1 TIMOTIUS 6:13 - Nanduk Ngget Tul Pidnak Wene

¹³ Yi mende ndi mende pidsa unluk wolmomtak mende wok ondoso Mbal Pem Nagawan imbiri bem-et, Pontius Pilatus anggarem ndemeret wene kinggirid nap Kerisut Yesus imbiri bem-et, kiri keresa wene yu yak kurusu-o:

1 TIMOTIUS 6:13 ပူးပေါင်းရင်းမြစ်များ

MATIUS 27:11

Yesus na-ge gubernor Pilatus na eram ibil lobok yogola-ge, Pilatus-nen at kin wok obosolar-e: ”Kar-e Yawuri nap nagawan-nen yusu, lak?” luk kin wok obosoloma-ge, Yesus-nen wene erep nggarosolar-e: ”Kat-nen yigen irir-o” luk yij-o.

MATIUS 27:2

Iri luk, at na kere kamarak puruk, waga gubernor Pilatus na eram piga-o.

YOANES 14:6

Yak tosoloma-ge, Yesus-nen at yak tosolar-e: ”An-e Mbal Pem Nagawan enaru yugwi tula min ndemeret wene min unlug-et wolmomtak elem min-nen yusu-o. An nebem nggwe mbirigit lak-nen-e ap misiger-o luk tet an Neid eram wok momtag-e meya-o.

YOANES 19:11

Yak tosoloma-ge, Yesus-nen yosolar-e: ”Mbal Pem Nagawan-nen amawi iri kinggem pigit lak nggal-nen-e kat-nen an nebem wene mbarurag-e meya-o. Iri bem, kat meya yidnag-e marig-et nde, it an wesera kinggem nibiga nap-nen meya yidnag-e ijar-o” luk yij-o.

YOANES 5:21

Nde, an Neid-nen ap wat yidnak mendak unpuruk, unluk tak unpusu nggal, iri nggal-et Ambara an-nen na iri kwat enpeyek peraidnak nab-e unluk tak unpusu-o.

YOANES 5:26

Nde, Neig-e unlug-et wolmomtak elem-nen yusu-o. Nde, iri nggal-et Neid-nen-e Ambara an na irit unlug-et wolmomtak elem kwarak nibij-o.

YIDNAK YIDNAK WENE 17:25

At-nen-e ab-e ap pidsa unluk yaga wok ondosolat, indisep wok ondosolat, yi mende ndi mende wok ondoso me, at-nen lak mende mbi mondok lak me, ap ininggi-nen at ndegel uburag-e lag-o.

2 KORINTUS 9:13

Nde, kit-nen lubug-et tomborogolat-nen ndak tak pili mende iri bem yenggerak kunpuruk, ap kwarat-nen Mbal Pem Nagawan unu kek tak pogolar-e, kir-e mot mot nak Kerisut-nen idnak aid wene para yogolat, kinndi lubug-et it na ap pidsa na kinsilobulo tembesa wok ondogolat yili iri bem-net at unu kek tak puwa-o.

NGGALATIA 3:26

Nde, kit pidsa Kerisut Yesus ebem kinndi angin tubu yigep pem-e Mbal Pem Nagawan ilirak-nen yili-o.

TUGURUK YIDNAK WENE 32:39

Kwara yebet ker-o. Mbal pem nagawan nin mbi-ge mondok lak. Mbal Pem Nagawan-e an narig-et nak-nen yusu-o. An-e lak tak onposo min unluk tak poso min-nen yusu-o. An-e mep tak onposo min ambut tak onposo min-nen yusu-o. An-nen kwarosola-ge, ap misiger-o luk tet nebem kore yugwi buk-nen yusu-o.

1 TIMOTIUS 1:12

An-nen at eyabu yu wanuwakluk amawi wok nirid Nenagawan Indo Kerisut Yesus-nen-e at ndegel uburak pem ar-e ndak-net yusu-o luk neberaidnak pem an-nen wiwa-o yak tusu-o.

1 TIMOTIUS 1:15

Wene yu-ge ndemeret wene-o luk mondok kwara yebet kudtak wene-o: Kerisut Yesus iri-ge meya yugwi nap inmiri yekluk-nen nggweyak ma yu me lobok yamu-o. Nde, meya yugwi nap ennggendumu-nen-e mondok meya nggulok kwaroso-ge an-ner-o.

1 TIMOTIUS 2:5

Mbal Pem Nagawan-e misiget nak-nen yusu-o. Nde, Mbal Pem Nagawan min ki nap min ennggendumu ngarak koro na misiget nag-o. Iri-ge ki nap Kerisut Yesus ar-er-o.

1 TIMOTIUS 5:21

Mbal Pem Nagawan min Kerisut Yesus min lenak inpidnak aid nap min inmbiri bem-et wene yu-ge nene amawi min-et yak kurusu-o. Mirik kubusu wene yu nak kat-nen kwarosolar-e, ap misig-e kindingen tak puruk, op tak posolat, nde, ap misig-e kisili rak puruk, meya rak posolat yurak pug-o. Are, mot mot nak kwarosolat wolmin-o.

1 TIMOTIUS 6:12

Kindi angin tubu yidnak wim-e konag-et tomborosolat wolmin-o. Iri kwarosolar-e, unlug-et woralik nalik momtak elem wanugun-o. Kar-e ap kwarat inmbiri bem-et ”Nindi angin tubu yigi-o” luk kinggirigen tarem-e Mbal Pem Nagawan-nen unlug-et woralik nalik momtak elem wok kururak pem wene mbo kibid irir-o.

NAM PARA WENE 21:6

Iri yuruk, at-nen tuguruk yosolar-e: ”Abu ndak yij-o. Nde, an-e Tel Koroso min Woroksiyem min-nen yusu-o. An-e Nanduk-net Woraso, Abok-nen na irit Woramin Nagawan Indo-nen yusu-o. Yi nere kagwi nab-e an-nen we onggo lag-et mak ondosolar-e, unlug-et woragwi yi ulusu na kenangga mak indimin-o.

NAM PARA WENE 22:1

Iri luk, aid nap iri na-net mirik nobosolar-e, unlug-et wolmomtak yi erengen miri papalo erare nggal igip kip worak irit mirik nibij-o. Nde, yi iri na urusu-ge Mbal Pem Nagawan min Lomba Wam Marik min-nen koreyak woragwi ondoro na arem-nen kenangga mborosolar-e,

NAM PARA WENE 3:14

”Laorikia woragwi lambuk tak inpidnak nap-nen idnak aid nap amanggim-e yu nggal mbari-o: Nde, wene yu-ge mot mot lud tak nak konggoroso nap, Mbal Pem Nagawan-nen ndak worak pidnak mende oboksa tel koroso Amin-nen yidnak wene-o.

1 SEMUEL 2:6

Nagawan Indo iri-ge worak onposolat, unluk tak onposolat yoso-nen yusu-o. Nagawan Indo-nen-e ab-e wat luk ndok wiril mburugwi sa inpil ngguruk, at-nen iri me-n lesa inpil luwaso-o.