NDAWI ENGGA 19:8 - Nanduk Ngget Tul Pidnak Wene

⁸ Nagawan Indo indi-n pidnak wene iri-ge ndemeret ap inndi alen tak poso-nen yusu-o. Nagawan Indo-nen ”Irit kwarurag-o” luk pidnak wene iri-ge inndi ngarak posola, nam-et yenggerak poso-nen yusu-o.

NDAWI ENGGA 19:8 ပူးပေါင်းရင်းမြစ်များ

NDAK WIRIDNAK WENE 26:5

Nde, Abarakam-nen an-nen yidnak yidnak kwarosolat, an-nen ’Iri nggal kwarurag-o’ yidnak wene ereba na oboksa puksa tena woralat, an-nen ebem pidnak wene ereba na oboksa kwarosolat kwarid iri na bem imbiringgat tak kibimin-o” yak tij-o.

NEMIA 8:12

Yogoloma-ge, ap ereba na oboksa enmarak mborogolar-e, yi min nunggwi mende min enalen pem-et nonggolat, ereb-e ap erep ereba na mak indiga-o. Nde, it enalen yiga iri-ge it-nen imiri mbarak pidnak wene wonarogola kuliga iri na it-nen kwara yebet kaidnak pem-net yiga-o.

NEMIA 9:13

Mbal pem-nen kar-e Ndobo Sinai bem mbuwaigen-o. Mbuwasolar-e, kar-e kambik kilirak inmin wene mbarigen-o. Kat-nen-e ndemeret imiri mbarak pidnak wene mondok lud tak konag-et kwarogolat wolmomtak wene irit wok indigen-o.

NDAWI ENGGA 105:45

Iri kwarid iri-ge at ilirak-nen at-nen imiri mbarak pidnak wene wok indid iri na-nen yidnak yidnag-et kwarogolat, at-nen ”Irit kwarurag-o” luk enpem pidnak ereba na ndak ndag-et kwarogolat wolmakluk-nen kwarij-o. Nagawan Indo nak erembel wanurag-o!

NDAWI ENGGA 111:7

Nagawan Indo iri-ge at-nen kwaroso-ge tugup lak mot mot nak kwaroso-nen yusu-o. At-nen ”Iri nggal kwarurag-o” yidnak wene-ge ap-nen ebem inndi wat tak puruk woragwi-nen yusu-o.

NDAWI ENGGA 119:105

Kat-nen yidnak wene iri-ge an nuwok purak amanggim tal min an mbururak tula yaya rak purak tal min-nen yusu-o.

NDAWI ENGGA 119:121

An-e ndemeret mot mor-et kwarosolat worakmu-o. An-e nuwim nap ininggem kegera nuburak pug-o.

NDAWI ENGGA 119:128

Iri bem-e an-e kat-nen mirik nibidnak oboksa ndak ndag-et kwarosolat woramin-o. Nde, lugud tak kwaril mburugwi iri-ge an-e nisili-o.

NDAWI ENGGA 119:130

Kat-nen mul ondoso wene ereba nde ”Iri nggal-o” luk, engen wanogola-ge, ap inndi yaya rak posolat, enaru buk nap na yebet kudtak inndi tenggerak posolat yusu-o.

NDAWI ENGGA 119:143

An-e anggun panggun arem worasolat, nindi kabak yusu-t nde, kat-nen pidnak wene iri-nen-e an nindi alen tak posolat worasu-o.

NDAWI ENGGA 40:8

’Mbal Pem Nagawan wa-e. Kat kindi-n pidnak kwarurak iri-ge an-e nindingen-o. Kat-nen idnak imiri mbarak pidnak wene-ge an narem pukmu-o’ luk mbarak worasu-o” yigi-o.

NDAWI ENGGA 93:5

Nagawan Indo wa-e. Kat-nen idnak imiri mbarak pidnak wene-ge tugup lak pem woraso-nen yusu-o. Kat kuwi iri-ge pem irit marak nak woraso-nen yusu-o.

MBIRIGA WENE 18:16

Nde, it-nen nde yuk puk mburug e, an-nen onowene iri mbenasa lak tak purak pem nak lobok yogolat, it-nen kwaruwakluk Mbal Pem Nagawan-nen enpem pidnak wene min Mbal Pem Nagawan-nen imiri mbarak pidnak wene min yak undurak pem nak lobok yugwi-o” yak tij-o.

NGGOMO WENE 30:5

Mbal Pem Nagawan-e ’Irit kwat kinpimin-o’ luk urul pidnak iri-ge oboksa ndak ndag-et kwaroso-o. Kwiye-nen at eram mbitli nap oboksa undumno nggal kwat yusu-o.

NGGOMO WENE 6:23

Keid kiya-nen nggomo kiridnak wene iri-ge kat kamanggim tal-nen yusu-o. It-nen nggomo korogolat met kibidnak ereba na-nen-e kat konag-et wolmomtak mirik kubusu-o.

YESAYA 64:5

Kar-e ap mot mot nak kwarugwi nap min kat kindi-nen pidnak ndak ndak kwat tenak worali nap min wok onposo-o. Kat kisilepma-ge nenpem posolat woraso-t nde, nir-e meya kwat tenak woraige-o. Nir-e nanduk ereba-net lugud tak nak kwarugwi-o.

YEREMIA 15:16

Kat-nen an nimin wene yosola-ge, kat-nen yusu wene oboksa-ge an-e kuligi-o. Nagawan Indo, Mbal Pem Nagawan Mondok Kamawi Worak wa-e. An-e kat karengge-nen yusu-o. Iri bem-e, kat-nen yidnak wene-nen nalen tak posolat, nindi yek tak posolat kwarij-o.

YESKIEL 36:27

Nde, an nindi-ge kit kinndi arem nggilara nggorak pimin-o. Kit woragolar-e, an-nen imiri mbarak pidnak wene ereba na ndak ndag-et kwarogolat, an-nen kenpem pidnak ereba na-nen yidnak yidnak kwarogolat worabokluk an-nen-e yik keneyarok woramin-o.

OROMA 3:20

Imiri mbarak pidnak wene-nen yidnak yidnak nak kwarogolat woraidnak nab-e ap misiger-o luk tet Mbal Pem Nagawan erengen pem-e lud tak nak unpuwa bug-o. Alat nde, imiri mbarak pidnak wene iri-nen-e nggweyak ma nab-e meya yugwi-nen yusu-o luk mirik nonposo-nen yusu-o.

OROMA 7:22

Nde, an nindi arem-nen-e Mbal Pem Nagawan-nen idnak imiri mbarak pidnak wene wanurag-e nindingen-et nde,

OROMA 7:7

Iri ala-ge, nir-e no nde yul-o? Imiri mbarak pidnak wene iri-ge meya mende-nen yusu-o luk yul-a? Mondok lag-o! Irit nde, imiri mbarak pidnak wene lak nggal-e, an-nen-e iri-ge meya kwarusu-o luk, naru yelep pug-o. Imiri mbarak pidnak wene-nen yosolar-e: ”Ukwe ukwe yurak pug-o” luk yigit lak nggal-e, ukwe ukwe yugwi iri-ge no mende-o luk an-e naru yelep pug-o.

NGGALATIA 2:19

Nde, imiri mbarak pidnak wene bem-e an-e wat yigi-o. Mbal Pem Nagawan amanggim nak nuruk worayekluk imiri mbarak pidnak wene arem-nen wat yigi-o. An-e Kerisut imin e lang pang tak pem nindiga-o:

NGGALATIA 3:21

Iri ala-ge, imiri mbarak pidnak wene iri-nen-e urul pidnak wene na imin-e wim mbarak nggal worasu, lak? Mondok lag-o. Unluk wolmomtak elem wok nundurak imiri mbarak pidnak wene wok nindid nggal-e, imiri mbarak pidnak wene iri-nen-e Mbal Pem Nagawan imin lud tak nak nenpeleb-o.