YOEL 2:27 - Nanduk Ngget Tul Pidnak Wene

²⁷ Kit-nen yebet kagolar-e: ’Nagawan Indo-ge nit Isarael nap nennggendumu-t worasu-o’ luk kenaru yogolat, ’Nagawan Indo iri-ge nit Nenmbal Pem Nagawan-net yusu-o’ luk yebet kagolat woragub-o. Mbal Pem Nagawan nin mbi worasu-ge mondok lag-o. An narig-et nak worasu-o. An nilirag-e tuguruk innggiri rak puwa bug-o!” luk yij-o.

YOEL 2:27 ပူးပေါင်းရင်းမြစ်များ

NDAWI ENGGA 46:5

Nde, Mbal Pem Nagawan-e iri me worasu me, o siri iri-ge lak ma bug-o. O kil posola-ge, at-nen yongga wuruwa-o.

NGGOMO WENE 1:23

An-nen nggomo korosolat met kobosola-ge, kwara kulurag-o. Kit-nen kologola-ge, an-nen-e an narem woraso wene nam tak posolat, an-nen naru yidnag-e mirik konposolat kwarimin-o.

YESAYA 44:3

An-nen-e yi-ge nggweyak amburu lak pem kilik posolat, nggweyak mbeng larak pem-et nde, yi wirik posolat kwarimin-o. An namawi-ge kat-nen wigarak ininggem posolat, kat kilirak-nen ndaguwa imbiringgat tak onposolat kwarimin-o.

YESAYA 44:8

An nelem nap wa-e. Kwiye yogolat, wendet yogolat yurak pug-o. O nanduk-nen kuri yawo-ge kwat momtak mende-ge an-nen urul poso-ge kir-e mondok kenaru iri nar-o. Kura onposo nap erep mbi worali bug-o. Iri-nen an-nen na eneyaso bug-o” luk yij-o.

YESAYA 45:18

Nagawan Indo mbal ndak worak pid iri-ge Mbal Pem Nagawan-net yusu-o! At iri-net o yu-ge kwarak posolat, ndak worak pamu-o. Iri yamu, o yu-ge tugup lak irit mendak worasu-o. At-nen o ndak worosolar-e, we o nak ap tuporak wolmakluk ndak wirigit lag-o. Are, enpe wolmomtak ondoro worak irit ndak worak pamu-o. At-nen yosolar-e: ”An-e Nagawan Indo-nen yusu-o. An nggal erep mbi worali-ge mondok lag-o.

YESAYA 45:5

Nagawan Indo nin mbi worasu-ge lag-o. An narig-et worasu-o. Mbal Pem Nagawan-e misiget an nak-nen yusu-o. Kat-nen-e an-e karu bug-et nde, an-nen-e san kinggem pusu-o.

YESAYA 45:6

Ereba oboksa kwat kubusu ereba karug-e, mo luwaso nggwe kuri-nen mo mboso nggwe kuri woragwi nap oboksa-nen an nimin peragolar-e, Mbal Pem Nagawan nin mbi mondok worasu bug-o. At arig-et nak Nagawan Indo-nen yusu-o luk enaru makluk kwarusu-o.

YESAYA 46:9

Nanduk ereba-nen kwat yid ereba na kwara kinndi yebet ker-o. An nimin-e kit-nen-e: ’Ar-e Mbal Pem Nagawan-net yusu-o. Nin mbi worasu bug-o. Ar-e Mbal Pem Nagawan-nen yusu-o. At nggal nin mbi worasu-ge lag-o’ luk yer-o.

YESAYA 49:23

Nagawan nagawan-e kit kineid nggal kwat yogolat, nde, it onkwerag-e kit kiniya nggal kwat yogolat mao. It-nen kat keram tebe yogolar-e, kat keram entare nggwe tud luk kat kek tak kubuwa-o. Iri yogola, kat-nen an nimin-e: ’At iri-ge Nagawan Indo-net yusu-o’ luk neberagun-o. Nde, indi an nebem wat tak wolma nab-e indi kabak ma bug-o” luk yij-o.

YESAYA 53:6

Nit oboksa lomba wam kabak yidnak nggal woragolat, tu-ge nindi-n pidnak ndomok mburugwi-o. Alat nde, Nagawan Indo-nen-e nit-nen meya kwarugwi-ge oboksa at ebem yatku bamu-o.

YESKIEL 37:6

Tuguruk kenmengen min kununo min kwarak posolat, kenaboro mbeyoksa keya bimin-o. Iri rak kunpuruk, nindisep wok kondosola, tuguruk kunluk yugub-o. Kunluk yogolar-e, kit-nen-e an nimin-e ar-e ndemeret Nagawan Indo-nen yusu-o luk kenaru ma-o’ yak indi-o” luk yak nirij-o.

YOEL 2:26

Kir-e nunggwi mende-ge ndak irit nonggolat kinmbit ma-o. Nagawan Indo-nen-e kir-e kwiye worak kwarat kwat kunpusu me, kir-e Nagawan Indo Kenmbal Pem Nagawan kek tak pugub-o. An nilirag-e pesel kunpugwi enne are kwat yugup pug-o!

YOEL 3:17

”Isarael nap wa-e. Iri yosola-ge, an-e Nagawan Indo kit Kenmbal Pem Nagawan-nen yusu-o luk kenaru yugub-o. An-e nondobo marak Sion iri na bem-et woraso-o. Yerusalem na o siri marak irit kwat ma-o. Nde, Mbal Pem Nagawan enaru buk nab-e iri me-ge tuguruk ngguwa bug-o.

WONARIDNAK WENE 11:29

Yak tosola, Musa-nen yosolar-e: ”Kar-e an-nen iri yurak neberasu-t nde, an-nen-e Nagawan Indo-nen at Indi at elem nap wok ondosola, it oboksa-nen at ene lomboksa yugwi nap kwat momtak irit perasu-o” luk yak tij-o.

WONARIDNAK WENE 23:21

Yakup ebem-e meya mbi kagit lag-o. Isarael ebem-e anggun worak mbi ebem kasu bug-o. Nagawan Indo Enmbal Pem Nagawan-e it inmin worasu-o. It-nen enne nggok pem yogolar-e: ’Ar-e nit nennggendumu Nagawan-net yusu-o’ luk yili-o.

2 KORINTUS 6:16

Mbal Pem Nagawan uwi min kugiwak min erep kundik wolma, lak? Nde, nir-e uruk nak woraso Mbal Pem Nagawan uwi-nen yili-o. Mbal Pem Nagawan-nen yosolar: ”An-e it inmin woralat, it ennggenggerak woralar-e, An-e it Enmbal Pem Nagawan kwat yosolat, Nde, ir-e an nelem nab-et kwat yogolat ma-o” luk yij-o.

1 PETERUS 2:6

Nde, Mbal Pem Nagawan engga bem-nen yosolar-e: ”An-nen-e onggo kwarat pugwi kerep mbi lena, kerep iri na-ge o unggut paro pidnak maklug-e, Sion iri me pigi-o. Nde, kerep na ebem inndi angin tubu yuwa nab-e inndi kabak ma bug-o” luk yij-o.

NAM PARA WENE 21:3

Iri luk, an kuliginggal-e, nagawan-nen koreyak woraso ondoro-nen ene ngguloksa yosolar-e: ”Yawo-ge Mbal Pem Nagawan woraso sa-ge ap ennggendumu worasu-o! Ar-e it inmin worala, ir-e at ilirak kwat ma-o. Nde, Mbal Pem Nagawan ar-et it inmin woralat, it Enmbal Pem Nagawan kwat ma-o.