Рацыд 12:48 - Библи: Сыгъдӕг Фысты чингуытӕ: Рагон Фӕдзӕхст ӕмӕ Ног Фӕдзӕхст

⁴⁸ Ӕрцӕуӕггаг чи у уе ’хсӕн, уый куы бафӕнда Дунедарӕджы Куадзӕн сбӕрӕг кӕнын, уӕд-иу ын йӕ хӕдзары нӕлгоймӕгтӕн се ’гасӕн дӕр сунӕт скӕнут. Уый фӕстӕ йӕ бон уыдзӕни Куадзӕн скӕнын, уымӕн ӕмӕ нымад ӕрцӕудзӕни бынӕттон цӕрӕгыл. Ӕнӕсунӕттӕй дзы мачи саходӕд.

Рацыд 12:48 ပူးပေါင်းရင်းမြစ်များ

Райдиан 17:11

Сунӕт кӕнут уӕхицӕн — уый уыдзӕни Мӕн ӕмӕ сымах ӕхсӕн фидыды нысан.

Райдиан 17:12

Йӕ райгуырдӕй аст боны кӕуыл рацӕуа, уӕ уыцы лӕппутӕй-иу алчидӕр ӕрцӕуӕд сунӕтгонд. Афтӕ кӕнут фӕлтӕрӕй-фӕлтӕрмӕ, уӕхи ӕмӕ, уӕ цагъарты цотӕй уӕ хӕдзары чи райгуыра, уыдонӕн ӕмӕ, уӕ байзӕддагӕй чи нӕ уа, фӕлӕ кӕцыфӕнды ӕрцӕуӕггагӕй кӕй балхӕнат, уыдонӕн дӕр.

Рацыд 12:19

Авд боны дӕргъы уӕ хӕдзӕртты ӕнхъизӕнӕн йӕ кой дӕр ма уӕд. Ӕнхъизӕнӕй конд дзул чи бахӕра, фӕнды ӕрцӕуӕггаг уӕд, фӕнды израилаг — Израилы адӕмӕй фӕхъӕудзӕн.

Рацыд 12:43

Дунедарӕг Моисей ӕмӕ Ааронӕн загъта: «Мӕнӕ уын Куадзӕны ӕгъдау. Ӕндӕрбӕстӕгтӕн дзы аходын не ’мбӕлы.

Езекиел 14:7

Уымӕн ӕмӕ Израилы адӕмӕй ӕмӕ се ’хсӕн цӕрӕг ӕрцӕуӕггӕгтӕй исчи Мӕнӕй йе ’ргом куы аздаха ӕмӕ гуымирытыл ӕнувыд куы суа, йӕ фыдбылызӕн тӕригъӕды куы бафта ӕмӕ афтӕмӕй пехуымпармӕ куы ’рбацӕуа, Мӕнӕй дзы дзуапп ракурыны охыл, уӕд уымӕн Ӕз, Дунедарӕг, цавӕр дзуапп хъуамӕ раттон?

Езекиел 44:9

Уымӕ гӕсгӕ Дунедарӕг Хуыцау афтӕ зӕгъы: нырӕй фӕстӕмӕ Мӕ Кувӕндонмӕ иу ӕцӕгӕлон дӕр — буарӕй дӕр ӕмӕ зӕрдӕйӕ дӕр ӕнӕсунӕт чи у — нал бацӕудзӕн, суанг Израилы адӕмӕн се ’хсӕн куы цӕра, уӕд дӕр.

Езекиел 47:22

Байуарут ӕй халӕппӕрстӕй уе ’хсӕн, стӕй, ӕрцӕуӕггагӕй уӕм чи цӕры, цот кӕмӕн рацыд, уыдоны ’хсӕн дӕр. Израилӕгтау уыдон дӕр нымад ӕрцӕуӕнт бынӕттон цӕрджытыл ӕмӕ сымахимӕ хай райсӕнт Израилы хӕдзарвӕндӕгты ’хсӕн.

Левит 19:34

Цыма бынӕттон цӕрджытӕ сты, ахӕм цӕстӕй сӕм кӕсут. Уарзут сӕ, уӕхи куыд уарзут, афтӕ. Рох уӕ ма уӕд, уӕхӕдӕг дӕр Мысыры зӕххыл ӕрцӕуӕггӕгтӕ кӕй уыдыстут, уый. Ӕз Дунедарӕг дӕн, уӕ Хуыцау.

Нымӕцтӕ 9:14

Уе ’хсӕн цӕрӕг ӕрцӕуӕггаджы куы фӕнда Дунедарӕджы Куадзӕн скӕнын, уӕд ӕй хъуамӕ Куадзӕны фӕтк ӕмӕ ӕгъдаумӕ гӕсгӕ скӕна — уыцы иу уагӕвӕрдтӕ уӕм хъуамӕ уа ӕцӕгӕлонӕн дӕр ӕмӕ бынӕттон цӕрӕгӕн дӕр».

Галатӕгтӕм 3:28

Ныр нал ис нӕдӕр иудейаг, нӕдӕр муртаттаг, нӕдӕр цагъар, нӕдӕр сӕрибар, нӕдӕр нӕлгоймаг, нӕдӕр сылгоймаг, уымӕн ӕмӕ уе ’ппӕт дӕр баиу стут Йесо Чырыстиимӕ иудзинады фӕрцы.

Колоссӕгтӕм 3:11

Ныр муртаттаг уай, иудейаг уай, сунӕтгонд уай, ӕнӕсунӕтгонд уай, талынг адӕмтӕй уай, скиф уай, цагъар уай, сӕрибар уай — уӕлдай нал у. Ӕппӕт дӕр у Чырысти, алкӕй зӕрдӕйы дӕр Уый цӕры.