OROMA 12:8 - Nanduk Ngget Tul Pidnak Wene

⁸ Ap inndi eyak wururak wok tidnak nde ala-ge, ap inndi eyak worosolat wolmag-o. Nde, at arengge ap tembesa wok undurak wok tidnak nde ala-ge, indi mbek tak pem-et wok ondosolat wolmag-o. Nde, ap lit eneyaruk nurak wok tidnak nde ala-ge, eberari lag-et ap lit eneyaruk nosolat wolmag-o. Nde, ap enabuwa kudtak wok tidnak nde ala-ge, alen min-et ap enabuwa kasolat wolmag-o.

OROMA 12:8 ပူးပေါင်းရင်းမြစ်များ

NDAK WIRIDNAK WENE 18:19

Nde, Abarakam linigi na-ge at-nen-e at elirak min at-nen wigarak min at-nen watsa yak ondosola, it-nen-e an-nen yidnak yidnak yogolat, konak mot mot nak kwarogolat wolmakluk linigi na-ge, nde, it-nen nde iri kwat tenak woragola-ge, an-nen Abarakam imin urul pigi na-ge kwar-et onposolat woramin-o” peragij-o.

NDAWI ENGGA 112:9

At arengge-ge we irit insilobulo lak nap tembesa wok undusu-o. Ar-e pempa konak nak kwarosolat me, at nak mondok kek tak obogolat wolma-o.

NDAWI ENGGA 37:21

Meya yugwi nap-nen-e ap enarengge luru wanurug-e, tuguruk uwi yakwi bug-o. Alat nde, konak nap-nen-e inndi op pem-et we wok undugwi-o.

NGGOMO WENE 22:9

Ap indi konag-e nunggwi mende-ge enarengge lak nap mak ondoso me, Nagawan Indo-nen imbiringgat tak ubuwa-o.

AID WENE YOSO NAP 11:6

Kat-nen uwi pil kasolar-e, kuplila min-et kubu min-et pil kasolat wolmin-o. Ngge-nen nde konak mburuwa iri-ge nir-e nenaru buk me, nit-nen pil kul-e misik umbuk yosolat, misiget nak-nen mburuwa, lak? Are, mberensa-net mburuwa? Iri-ge nenaru bug-o.

AID WENE YOSO NAP 9:10

Kat abog-e ap watluk ndok wurugwi sa mburugun-o. Nde, iri me-ge yebet kagwi min yabu min enaru yugwi mende min inndi tenggerak woragwi min-e watluk ndok wurugwi sa-ge lak me, kat-nen yabu oboksa wanosolar-e, kamawi min-et wanosolat nak wolmomtag-o.

YESAYA 32:5

Ap wid indi worak nap imin-e ap indi pindong tak nab-o yuwa bug-o. Ap enmberam laso nap imin-e mot mot kwaroso nab-o na yak tuwa bug-o.

YESAYA 32:8

Alat nde, ap indi ngarak konak-nen-e konak nag-et yebet karuk, kwarosolat na konak iri na-t kwaroso-o.

YESAYA 64:5

Kar-e ap mot mot nak kwarugwi nap min kat kindi-nen pidnak ndak ndak kwat tenak worali nap min wok onposo-o. Kat kisilepma-ge nenpem posolat woraso-t nde, nir-e meya kwat tenak woraige-o. Nir-e nanduk ereba-net lugud tak nak kwarugwi-o.

MATIUS 25:40

Yak togolikma-ge, Nagawan na-nen wene erep nggarosolar-e: ’An-nen yak kendeyeg-o: An nowot-tak marik komosa meya misik iri na iri nggal kwat ibigep iri-ge an-et kwat nibigeb-o!’ luk yuwa-o.

YIDNAK YIDNAK WENE 11:23

Wirik ibikma, wok yidnggal-e, Mbal Pem Nagawan-nen we wok ondoso mende iri na kasolug-e, alin alen kagaij-o. Karuk, it pidsa-nen tugup lak Nagawan Indo-nen yidnak yidnak kwat tenak wolmakluk nggomo indij-o.

YIDNAK YIDNAK WENE 13:12

Iri kwaridnak iri karug-e, o iri me nagawan-e indi angin tubu yij-o. Nagawan Indo owene mirik pidnak iri na bem mondok wi yij-o.

YIDNAK YIDNAK WENE 13:15

Kore yigarik worakmu-ge, imiri mbarak pidnak wene min Mbal Pem Nagawan ene lomboksa yugwi nap-nen mbaridnak wene min wonarak pogola karuk, tepan yugwi ma nagawan mendak inpidnak nap-nen wirik inpidnak nap na endam wene wosa pil mborogolar-e: ”Nenggamirak wa-e. Kit-nen nde kweyap yu yak undurak nggomo wene mbi worala-ge, yak undurag-o” luk yak indiga-o.

YIDNAK YIDNAK WENE 15:32

Nde, Mbal Pem Nagawan ene lomboksa yugwi nap Yuras min Silas min-nen-e ennggamirak tak inpidnak nap na nggomo ondogolat, indi wi ya bogolar-e, kwarat woraiga-o.

YIDNAK YIDNAK WENE 20:2

O iri me waring kasolar-e, anggamirak tak inpidnak nap inndi eyak wiril wiril-e Yunani wi wok yij-o.

YIDNAK YIDNAK WENE 20:28

Iri bem-e, kit na kit-net yik karok woragolat, Konak Indi-nen lomba wam ndok worak pidsa iri yik eneyarok wolmakluk mendak kinpidnak me, Mbal Pem Nagawan-nen at ambik Ambara eyabi bem-nen winde yidnak lambuk tak inpidnak nap iri na kit-nen-e lomba wam yik karok woragwi nap kwasa yik eneyarok wolmer-o.

YIDNAK YIDNAK WENE 4:36

Iri nggal kwarogolar-e, ap misik unu-ge Yusup iri-ge, it wirik inpidnak nap-nen unu mbi yarogolar-e, Mbaranabas yariga-o. At unu yogolar-e, Inndi Yangonoso La-o yogolat. At elem-e Lewi nap, nde, at uwi-ge Siperus-nen lobok yidnak nap na-nen-e

OROMA 12:13

Inndi angin tubu yidnak nap-nen ukwe peraidnak mende-ge yongga ondogolat wolmer-o. Ap sal na kinndi mbek tak pem-et kinmin tak unpuruk kenma rak enper-o.

OROMA 13:6

It yabu tena worali iri-ge Mbal Pem Nagawan ndegel ibili me, iri bem-nen na kir-e pemerinta enmanggim pili tol-e wok indili-o.

1 KORINTUS 12:28

Nde, Mbal Pem Nagawan-nen ap lambuk tak inpidnak ennggendumu ap pidsa onposolar-e: Nandug-er-e wirik inpidnak nap onposolat, imbirig-e, Mbal Pem Nagawan ene lomboksa yugwi nap onposolat, imbirig-e, ap mul undugwi nap onposolat, iri rak puruk imbirig-e, kwiye worak mende kwarugwi nap min ap ki rak unpurak amawi wok indidnak nap min yongga undugwi nap min enne kulugwi nap min nin wene nan wene bem yugwi nap min irit inpij-o.

1 KORINTUS 14:3

Alat nde, ap mbi-nen Mbal Pem Nagawan-nen yidnak wene lomboksa yosolar-e, ab-et yak undusu me, mendak onposolat, nggomo ondosolat, inndi yangonosolat yusu-o.

2 KORINTUS 1:12

Wene misik yu bem-e nit ninndi kek tak pili-o: nit nondomok ninndi arem-nen kenggel nondosolar-e, nir-e ap inmin kwarogolat woraidnak na irit, kit kwat kinpidnak na irit, nir-e mot mot nak kwarogolat, Mbal Pem Nagawan-nen lud tak nak yoso nggal yogolat woraige-o. Nde, iri-ge nggweyak ma nap inndi tenggerak pem-nen kwaridnag-e lag-o. Are, Mbal Pem Nagawan-nen we wok ondoso amawi bem-net kwaridnag-o.

2 KORINTUS 11:3

Alat nde, waro indi nggat nggat worak iri bem-nen Awa na ombol pem lagaid nggal, iri nggal kit kinndi kabak tak pogola, kir-e kinndi misiget nak luk Kerisut ariget abuwa kali iri keya bugup naru numud kwarat kasu-o.

2 KORINTUS 8:12

Kir-e kenalen min-et pugup ala-ge, Mbal Pem Nagawan-nen kit kininggem woraso mende iri ndak ndak irit wanuwa-o. Nde, enarengge lak kagir-et nde, Mbal Pem Nagawan-nen ”Wok niri-o” luk yoso bug-o.

2 KORINTUS 9:11

At-nen silobulo winde rak konposola-ge, kir-e kinndi lubug-et yi mende ndi mende tomborogola karuk, nit nenpem ala, Mbal Pem Nagawan wa yak tugwi-o.

2 KORINTUS 9:13

Nde, kit-nen lubug-et tomborogolat-nen ndak tak pili mende iri bem yenggerak kunpuruk, ap kwarat-nen Mbal Pem Nagawan unu kek tak pogolar-e, kir-e mot mot nak Kerisut-nen idnak aid wene para yogolat, kinndi lubug-et it na ap pidsa na kinsilobulo tembesa wok ondogolat yili iri bem-net at unu kek tak puwa-o.

2 KORINTUS 9:7

Iri ala-ge, ap enambik lombok-net Mbal Pem Nagawan amanggim pogolar-e, at indi-n peraruk-net puwag-o. At indi angin min-et nde nin nap-nen ”Iri nggal purag-o” luk yuwa bem nak-nen purag-e lag-o. Alen min-et poso nap iri perak nde, Mbal Pem Nagawan-nen-e abuwa kaso-o.

EPESUS 6:5

Ndegel unpugwi nap wa-e. Nggweyak ma yu me-n kit-nen ndegel unpugwi nagawan nagawan-nen yidnak yidnak nak kwarogolar-e, kinndi kwiye min konowak lele min-et kwarogolat wolmer-o. Kerisut ndegel ibili nggal-et kinndi mot mor-et ndegel onpogolat wolmer-o.

KOLOSE 3:22

Ap ndegel unpugwi nap wa-e. Yi kwatlik ndi kwatlik kwarogolar-e, nggweyak ma nap kit-nen idnak nagawan nagawan-nen yidnak yidnak nak kwarogolar-e, it-nen yik keneyarok woragola, nam nariya kentembel wanuwakluk nak-nen kwarurak pug-o. Are, ndemeret kit kinndi-net kwarogolat wolmer-o.

1 TESALONIKA 2:3

Nde, nit-nen nggomo kindili wene yu-ge kabak tak unpugwi wene na lak, ninndi mberen pem yak kindili na lak, kenmberam lokluk-nen yili na lag-o.

1 TESALONIKA 2:8

Nir-e kit kenabuwa mondok kwarat iri-nen ndowaga Mbal Pem Nagawan-nen idnak aid wene nak tembesa wok kundurag-e lag-o. Are, nit nenpe min-et wok kundurag-e te-t woraige-o. Nir-e kit kenabuwa kwarat kagolat woraige-o.

1 TIMOTIUS 4:13

An lobok yigit lak worala, nememet worasolar-e, kar-e Mbal Pem Nagawan Engga-ge ap inmbiri bem wonat ondosolat, ap nggomo ondosolat, mul ondosolat wolmin-o.

1 TIMOTIUS 5:17

It ogore yidnak nab-e yabu konak nak wanogolat-nen: ”Iri nggal, yu nggal kwarurag-o” yugwi nap ala-ge, mondok kwara mberen pem tak pidnak nggal-et unnu kek tak purag-o. Nde, nggok lombog-e it aid wene yogolat, ap mul ondogolat inligak mbusu irit kwat unpurag-o.

1 TIMOTIUS 6:18

”Kir-e konak nak kwarogolat, konak nak kwarurak nggok tak pogolat, kinndi konak woragolat, kenarengge ap tembet ondogolat wolmer-o” luk nggomo indi-o.

IBERANI 10:25

Ap erep-nen kwatli nggal, nit-nen-e lambuksa ndok wurugwi tarem ndok wururak pem perari perari rak purak pug-o. Are, Nagawan Indo lobok yurak tarem-e panggo yidnak me, nit na nit-net mondok kwara ninndi eyak wat kerak mbogolat wolmog-o.

IBERANI 13:17

Kit kennggendumu enne kolobokluk mendak inpidnak nap-nen yidnak wene wanogolat, it-nen yidnak yidnak nak kwarogolat wolmer-o. It-nen-e kit kinndi yik karok woragolar-e, perari yili bug-o. Iri yili iri-ge ap inndi yik karok woraidnak pem Mbal Pem Nagawan-nen an nebem wene mbaruwa-o peragoluk-nen yik keneyarok worali-o. Nde, kit-nen nde it-nen yidnak yidnak kwarogola-ge, it eneyabu-ge enalen min-et wanogolat wolma-o. Nde, kit-nen iri kwarigit lak yogola-ge, it inndi puru min-et eneyabu wanuwa iri-nen kit kenmanggim-e ebe worak mende ma-ge lag-o.

IBERANI 13:22

Nanggamirak wa-e. An-e kit kinndi eyak worosolat mbarigi wene yu-ge kenalen min-et wanobokluk-nen yak kundusu-o. Nde, engga mbarigi yu-ge mor-e lak, we poro-t mbal kindigi-o.

IBERANI 13:24

Kit kennggendumu enne kolobokluk mendak inpidnak nap oboksa min Mbal Pem Nagawan ilirak oboksa min-e ”Wiwa-o yak kindiga-o” luk yak undugup na-e. Kennggamirak Italia woragwi nap-nen na wa yak kindiga-o.

IBERANI 13:7

Nandug-et Mbal Pem Nagawan-nen yidnak wene yak kunduwakluk mendak inpidnak nab-e yebet yebet tak wolmer-o. It unluk woragolat-nen kwarugwi enpage iri-ge kwara lombot puruk, it-nen inndi angin tubu yidnak iri-ge iri nggal-et kit-nen na kinndi angin tubu yogolat wolmer-o.