfu, shi onye maru iphe l'ọnu emeje g'a kwabẹ iya ùbvù. Obenu l'onye-eswe bụ iphe, o pfutaru l'ọnu egbuje iya.

Oziphe 7:5

Angabẹ nchị lẹ mba, onye maru iphe abarụ ngu kakwa ree eme l'angabẹ nchị l'ebvu, ndu eswe agụ.

Azáya 22:23

Mu e-me iya g'ọ ngụru angụru gẹ nggu, a kpọberu kpọ-mia akpọ-mi. Ee-gude iswi ẹhu iya kwabẹ ndibe nna iya ùbvù.

Azáya 40:11

Ndu ẹphe l'iya swị bẹ ọonoduje eche g'onye eche atụru. Ọ nọdu achịkobeje ụnwu atụru ono heru l'ẹka; mbụ heru phẹ dobe onwiya ntse k'ọphu ẹphe a-nọduje iya l'obu. Tẹme ọ nọdu atọje nwẹhu erwu ndu ọphu he nwa.

Jieremaya 23:29

Wakwa iphe, Chipfu epfu baa: Opfu, shi mu l'ọnu dụkwa g'ọku; tẹme ọ dụkwapho g'ọngu, etsuje mkpuma yọgiri yọgiri.

Ezekẹlu 34:23

Teke ono bẹ mu e-ye onye lanụ, echeje atụru, bụ iya bụ Dévidi, bụ nwozi mu g'o leta phẹ ẹnya. Ọo ya a-nọduje anụ phẹ nri; tẹme ọ bụru yẹbedua bụ onye a-nọduje eche phẹ; bya abụru onye eche phẹ ọkpobe echeche.

Matiyu 3:7

Tọbudu iya bụ; ọ hụmaepho ikpoto ndu Fárisii waa ndu Sadusii, awụ abya g'e mee phẹ baputizimu; ọ sụ phẹ: “Unubẹ ụnwu, ẹjo agwọ nwụshiru-a. ?Bụ onye karụ unu g'unu gbalaaru oke-ẹhu-eghu ono, Chileke a-tukoshi unu mbọku, ọo-nma mgboko ikpe ono?

Jiọnu 10:14

Sụ-a; ọ kwa mbẹdua bụ onye obu-ọma ọbu, eche atụru ọbu. Mu maru ndu ọphu bụ atụru mu; ndu ọphu bụ nkemu maru mu.

Jiọnu 3:10

Jizọsu sụ iya: “?Ị bụ onye ezi iphe lẹ Ízurẹlu; ẹbe iphe, dụ nno edoduru ngu ẹnya?

Ndu-ishi-ozi 2:37

Noo ya; ẹphe nụmae ya phọ; meji tsukahụ phẹ. Ẹphe sụ Pyịta waa ndu-ishi-ozi ndu ọphuu: “Ụnwunna anyi; ?bụ gụnu bẹ anyi e-me?”

2 Kọrentu 10:4

Kẹle ngwọgu, anyi gude alwụ ọgu k'anyi ta abụkwa ngwọgu kẹ ndu mgboko-a. Ọ bụ ngwọgu, shi l'ẹka Chileke; bya abụru ngwọgu ọphu shihuru ẹjo ike. Ọ bụ ngwọgu ọphu e gude egbuka ẹka ọhogu Chileke doberu obu ọkpehu iya. Ọo ya bẹ anyi gude emebyi ntụmego-ụgho.

Hiburu 13:20

Gẹ Chileke ono, bụ iya emeje g'ẹhu dụ guu ono; mbụ onye ono meru gẹ Nnajịuphu anyi, bụ Jizọsu Kéreshi shi l'ọnwu teta dzụru ndzụ ono; bụ iya bụ Eze onye eche atụru ono, l'eche atụru ono; ọ bụru mee, ọ gbashịru teke ono, ọ nwụhuru ono bẹ o gude mee ukwe-iphe, Chileke kweru tukobe l'ọgbandzu yẹle nemadzụ g'o vuru ire jasụ lẹ tuutuutuu lẹ mịimiimii ono;

Hiburu 4:12

L'opfu Chileke dzụkwa ndzụ bya ere ire. Ọ kakwa ogu-echi, atsụ akpatiphu labọ atsụ nkọ; k'ọphu ọosujaje nemadzụ sụ-rwua mgbaka ọkpu yẹe ụmi iya; mbụ sụ-rwuchaa ẹka obu nemadzụ nọ; uche iya nọdu iya. Ọovofutajechaa iphe, nemadzụ arị mẹkpoo gẹ nemadzụ gbaru l'ime obu iya.

1 Pyịta 5:4

Ọo ya bụkwanu g'ọo-bụru teke onye-ishi ndu nche atụru ono byaẹrupho k'egoshi onwiya l'oo-mee g'unu nọdu ndzụ ojejoje, bụ iya bụ obunggo, dụ biribiri, ata yịdu mebyihu emebyihu.