Matiyu 22:4 - BAYỊBURU Izii

⁴ Ọ byakwa ezia ndu-ozi iya ọzo bya asụ phẹ: ‘Unu sụ ndu e ziru lẹ nri-a lẹ mu shiakwaru nri ọbu; lẹ mu gbushikwaru oke-eswi mu; mẹ okiri mu gude shia ya; lẹ mu tụkoakwaru iphemiphe dozichaa kwabẹ; g'ẹphe byawarọ lẹ nri ekele nwanyị ọbu.’

Matiyu 22:4 ပူးပေါင်းရင်းမြစ်များ

Nehemaya 9:17

Ẹphe jịkaru eme iphe, ị sụru g'ẹphe mee; zọhashicha iphe, dụ biribiri, i meshiru l'echilabọ phẹ. Ẹphe kwefuru ike gude ekwefu ike họta onye-ishi, e-duphu phẹ azụ lẹ Ijiputu, bụ ẹka ono, ẹphe shi bụru ohu ono. Obenu l'ị bụ Chileke, l'agụje nvụ; ị bụru onye emeje eze-iphe-ọma; mẹ onye obu-imemini; tẹme ị bụru onye ẹhu te eghujedu eghu ẹgwegwa; mbụ onye n-yemobu iya nyịberu anyịbe; ọ bụru iya meru g'o gude ọphu ị paduru phẹ haa.

Ebvu-ọma 86:5

Gụbe Nnajịuphu bụ onye ọma; bya abụru onye agụjeru nemadzụ nvụ. Iphe, bụkpoo ndu arakuje ngu nụ bẹ iiyeje obu yegharụ iya ẹka.

Ẹkwo Ẹtu 15:17

Ọ kakwa ree l'iphe, bụ nri, eeri bụa nwẹba, e yeru l'ophe; n-yemobu dụkwanu; eme l'e gburu eswi, tsụru ẹba ata; mkpọmashi dụkwanu.

Ebvu Sólomọnu 5:1

Gụbe nwanyị, mu lụru k'ọ̀phúú; bya abụru nwune mu; mu bataakwaru lẹ mgbabu mu ono. Mu hekọakwaru ụ̀nwù mẹru mu; mẹwaro ụ̀nwù ọzo, eshigbaa kwẹekweekwee. Mu riakwaru manụ-ẹnwu mu; yẹe ẹbakala iya. Mẹe mu; yẹe mini ẹra-eswi mu bẹ mu ngụakwaru. Unu ria ngụa; unubẹ ndu ọ̀nyà! Unu ngụa ngụta ike unu; unubẹ ndu yeru onwunu obu!

Matiyu 21:36

Ọ bya ezia ndu-ozi ọzo, ka ndu kẹ mbụ igwerigwe. Ndu ozi-ẹgu ono mekwaa phẹ phọ g'e meru ndu ọphuu.

Matiyu 22:5

Ndu ono, e ziru lẹ nri ono paẹl'iya-a ẹka lanụ; ọ bụru phẹ eje iphe, heru phẹ nụ. Onye ejeshia l'ẹgu iya; onye ejeshia ere aswa iya.

Matiyu 22:8

Tẹme ọ gbẹ teke ono bya asụ ndu-ozi iya: ‘Nta bẹ e shiẹbechaaru nri ekele nwanyị; ọphu ndu e ziru lẹ nri ọbu agbadụru k'eriri iya.

Luku 14:17

Ọ gbaẹpho l'eri nri ono; o zia onye-ozi iya g'o je ekua ndu e ziru lẹ nri ono sụ phẹ g'ẹphe bya l'e shighewaru iya.

Ndu-ishi-ozi 1:8

Ọle Unme-dụ-Nsọ a-bya unu l'ẹhu; l'o mee unu; unu eshihu ike; k'ọphu unu a-nọdu epfu iphe, unu hụmaru kẹ nkemu. Unu e-pfu iya lẹ Jierúsalẹmu; mẹ alị Jiudiya; mẹkpoo alị Samériya jasụwaruroya l'ẹkameka, nọ lẹ mgboko mgburugburu.”

Ndu-ishi-ozi 13:46

Pọlu waa Banabasu saahaa ya kpaa kpaa sụ phẹ: Ọo unubẹ ndu Jiu bẹ ọ gbaru kẹ g'e vuru ụzo zia ozi-ọma-a. Obenu l'eshinu unu jịkaru iya; ọphu unu ekwedu l'unu dụ k'enweru ndzụ ojejoje bẹ anyi a-ha unu ghaaru ndu abụdu ndu Jiu iphu nta.

Romu 8:32

Mbụ onye ono te sephuduru Nwa iya azụ; obenu l'ọ gbẹchia duru iya ye g'ọ bya anwụhu-chiru anyi g'anyi ha. ?Bụ ẹgube iphe gụnu bẹ ọ tọo gbẹdu Nwa iya ono l'ẹka nụ anyi kẹ mmanụ?