Ebvu Aphụ 2:6 - BAYỊBURU Izii

⁶ O gudewaa ẹhuka phọkashia ẹka o bu g'onye phọkashiru mgbabu; bya emebyishiwa ẹka ono, ẹphe edzukọbeje ono. Chipfu bẹ mewaru gẹ Zayọnu zọhachaa ọbo-iphe, nwegbaarụ teke abọje iya; mẹkwapho eswe-atụta-unme iya. O gudewaa g'ẹhu-eghu iya, enwube phuruphuru ọphu ọ tọ gụbeeduru onye eze; waa onye uke iphe.

Ebvu Aphụ 2:6 ပူးပေါင်းရင်းမြစ်များ

Ebvu-ọma 74:7

Ụlo ngu, dụ nsọ b'ẹphe nwụru ọku yee o tsua tsurwua alị. Ẹphe woru ẹka ono, ị họtaru g'ọ bụru ẹka ii-buru eburu ono pharwụshia.

Ebvu-ọma 76:2

Ẹka ụlo iya nọ bụ lẹ Salemu. Ẹka o bu ebubu bụru l'úbvú Zayọnu.

Ebvu-ọma 80:12

?Dẹnu g'ọ nwụru ọ gbẹchia bụru nta-a bẹ i jeru eworu mgbabu iya phọkashia; k'ọphu onyemonye, aghata nụ ejeje je awọo akpụru iya g'ọ dụ iya?

Ebvu-ọma 89:40

Igbulọ iya l'ophu bẹ i tsukpọshichawaru etsukpọshi. I woru ụlo-mgbobuta iya tsua yọgiri yọgiri.

Azáya 1:13

Unu ta abyajẹhekwa mu anụ iphe, adụdu iphe, ọ bụ! Ụ̀nwù-isẹnsu, unu akpọje ọku nụ mu tụkoakwaru bụru mu ahụma ahụma. Ọbo Ọnwa-ọ̀phúú; mẹ ọbo eswe-atụta-unme; mẹkpoo ekukọbe, unu ekukọbeje onwunu g'ọ ha; dụkotakwa mu ashị. Ọ bụepho l'ọ tọ dụedu ẹjo ndzukọ unu ọphu adụadaa mu ashị.

Azáya 1:8

E woru ada Zayọnu ono tọgbo okorobo gẹ nwa m̀kpù, a tụru dobe l'opfu-vayịnu; gẹ nwụlo-ẹgu, a kpụru l'ẹgu akpụru-eli; gẹ mkpụkpu, ndu ọhogu iya nọ-pheru mgburugburu.

Azáya 43:28

Noo g'o gude mu woru ndu-ishi ụlo-dụ-nsọ merwushia; bya ahaa g'e woru Jiékọpu mebyishikọta l'ophu; l'e gude ndu Ízurẹlu ephu l'iphu.

Azáya 5:5

“Nta bẹ mu a-karụ unu iphe, mu e-me opfu-vayịnu mu. Mu a-phọkashi iphe, e gude kpọ-buta iya akpọ-buta g'iphe mebyishia ya. Mu etsukpọshia igbulọ iya haa ya g'a zọo ya tọlitoli.

Azáya 5:6

Mu e-me iya g'ọ bụru alị, a gbadoru agbado. A taa kọchabaedu iya akọcha; ọphu eegbubaẹdu iya ọgu. Ọo ya bụ g'olekarara; yẹe ọgara-mbo ezee l'ẹka ono. Mu akaru igwe g'o to dzebaẹkwa mini wụshiru iya.”

Azáya 63:18

Alị nsọ ngu ono ta nọduru ndibe ngu ọdu l'ẹka. Ndu ọhogu ngu bya eworu ẹka ono, dụru ngu nsọ ono zọo tọlitoli.

Azáya 64:11

Eze-ụlo ngu ono, dụ nsọ; bya adụ akpabiri ono, anyi shi nweru ono, bụ ẹka nna anyi oche phẹ shi anọduje aja ngu ajaja ono bẹ a tụakwaru ọku; o tsua ya tsufu. Tẹme iphe, bụkpoo ẹka ono, anyi yeru obu ono g'ọ ha bụkotaru ọla-l'iswi.

Jieremaya 17:27

Obenu lẹ teke ọ bụ l'unu te emedu iphe, mu sụru g'unu meje; k'ọphu bụ l'unu te edobejedu eswe-atụta-unme nsọ; unu -nọdu evujeru iphe abata lẹ Jierúsalẹmu l'eswe atụta unme bẹ mu a-phụ-nwu ọku, e tee menyidu emenyi l'ọnu-abata Jierúsalẹmu. Ọ bụru ọku ono a-tụko iphe, bụ alị-eze, dụ lẹ Jierúsalẹmu ono kekọta.’ ”

Jieremaya 42:18

Wakwa iphe, oopfu baa; mbụ Chipfu, bụ Ọkalibe-Kakọta-Ike; bya abụru Chileke ndu Ízurẹlu. Sụ-a: ‘Ọ kwa gẹ mu tukoshiru ndu bu lẹ Jierúsalẹmu oke ẹhu-eghu mu; noo gẹ mu a-tụkoshi iya unu; mẹ unu laa Ijiputu. Unu a-bụru iphe, e gude atụ ọnu; yẹe iphe, anyị ishi ẹdzu; waa iphe e gude achị ọchi; yẹle iphe, e gude ephu l'iphu; ọphu unu egudebaẹdu ẹnya unu ahụma alị ẹka-a ọzo.’

Jieremaya 45:4

Chipfu sụru-a: “Waa iphe, ii-pfuru iya baa: ‘Wakwa iphe, Chipfu epfu baa: Mu a-bya enwukpọshia iphe, mu shi kpụa l'onwomu; mu abya epheshi iphe, mu shi dzaa l'onwomu l'alị-a mgburugburu.

Jieremaya 50:28

Unu ngabẹkpodapho nchị nụma olu ndu agba ọso ọgu, bụ ndu shi l'alị ndu Bábilọnu nahụ agba ala Zayọnu eje epfu lẹ Chipfu, bụ Chileke anyi gwatawaru ụgwo iphe; mbụ ụgwo iphe, e meru eze-ụlo iya.

Ebvu Aphụ 1:4

Ụzo, e shi eje Zayọnu bẹ agụ aphụ; noo kẹle ọ tọ dụedu onye eshijekwadu iya eje ọbo-iphe, a tụru ọnu iya. Ọguzo, e shije abahụ iya l'ophu bẹ dachishihuwaru nụ. Ndu uke iya bẹ atsụgbawaa ude. Iphe, bụ ụnwumgboko iya tụko nọdu l'aphụ. Yẹbedua l'onwiya nọdu l'oke iphe-ẹhuka.

Ebvu Aphụ 4:16

Ọo Chipfu l'onwiya bẹ bụ onye chịkashiru phẹ nụ. Ọphu ọo-gụbeedu phẹ iphe ọzobaa. Ẹphe ta akwabẹduru ndu-uke ùbvù; Ọphu ẹphe te emeduru ndu bụ ọgerenya ree.

Ebvu Aphụ 4:20

Onye ono, Chipfu wụru manụ l'ishi; mbụ onye ono, bụ iya bụ unme, anyi atụ ono bẹ nwulahụru lẹ nsụ, ẹphe tụru; mbụ onye ono, anyi rịru sụ l'anyi a-nọdu lẹ mkpula iya dzụru ndzụ l'echilabọ ọhamoha ono.

Ebvu Aphụ 5:12

Ẹphe gude ẹka phẹ swị-gbushia ndu-ishi. Ọphu aakwabẹjeedu ndu bụ ọgerenya ùbvù.

Ezekẹlu 17:18

Ọ tọ byadu ala kẹ mmanụ; noo kẹle o to medụru iphe, o riburu lẹ nte; ọphu o dobeduru ọgbandzu ono, ọ gbaru ono.

Ndu Uke 26:31

Mu emee mkpụkpu lẹ mkpụkpu unu g'ọ bụru iphe, dabyigbaaru iphoro. Mu emee ụlo unu, dụ nsọ g'ọ bụru okorobo ụlo. Teke ono bẹ mkpọ ngwẹja, unu gwerụ ta abyaẹdu adụ mu ree.

Zefanaya 3:18

“Mbụ l'iphe-aphụ e meru ngu l'ọbo-iphe ono; bẹ mu e-wofu unu l'ẹhu; kẹle ọ bụ unu ivu-ẹrwa bya abụru unu iphe-iphere.

Malakayi 2:9

“Mbụa; mu haakwaru ndu Ízurẹlu g'ẹphe ha g'ẹphe mee unu ujikputeru; g'ẹphe mee g'unu bụru ndu e wozeru alị; kẹle unu tee mejedu iphe, mu sụru g'unu meje. Ọchia iphe, unu watarụ ememe bụ l'unu abọje nemadzụ ẹbo mẹ unu -nọdu ezi ekemu mu.”