NDAWI ENGGA 27:6 - Nanduk Ngget Tul Pidnak Wene

⁶ Nde, yawo-ge an nuwim nap neralu ponok ponok worali urugwe nggwe rak unpuruk, ombol nggwe-t yusu-o. An-e nalin nalen min-et kat kama iri me wa yak korosolat kat kamanggim wam wosa kan pusu-o. An-e Nagawan Indo erembel wanosolat ndawi yimin-o.

NDAWI ENGGA 27:6 ပူးပေါင်းရင်းမြစ်များ

NDAK WIRIDNAK WENE 40:13

Kenan nene lug-e, nagawan iri-nen o kubu me yu-nen wirik kubuwa-o. Nde, kat-nen kwarigen iri-ge amberam tak puruk, tuguruk wok kubuwama, kondolma nggugundik, nanduk-nen wanoso nggal nagawan yi kenang tosolat woragun-o.

NDAK WIRIDNAK WENE 40:20

Nde, kenan nene luk, nagawan ndesa mbidnak tarem wok yosola, at eyabu wanugwi nap ap yok nggok ereba na enmanggim yi mende ndi mende sagosolar-e, yi kenang toso nap iri na min oroti worak toso nap iri na min o kubu me-nen wesera at eyabu wanugwi nap ap yok nggok ereba na inmbiri bem waruk endam mburuwakluk, wene wirik pamu,

2 SEMUEL 22:1

Nde, Saul min wim nap erep min ininggem-nen Nagawan Indo-nen imiri yidnak pem-e Ndaut-nen-e Nagawan Indo erembel wanosolat ndawi yu ngarij-o:

2 SEMUEL 22:49

Ap-nen nuwim nap ininggem-nen nimiri yusu-o. Nagawan Indo wa-e. Kat-nen nuwim nab-e urugwe nggwe rak unpuruk ombol nggwe rak nubusu-o. Kat-nen-e ap insilepma worak ininggem-nen kura nubusu-o.

2 SEMUEL 7:9

An-e pempa kat kimin woralat, kat nusu sa-ge pempa kimin-et mburusu-o. Kat-nen kuwim nap inmin wim mbarosola-ge, an net ndegera lak tak inpigi-o. Ap nggok nggweyak ma yu me-nen enanggu onpok mburusu nggal an-net kanggu kobok worak tak pimin-o.

2 NAGAWAN NAGAWAN-NEN KWARIDNAK WENE 25:27

Yewura nap nagawan Yoyakin iri na kamatluk mbirigarik, ombol nggwe olengen tiga pulu tuju (37) iri arem waneya duabelas tanggal dua pulu tuju (27) iri bem-e ap Ewil-Merondak irit Mbabilonia iri me nagawan men yij-o. Olengen iri arem-net Nagawan Yoyakin iri na-ge at-nen-e abuwa karuk, o kubu me-nen lerak keya bij-o.

NDAWI ENGGA 107:22

It-nen at wiwa-o yak togolar-e, at amanggim pugwi mende pogolat, at-nen kwat onposo-ge enalen kagolat-nen yugwi ndawi bem wigarurag-e ndak-net yusu-o.

NDAWI ENGGA 110:7

Nagawan-nen-e yi-ge tulabiyem-nen nujwa-o. Nuruk, amawi yosolug-e, ar-et ombol nggwe yuwa-o.

NDAWI ENGGA 119:108

Nagawan Indo wa-e. An-nen wiwa-o yak korosolat tepan yusu yu-ge kwara kuli-o. Kat-nen idnak imiri mbarak pidnak wene-ge kwara mul niri-o.

NDAWI ENGGA 138:5

It-nen-e kat-nen kwiye worak kwaroso min kat-nen mondok kek tak woraso min-e ndawi bem tak puruk yuwa-o.

NDAWI ENGGA 47:1

Yi nap ndi nap oboksa wa-e. Kenalen-nen kininggi mok lel ker-o! Mbal Pem Nagawan erembel wanogolat kenalen-nen kenne nggoksa lek ker-o!

NDAWI ENGGA 95:1

Nagawan Indo ebem ndawi wanuwog-o! Nenalen pem nit Ninmiri Yoso Nap erembel wanogolat ndawi yuwog-o!

YEREMIA 31:7

Nagawan Indo-nen yosolar-e: ”Nilirak Isarael nap inkijak kenalen-nen ndawi yer-o. It enlem iri-ge ap enlem ereb-e teberak unpuruk, it enlem yu-ge mondok ija-net yusu-o. At erembel wanogolat-nen ndawi yogolar-e: ’Nagawan Indo-nen-e at ilirak Isarael nap inmiri yosolat, it minggirik erep keya inpidnak worali oboksa inmiri yij-o’ luk ndawi yurag-o.

SAKARIA 9:9

Sion woragwi nap wa-e. Kenalin kenalen mber-o! Yerusalem woragwi nap wa-e. Kenalen-nen kinni kenne mber-o! Yik ker-o! Kit-nen idnak nagawan-e ombol nggwe luk lobok yusu-o! At iri-ge mot mot nak kwaroso nagawan inmiri yoso elem waruk lobok yusu-o. Alat nde, ar-e indi teberak pem-et wok yosolar-e, kelerai awo mendaso mbi ebem koreluk lobok yusu-o.

IBERANI 13:15

Iri bem-e Mbal Pem Nagawan amanggim wam wosa pidnak nggal pogolar-e, Yesus ebem-nen nir-e pempa Mbal Pem Nagawan erembel wanogolat wolmog-o. Nde, at amanggim pogolar-e, nit nenemnde nggwe-nen at unu luk, at unu pempa kek tak pogolat wolmog-o.

1 PETERUS 2:5

Kir-e kunlug-et woragwi kerep-nen yili me, kit wok kunpuruk Mbal Pem nagawan uwi indi amanggim o iri wat momtak kerep iri kinndi mer-o. Iri nggal kwarogolar-e, kir-e tepan ombo marak kwat luk, Yesus Kerisut ebem kir-e Mbal Pem Nagawan amanggim wam wosa kan pogola-ge, Mbal Pem Nagawan-nen-e kit-nen pidnak mende bem-e alen kujwa-o.

NAM PARA WENE 15:3

It-nen ndawi yogolar-e, Mbal Pem Nagawan ndegel oboso nap Musa min Lomba Wam Marik na min endawi yogolar-e, yu nggal yiga-o: ”Amawi Mondok Kwarat worak Nagawan Indo Mbal Pem Nagawan wa-e. Kat-nen kwaroso-ge nggulok, kwiye worak-net yusu-o. Ap enlem oboksa ennggendumu Nagawan wa-e. Kat-nen kwaroso-ge ndemeret mot mot nak kwaroso-o.

NAM PARA WENE 5:9

It-nen ndawi ngget misik yogolar-e: ”Kar-e mondok kirikma, wat yigen iri bem-nen-e Mbal Pem Nagawan amanggim ap enlem ndomok oboksa min ap enne ndomok oboksa min ab-e ap oboksa min ap enlem oboksa min onnggo pigen pem-e kat-nen-e engga na wanuruk, lop nok tak pugwi mende, iri na punggururag-e kabam-net yusu-o.