YEREMIA 2:20 - Nanduk Ngget Tul Pidnak Wene

²⁰ Nagawan Indo-nen yosolar-e: ”Kar-e obi-net ndegel nuburak kisili yosolat, an-nen yidnak yidnak kwarurak kisili yosolat, nerembel wanurak kisili yosolat yigen-o. Ndobo kek tak ereba na wolak pem min e engga miri ludtak ereba na erem pem min-e kugwiwak ereba na erembel wanosolar-e, mbabi kwat tenak woraso-o.

YEREMIA 2:20 ပူးပေါင်းရင်းမြစ်များ

1 NAGAWAN NAGAWAN-NEN KWARIDNAK WENE 12:32

Iri rak purug-e, Yerobeam-nen-e tepan ombo-ge wam wosa kan posolat wolmomtak Mbetel iri me inpij-o. Nde, at ondomok-nen na sapi ndak wosa pid iri na amanggim wam wosa kan posolat woragij-o. Yewura nap-nen wam wosa Nagawan Indo amanggim kan pogolat nggok sakwi ereba na nggal-et at-nen waneya min tanggal min watsa posolar-e, waneya delapan tanggal lima belas iri bem-e wam wosa kan pogolat nggok sakolat wolmomtag-o luk watsa pij-o. Yosoluk, iri na tarem-et Yerobeam na-ge waneya min tanggal min watsa pid iri na bem at nanduk-nen anggul-et tel korosolar-e, Mbetel mberarik, wam wosa kan pij-o.

NDAWI ENGGA 107:14

At-nen-e ndamuk mom ndirik arem-nen lesa wok unpuruk, it kamarak inpidnak kere iri na ndela keya bij-o.

NDAWI ENGGA 2:3

”It-nen tena nunpuruk worali iri-ge ininggem-nen wesera nit nenarig-et menluk wisirik wolmog-o!” luk yili-o.

MBIRIGA WENE 19:8

Yak ondosoloma, it pidsa-nen: ”Nagawan Indo-nen yak nindid iri-ge kwarul-er-o” luk it oboksa-nen enne leksa nak yogola, onggo yiga iri na-ge Musa-nen Nagawan Indo yak tij-o. Yosoloma, Nagawan Indo-nen Musa yak tosolar-e: ”An-e nggan nggan kwarat-nen muruksa kendam lobok yimindik, kimin wene yosola-ge, ap-nen kologolat iri-net inndi-ge kat kebem wat tak puruk wolma-o.

MBIRIGA WENE 24:3

Iri luk, Musa na it endam mberarig-e, Nagawan Indo-nen watsa yak indid wene min it-nen kwarurak mururak enpem pidnak wene oboksa min yak indij-o. Yak ondosoloma-ge, it-nen misik tarem-et nak enne leksa yogolar-e: ”Nagawan Indo-nen yid irit oboksa kwarul-o” yiga-o.

MBIRIGA WENE 3:8

Iri ala karuk-nen an-e Mesira nap iri ininggiyapma-nen wisirik unpuruk, o terak wolmomtak sa mbi me inmin mbereyekluk-nen yu me mbuwagi-o. Nde, o iri me nggweyag-e mondok amburu worak, yi mende ndi mende na kwarar-o. Nde, yawo o iri me-ge Kanaan nap min Et nap min Amori nap min Peris nap min Ewi nap nim Yebus nap min worali-o.

YESAYA 1:21

O siri yu-ge nandug-e tugup lak woraso na-t nde, yawo-ge terak mbabi yil noso kwe nggal kwat yusu-o! Nde, nandug-e o siri iri me woragwi nab-e mot mot lud tak nak kwarogolat woragwi-t nde, yawo-ge o siri iri na me-ge ap wurugwi nap nde worali-o.

YESAYA 9:4

Kat-nen it-nen angin worak kud turuk nugwi ereba na nggosa keya bosolat, sum angin worak unndugun pem kud tugwi ereba na nggwirik posolat yigen-o. Kat kilirak enarengge ondoro rak pogolat, anggun panggun tak unpugwi nab-e kat-nen urugwe nggwe rak inpigen-o. Iri kwat inpigen iri-ge, nanduk Mirian nap urugwe nggwe rak inpigen iri na nggal-et kwat inpigen-o.

YEREMIA 2:31

Isarael nap wa-e. An-nen yusu wene yu kwara koler-o. An-e kit kenmanggim-e nembaga usu nggwarak nggal kwat yosolat, nggweyak ndamuk mom ndirik nggal kwat yosolat yigi-a? Alat nde, kit-nen yogolar-e: ’Nir-e weserak nindi-n pidnak yeba-t nul-o. At eram tuguruk mbururag-e ninmbir-o’ yili iri-ge noluk-nen yili-o?

OSEA 1:2

Mondok mondog-et Nagawan Indo-nen Isarael nap wene yak ondosolar-e, an nemndam tak pij-o. Nagawan Indo-nen yosolar-e: ”Osea wa-e. Kar-e mburugundik, ap inmin terak noso kwe misik wani-o. Kilirak na iniya nggal nag-et kwat ma-o. Nde, an nilirak Isarael nab-e kat kogwe iri nggal nag-et kwarogolar-e, an nimin tugup lak woragit lak, keya nibili-o” luk yij-o.

OSEA 2:5

Kiniya-ge inggiri lak terak waring kaso-nen yusu-o. Nde, at-nen yosolar-e: ’An-e nindi kundik-nen nunggwi mende mak norogolat, yi wok norogolat, yurugwi sum wol min linen min-nen konidnak wok norogolat, saitun amburu min anggut amburu min wok nitli ereba na endam mbirimin-o’ luk yij-o.

OSEA 3:3

An-nen kwe iri yak tosolar-e: ”Kar-e an yik neyarok kwarat woragun-o. Nde, an yik neyarok woralar-e, mondok terak yeba waring kagit lak yosolat, mbabi yigit lak irit wolmomtag-o. An-nen na kat kimin-e nene yimin pug-o” yak tigi-o.

OSEA 4:13

Kugwiwak erembel wanugwi sa ndobo anggul pem min ndobo wolak pem min ereba na me-ge kir-e kugwiwak amanggim wosa pogolat, e engga angin lud tak ereba indipma-ge konak wesarak ala karuk, indipma emben konak mende kugwiwak amanggim kan pogolat kwatli-o. Alat nde, iri kwatli iri-nen ndowaga no kwat ma-o? Kinlirak kwami ndugum-nen terak waring kagolat, kinlirak onkwerak-nen na ap erep inmin mbabi kwarogolat yili-o.

TUGURUK YIDNAK WENE 12:2

Kit nde o iri me ngguruk woragolar-e, it-nen unkugwi erembel wanugwi ondoro ndobo mot pem min ndobo teberak pem min e angga miri indipma min ap iri me woragwi nap-nen unkugiwak erembel wanugwi ondoro oboksa ereba-ge mondok ndamera yigisa lak tak per-o.

TUGURUK YIDNAK WENE 26:17

Yawo-ge kit-nen yogolar-e: ’Nagawan Indo iri-ge nit Nenmbal Pem Nagawan-net yusu-o. Nir-e at-nen yidnak yidnak nak kwarogolat, at-nen imiri mbarak pidnak wene min at-nen nenpem pidnak wene min mondok kwarogolat wulmul-o’ luk mondok watsa yili-o.

TUGURUK YIDNAK WENE 4:20

kir-e mondok andi bandi kaigep sa Mesira-nen kinmiri luk lobok yid iri-ge yawo kir-e at elem nap worali yu nggal worabokluk, kinmin lobok yij-o.

TUGURUK YIDNAK WENE 4:34

Are, Nagawan Indo Kenmbal Pem Nagawan-nen Mesira-nen kit kwat kinpid iri nggal mbal pem nagawan misik mbi-nen yi nap ndi nap ennggendumu-nen ap elem mbi lesa wok unpuruk at elem nap tak inpidnak mbi worali, lak? Alat nde, Mbal Pem Nagawan amawi bem-nen kwarosolar-e, lak tak onposo mende bem-nen na, wim pem-nen na, kwiye worak nin tak nan tak amawi bem-nen kwarusu-ge kenlengen-nen kali irir-o.

YOSUA 1:16

Yak ondosoloma-ge, it enlem Uruben min Nggat min it enlem Manase erep minggirik min-nen onggo yogolar-e: ”Kat-nen ’Iri nggal kwarer-o’ luk nenpem posola-ge, kwarul-er-o. Nde, kat-nen ’Iri me mberer-o’ luk nenpem posola na, nenpem pugun sa-t iri na me-t mburul-o.

YOSUA 24:24

Yosoloma, Isarael nap-nen Yosua yak togolar-e: ”Nir-e Nagawan Indo Nenmbal Pem Nagawan nak ndegel obogolat, at-nen nenpem pidnak nak kwarogolat wulmul-o” luk yiga-o.

YOSUA 24:26

Imiri mbarak pidnak wene min enpem pidnak wene min ereba na-ge Mbal Pem Nagawan-nen idnak imiri mbarak pidnak engga iri na arem mbarij-o. Iri lug-e, at-nen kerep nggok misik wanarig-e, Nagawan Indo amanggim lenak pidnak ondoro iri na me e nggok iri na indipma sindik pij-o.

NAM PARA WENE 17:1

Iri luk, yimbe tuju tena woraiga aid nap tuju ereya na ennggendumu misik-nen-e an neram lobok yarik-nen yosolar-e: ”Lobok yi-o. Terak yebugwi kwe nggulok iri na ebem mbaruwa wene mirik kibimin-o. Nde, iri-ge yi kwarat korok korok wiridnak o siri nggulok irir-o.

WENE MBENARUGWI NAP-NEN KWARIDNAK WENE 2:11

Iri kwarogolar-e, Isarael nab-e Nagawan Indo imin meya kwarogolar-e, onmborak Enmbal Pem Nagawan Mesira-nen wesera wok unpuruk lobok yid Nagawan Indo erembel wanugwi na-ge keya biga-o. Iri kwarogolar-e, kugwiwak Mbaal min Asitoret min iri-nen ennggendumu it worali nap ereba-nen erembel wanugwi kugwiwak ereba na erembel waniga-o. Iri yogola, Nagawan Indo isilepma yosolar-e, keya enpamu, ap nden unpugwi nap-nen ondogolat, enarengge ndena wanogolat woraiga-o. It unuwim nap it-nen ennggendumu worali nap ereba na undurag-e enmawi lak yiga-o.

1 SEMUEL 12:10

Iri yogola-ge, it meya yidnak parogolat, Nagawan Indo eram tepan yogolat-nen yogolar-e: ’Nagawan Indo wa-e. Nir-e kat keram-nen mborogolar-e, meya kwarogolat, kugwi Mbaal min Asoret min ereba na erembel wanige-t nde, yawo-ge nit nunuwim nap ininggem-nen ninmiri yi-o. Iri yosola-gen, nir-e kat nak kerembel wanogolat wulmul-o!’ luk yiga-o.