1 YOANES 3:2 - Nanduk Ngget Tul Pidnak Wene

² Nanggamirak kenabuwa worak wa-e. Yawo-ge nir-e Mbal Pem Nagawan ilirak-nen yili-t nde, abok-nen kwat nunpurag-e nam tak pigit lak me, ngge nggal kwat mul-o? Alat nde, wene yu nak nenaru yili-o: Kerisut lobok yuwa tarem-e ar-e ndemeret ebe nenlengen kul me, at woraso nggal-et kwat mul-o.

1 YOANES 3:2 ပူးပေါင်းရင်းမြစ်များ

AYUP 19:26

An naboro-ge ud-nen abu lak tak puwa-t nde, an nde nuruk-nen-e nerengen-e Mbal Pem Nagawan kamin-er-o.

NDAWI ENGGA 16:11

Kat-nen unluk woragwi sa tula mirik nubugun-o. Kat nak-nen enalen elem kobong tak nobosolat, pem-et enalen pem woragwi elem wok nurusu-o.

MALEAKI 3:2

Alat nde, Nagawan Indo lobok yosolat, at ondomok-nen nam yuwa iri tarem-e ta-nen nggal mamak puruk wolma-o? At iri-ge kik lena labuk makluk posid tol woragoso nap-nen kan mabidnak kanduk nggal-nen yusu-o. Sum maroso kwe esabon nggal-nen yusu-o.

MATIUS 5:8

Nde, inndi marak kopkap lak worali nab-e it-nen Mbal Pem Nagawan kujwa me, enalen kali-o.

LUKAS 17:30

Ap Ambara an lobok yimin tarem-e iri nggal-et kwat ma-o.

LUKAS 20:36

It iri-ge aid nap nggal-et, mondok wat ma bug-o. It iri-ge wat yidnag-et nde, tuguruk unluk tak pidnak me, ir-e Mbal Pem Nagawan ilirak-nen yili-o.

YOANES 1:12

Alat nde, ap erep-nen-e at wok uburuk, at ebem inndi angin tubu yiga nab-e Mbal Pem Nagawan ilirak kwat momtak amawi wok indij-o.

YOANES 11:52

Nde, Yesus elem nap Yawuri nap enarig-et nak ondolma wat momtak pem-e lag-o. Are, Mbal Pem Nagawan ilirak yi wi ndi wi ndi rak inpidnak na ndok wosa misiget tak unpurak pem wat yij-o.)

YOANES 17:24

Neid wa-e. An lena wok nirigen nab-e an kek tak woraso na kujwakluk, an woramin sa it na iri me totno wolmomtak perasu-o. Nde, an-nen kek tak woraso iri-ge nggweyak yu awo ndak wirigit lak ma, kar-e an nabuwa kasolar-e, wok nirigen nar-o.

OROMA 8:16

Mbal Pem Nagawan Indi-ge nit ninndi imin kundik woralat-nen mirik nonposolar-e: ”Kir-e Mbal Pem Nagawan ilirak-net yili-o” luk yusu-o.

OROMA 8:18

Nde, an nindi-n perasolar-e, nit yawo andi bandi kali iri-ge marig-o. Nde, abok-nen mirik nunpuwa abinal iri min ndak ndag-e lag-o. Terak minik-net yusu-o.

OROMA 8:19

Ndak worak inpidnak mende oboksa-nen-e: ”Mbal Pem Nagawan ilirag-e mepme-n nam tak unpuwa-o!” luk yik karok inndi mbung mbung tak worali-o.

OROMA 8:29

Nanduk-net Mbal Pem Nagawan-nen it len inpid iri-ge at Ambara Yesus Kerisut abage nggal kwat mag-o luk obi-net lud tak pid iri bem-nen at anggamirak kwarat ennggendumu at Ambara na manggu nderak makluk len inpij-o.

1 KORINTUS 13:12

Yawo kali yu-ge papalo arem-e isisiyap nak kaidnak nggal-et kali-o. Alat nde, abok-nen-e nenpe lid pid mbul-o. Yawo-ge an-e kwara naru yusu bug-et nde, abok-nen-e Mbal Pem Nagawan-nen an aru yusu nggal, an-nen na mondok kwara naru yimin-o.

1 KORINTUS 15:49

Nir-e nggweyak pem-nen ndak wiridnak nap abage worak worali na nggal, iri nggal-et aid arem-nen lobok yidnak Nap abage nggal irit mul-o.

1 KORINTUS 2:9

Alat nde, Mbal Pem Nagawan engga mbarak pem-nen yosolar-e: ”Ap enlengen-nen kagwi buk mende min eneyanggo-nen kulugwi buk mende min ap inndi-nen peragwi buk mende min iri perak nde Mbal Pem Nagawan-nen at abuwa kagwi nap enmanggim lid lud tak pamu-o” yij-o.

2 KORINTUS 3:18

Iri ala-ge, nit oboksa sum nentare bem na wabidnak me, papalo pem kaidnak nggal Nagawan Indo abinal iri-ge nit nentare bem worasu-o. Iri ala-ge, Nagawan Indo Indi na-nen nin tak nonposolar-e, at abage nggal tak nonposola-ge, abinal iri na nggok nggok mburusu-o.

2 KORINTUS 4:17

Nde, yawo luru nenpem mbusu andi bandi mende te iri-nen-e woralik nalik momtak kek tak mende terak minik irit kwarak nunpusu-o.

NGGALATIA 3:26

Nde, kit pidsa Kerisut Yesus ebem kinndi angin tubu yigep pem-e Mbal Pem Nagawan ilirak-nen yili-o.

NGGALATIA 4:6

Kir-e ndemeret at ilirak-nen yili-o luk mirik kenpeyeklug-e, Mbal Pem Nagawan-nen at Ambara Indi-ge nit ninndi arem ibil lobok yosola, at Indi na-nen wene mbo bosolar-e: ”Neid wa-e. Neid wa-e” yusu-o.

PILIPI 3:21

At lobok yuwarig-e, nit nenpe piri yoso yu-ge nin tak nunpuruk, at ebe abinal worak iri nggal tak nunpuwa-o. Iri kwat nonposolar-e, yi mende ndi mende oboksa at urugwe nggwe rak poso amawi iri bem-net kwat nunpuwa-o.

KOLOSE 3:4

Nit nunluk worali yu-ge Kerisut-nen yusu-o. Nde, at nam yosolar-e, kit na at imin totno nam yogolar-e, at unu kek tak pidnak pem-et nam yugub-o.

IBERANI 9:28

Iri nggal-et Kerisut-e ap kwarat-nen meya yogolat woraidnak iri lak tak peyekluk, misiget pem nak at eyabi-ge Mbal Pem Nagawan amanggim pamu-o. Nde, ar-e mberen pem tak posolat abok nam marig-e, ap-nen meya yogolat woraidnak waneyekluk nam ma-ge lag-o. Are, at lobok yuwa-o luk yik karok woraidnak nap inmiri yurak pem nam ma-o.

2 PETERUS 1:4

Iri nggal kwasa Mbal Pem Nagawan-nen urul posolar-e, wene mondok ija, nggulok lombok irit urul yak nindij-o. Nde, kit-nen urul pidnak iri wanogola-ge, nggweyak ma yu-nen ukwe ukwe yugwi mende na inggem-nen wesel yogolat, Mbal Pem Nagawan abage wanili-o.

1 YOANES 2:28

Nde, nilirak wa-e. Kerisut lobok yuwa tarem-e ninggiri min lak, mondok kwiye lag-et at eram wok yuwok-nen Kerisut imin kundik irit wolmer-o.

1 YOANES 2:7

Nanggamirak kenabuwa worak wa-e. Imiri mbarak pidnak wene ngget nin mbal kundusu-ge lag-o. Are, nandug-et yak kindidnak wene, nanduk imiri mbarak pidnak wene na-t mbal kundusu-o. Wene iri-ge kit obi-net kuligep nar-o.

1 YOANES 3:1

Nineid-nen nit nenabuwa kwarat kaidnak pem ap-nen nit ninmin-e ”Mbal Pem Nagawan ilirag-o” luk yak nindili bem wir-o! Nde, nir-e ndemeret at ilirak-net yili-o. Iri bem-nen nggweyak ma nap-nen-e nit Nineid enaru buk woragwi me, nit na yenggerak ninpili bug-o.

1 YOANES 3:10

Yu-ge Mbal Pem Nagawan ilirak-nen yili-o luk yenggerak pogolat, yu-ge Sere ilirak-nen yili-o luk yenggerak pogolat yurag-e yu bem-nen yenggerak purag-o. Ta-nen nde lud tak nak kwarigit lak, anggamirak enabuwa kaso buk ala-ge, iri-ge Mbal Pem Nagawan ambara-ge lag-o luk yenggerak purag-o.

1 YOANES 3:21

Nanggamirak kenabuwa worak wa-e. Nit nondomok ninndi-nen meya-t kwarigen-o luk yak nindigit lak ala-ge, nir-e Mbal Pem Nagawan eram kwiye lag-et wok yurag-e ndak-nen yusu-o.

1 YOANES 5:1

Ta-nen nde Yesus-e Kerisut-nen yusu-o luk ebem inndi angin tubu yili nab-e Mbal Pem Nagawan ilirak-nen yili-o. Nde, Eid abuwa kasu nab-e at ambara iri na-t abuwa kasu-o.

NAM PARA WENE 2:28

O nda nda wonaru iri na min-et wok indimin-o.

NAM PARA WENE 22:4

Woragolar-e, at erare kagolat, it inmbiriwak pem-e Mbal Pem Nagawan unu mbarak wolma-o.