NEMIA 8:10 - Nanduk Ngget Tul Pidnak Wene

¹⁰ Yawo-ge kenma lombok mberer-o. Mburugupndik kenalen pem-et yi nonggolat, nunggwi mende nonggolat kwarer-o. Nde, kit-nen-e nunggwi mende min anggut engen amburu min-e it ininggem lak nggal worali ereba mak ender-o. Yawo-ge Nagawan Indo nak erembel wanurak tarem me, kir-e kinndi puru yurak pug-o. Nagawan Indo-nen wok kundusu enalen kagwi elem iri-nen kenmawi rak kunpuwa-o” luk yiga-o.

NEMIA 8:10 ပူးပေါင်းရင်းမြစ်များ

1 NAGAWAN NAGAWAN-NEN KWARIDNAK WENE 8:66

Iri kwarogolat tuju bem nggok sakolat worarug-e, delapan pem tak pogolar-e ap ereba na-ge Salomo-nen-e ”Kenma mberer-o” yak endamu, mbiriga-o. Mborogolar-e, it oboksa-nen Salomo kek tak puruk, inndi alen min-et enma lombok mbiriga-o. Salomo kek tak piga iri-ge Nagawan Indo-nen at imbiringgat oboksa at ndegel oboso nap Ndaut min Isarael nap min wok indidnak pem-nen kwariga-o.

NEMIA 8:11

Lewi nap-nen ap ereba na inndi wi yaga enne lak tak pogolat-nen yogolar-e: ”Yawo yu-ge Nagawan Indo erembel wanurak tarem me, kir-e kinndi puru pera yurak pug-o” luk wene iri nag-et yak ondogolat woraiga-o.

NEMIA 8:12

Yogoloma-ge, ap ereba na oboksa enmarak mborogolar-e, yi min nunggwi mende min enalen pem-et nonggolat, ereb-e ap erep ereba na mak indiga-o. Nde, it enalen yiga iri-ge it-nen imiri mbarak pidnak wene wonarogola kuliga iri na it-nen kwara yebet kaidnak pem-net yiga-o.

NDAWI ENGGA 89:17

Kat-nen-e kwiye worak kwasa ombol nggwe rak nonposo-o. Kat-nen konak kwat nonposo bem-net nir-e ombol nggwe rak nonposo-o.

AID WENE YOSO NAP 11:2

Korol erem wolosolar-e, nin me nan me ereba me posolat, kwarat tu nin tak nan tak kore yosolat kamawi kundurag-o. Nde, ap-nen-e enpem mboso mende enpem mbigit lak ma-net awo ma lid lud tak puruk woragwi-o.

AID WENE YOSO NAP 3:13

Nit oboksa-nen nunggwi mende nonggolat, yi nonggolat, nit-nen yabu wanogolat ninligak mbidnak iri na norak iri-ge ob-o. Yanem ereba-ge Mbal Pem Nagawan-nen we wok ondoso mende-net yusu-o.

AID WENE YOSO NAP 9:7

Iri bem-e amere kenalen pem nonggolat, kijik kijak pem-et anggut amburu nonggolat kwarurag-o. Ereba kwarugwi ereba na-ge Mbal Pem Nagawan-nen-e umud neneyaso bug-o. Are, op kwatli-o luk nenperaso-o.

YESAYA 49:5

An-e Isarael nap iri na Nagawan Indo eram inpil lobok yuwakluk, ndok wat unpuwakluk, an-e ndet yigit lak ma-net Nagawan Indo-nen at ndegel oboso nap tak nebamu-o. Nagawan Indo-nen-e an-e kek tak nobosolat, ar-e an namawi elem-nen yusu-o.

YESAYA 61:10

Yosoloma, Yerusalem-nen yosolar-e: ”An-e Nagawan Indo ebem nalin nalen kasu-o. Mbal Pem Nagawan ebem an nindi-ge kijik kijak wurusu-o. Kwe min ap min wok kerak mburak pem inmirik unmuruk konak nak yitli iri na nggal Nagawan Indo-nen an yirik nobosolar-e, inmiri yoso sum min ombol nggwe yugwi sum min yirik nibij-o.

YOEL 2:23

Sion woragwi nap wa-e. Nagawan Indo Kenmbal Pem Nagawan nak-nen konak nak kwat kunpusu pem-e kenalin kenalen yogolat, kijik kijak worogolat kenne lek ker-o! Iri kwat konposolar-e, engga lera mboso tarem-e talme kwarat wok kondoso-o. Nde, toro wok yoso tarem-e talme nggilara mberak pil mbuwaso-o. O sumbat woraruk, engga ambarok posolat tarem na, talme nanduk mboso ereba na nggal-et pil mboso-o.

LUKAS 11:41

Alat nde, kit kinidmbe min kin piring min arem worasu irit ap insilobulo lak nab-e wok undurag-o. Nde, iri nggal kwarogola-ge, kit kenambigir-e marak irit kwat ma-o.

2 KORINTUS 8:2

Andi bandi mende kwarat it enpem mbosolat, inndi kwarat ngarij-et nde, it enalin enalen mondok kwarat kagolar-e, it insilobulo lag-et nde, silobulo-ge kasaba inndi lubug-et pogolat woraiga-o.

PILIPI 3:4

An-nen perak nde iri mende bem nindi mbung mbung tak wolmomtag-o ob-o. Ap erep-nen nde enaboro-nen kwarugwi mende bem nde inndi mbung mbung tak woragola nggal-e, an perak terak minik nindi mbung mbung tak woraleb-o.

NAM PARA WENE 11:10

Nggweyak ma woragwi nap-nen-e Mbal Pem Nagawan-nen yidnak wene yugwi nap mberen iri wat yidnak pem enalin enalen kujwa-o. Mbal Pem Nagawan ene lomboksa yugwi nap mberen iri-nen-e nggweyak ma woragwi nap oboksa enpem andi bandi mende pidnak me, ir-e kijik kijak worogolar-e, it insilobulo-ge we wok kerak mbuwa-o.

1 SEMUEL 25:8

Kat-nen mbi it nak yak indi-o. It-nen na ndemerer-o luk yuwa irir-o. Nde, iri bem-e an nowosirak lobok yili iri-ge kona kama unpurag-o. Ir-e nggok sakwi tarem lobok yili me, ndegel kubugwi nap yeba min Ndaut an min nenmanggim-e kat-nen purak perasolar-e, keram woraso mende mbi nenmanggim pi-o. An-e kanggam-net yusu-o” luk wene wosa enpem pamu-o.