1 TIMOTIUS 3:16 - Nanduk Ngget Tul Pidnak Wene

¹⁶ Nit-nen Mbal Pem Nagawan erembel wanugwi kura bidnak wene iri-ge ndemeret nggok lombok-nen yusu-o: ”At ondomok-net ki nap enpage nggal luk, nam yij-o. At lud tak nak kwaroso iri-ge Konak Indi-nen nam tak pij-o. Aid nap inmbiri bem nam yij-o. At owene-ge Mbal Pem Nagawan enaru buk nap ennggendumu yiga-o. Nggweyak ma yu me-nen inndi-ge at ebem angin tubu yiga-o. Abinal pem lek karuk lagaij-o.”

1 TIMOTIUS 3:16 ပူးပေါင်းရင်းမြစ်များ

YESAYA 7:14

Yawo-ge Nagawan Indo ondomok-nen kit-nen yenggerak purak mirik Konposolar-e: kwe ndugum abila misik-nen liap misik ndaguruk, unu-ge Imanuel yaruwa-o.

YESAYA 9:6

Nit nenmanggim liap misik ndesa mbij-o. Ambara misik wok nindij-o. Ar-e nit tena nunpuruk woraso nap kwat ma-o. Nde, at unu yogolar-e: ”Nggomo Ondoso Nap Indi Nggat Nggat Worak”, ”Amawi Worak Mbal Pem Nagawan”, ”Nineid Pem Woraso”, ”Lambuk tak Onposo Nagawan” luk yuwa-o.

MIKA 5:2

Iri kwarak me, Nagawan Indo-nen-e at ilirag-e keya nak unpuwama, it unuwim nap-nen tebel unpuruk irit worakmu, amawi worak nap iri na ija kwat mag-o luk lenak pidnak iri na-nen-e amawi worak nap iri na ndet ubuwama, at elem nap mbo inpidnak sa worali ereba na-ge it enlem ereba na inmin tuguruk misiget tak unpuwa-o.

MATIUS 1:23

”Ap-nen aboro mbarugwi buk kwe ndugum-nen abila luk, la li ap mbi ndaguwa-o. Nde, la iri unu yarogolar-e, Imanuwel-o luk yaruwa-o.” (Nde, Iberani wene bem Imanuwel yiga iri-ge ”Mbal Pem Nagawan nit ninmin worasu-o” yarogolar-o.)

MATIUS 13:11

Yogolikma-ge, at-nen wene erep nggarosolar-e: ”Kit perak nde Mbal Pem Nagawan-nen tenagaidnak wi kura wene iri kenaru momtak we wok ondoso mende wok kindij-et nde, ir-e wok indigit lag-o.

MATIUS 28:2

Kil mbiriganggal-e, aid arem-nen Nagawan Indo-nen idnak aid nap na mbuwasola-ge, mimo ereya-t o lele kwarat yij-o. Aid nap na lobok yarig-e, kerep na lembera waburuk, iri bem-et koreyak woragaij-o.

MATIUS 3:16

Nde, Yesus na yi ma obosoloma, yi ma-nen pilaksa men yosola, ereya na-net mbal ngak yosoloma, Yesus erengen lik kagaidnggal-e, Mbal Pem Nagawan Indi-ge towe nggwende nggal yebaluk at ebem mbuwasola kagaij-o.

MATIUS 4:11

Nde, iri yak turuk worasoma-ge, Sere na-ge at keya buruk mborosola-ge, aid nap lobok yogolar-e, at yongga wiriga-o.]

MARAKUS 1:13

Nde, Sere-nen at indi nggarosolar-e, karu me ap lak ma iri me empat pulu nene yij-o. At iri me worasolar-e, eyak wirik eyak worak mende enggendumu worasola, aid nap-nen-e at ndegel obogolat woraiga-o.

MARAKUS 16:19

Nde, Nagawan Indo Yesus-nen it na wene iri na yak ondosolug-e, aid arem konok turuk lasolar-e, Mbal Pem Nagawan inggi kigit ambigit nggwe kore yij-o.

MARAKUS 16:5

Karug-e, yapma pidnak sa na nggwiganggal-e, ap sugwe mbi sum loro mot yirik, kigit ambigit nggwe koreyak worasoma karug-e, wendet yiga-o.

LUKAS 2:32

At iri-nen-e kat keram lobok yuwakluk, enlem nin nap untula yaya rak posolat kat kelem nap Isarael nap unnu kek tak puwa nap-nen yusu-o” luk yij-o.

LUKAS 20:44

Iri ala-ge, Ndaud na-nen Kerisut imin-e: ’Kar-e an-nen idnak Nagawan Indo-nen yusu-o’ luk yid ala-ge, Kerisut iri na-ge ngge rak puruk-nen Ndaud ambara-o luk yurag-o?” luk yij-o.

LUKAS 22:43

[Iri yosola-ge, aid nap misik aid arem-nen mbuwarik, at amawi rak pij-o.

LUKAS 24:4

Iri kagoluk, it inndi kabak yogolat, mendak worakmu-ge, ereya na-net unsum abinal worak nap mberen it entalu mendak woragola, eneyaiga-o.

LUKAS 24:51

Imbiringgat tak onposolat ereya na-net it na keya unpuruk, aid arem lek karuk lagaij-o.

YOANES 1:14

Nde, Wene iri na-ge ki nap enaboro worak luk, nit nennggendumu yu me woragaij-o. Nit ninmin worala, at kek tak irit kaige-o. At kek tak woraso iri-ge Eid Mbal Pem Nagawan ambara misiget nderak irit wok tidnag-o. At ebem-net nir-e Mbal Pem Nagawan min nit nunpud kaso min iri-ge kaige-o.

YOANES 13:3

Yesus na Eid-nen yi mende ndi mende at inggem pidnak na aru, nde, Mbal Pem Nagawan eram-nen lobok yidnak me, tuguruk ijok lem Mbal Pem Nagawan eram-et mbururak na aru woraidnak me,

YOANES 15:26

Nde, an Neid eram-nen Yongga Kundurak Nap na ibil mbuwamin-o. At iri-ge Konak Indi ndemeret Mbal Pem Nagawan Mirik Konposo irir-o. Nde, at lobok yuwarig-e, at-nen an nowene kenggel kondosolat wolma-o.

YOANES 16:28

An Neid eram-nen lobok yigirig-e, nggweyak ma yu me ngguwagi-o. Yawo nggweyak ma yu keya buruk, tuguruk Neid eram mbirimin-o” luk yij-o.

YOANES 17:5

Neid wa-e! Nggweyak yu ndak wirigit lak ma-nen kat kimin woralat an nunu kek tak woraso iri na bem yawo-nen kat kinmbiri bem an nunu kek tak pi-o.

YOANES 20:12

sum loro yirik aid nap mberen-e Yesus orogwak woraidnak sa koreyak woragolar-e, misig-e at anggulwak woraidnak sa koreyak, misig-e at ijok woraidnak sa koreyak woragola, eneyagaij-o.

YOANES 6:62

Nde, kit-nen Ap Ambara an-e nanduk woraso sa lasola karug-e, no nde kwarugub-o?

YIDNAK YIDNAK WENE 1:19

Iri kwaridnak wene na-ge it Yerusalem woragwi nap pidsa-nen kuluruk yigarig-e, nggweyak iri na it enne bem unu yarogolar-e, Akal ndama irit yiga-o. Iri yogolar-e, Eyabi Nggweyag-o.

YIDNAK YIDNAK WENE 10:34

Yosoloma, Peterus na tel korosolat-nen yosolar-e: ”Ndemeret, Mbal Pem Nagawan-e ap entare mbenaroso bug-o luk naru yigi-o.

YIDNAK YIDNAK WENE 14:27

Iri na me wok lug-e, lambuk tak inpidnak nap na ndok worak unpuruk, Mbal Pem Nagawan-nen it inmin kwaridnak mende pidsa-t kenggera yak ondogolat, Mbal Pem Nagawan-nen enlem nin nap inndi angin tubu yurak tu kuwarak pidnak wene na yak ondogolat yiga-o.

YIDNAK YIDNAK WENE 20:28

Iri bem-e, kit na kit-net yik karok woragolat, Konak Indi-nen lomba wam ndok worak pidsa iri yik eneyarok wolmakluk mendak kinpidnak me, Mbal Pem Nagawan-nen at ambik Ambara eyabi bem-nen winde yidnak lambuk tak inpidnak nap iri na kit-nen-e lomba wam yik karok woragwi nap kwasa yik eneyarok wolmer-o.

OROMA 10:12

Nde, Yawuri nab-e arik nggal, enlem nin nap na arik nggal-e lak me, ap pidsa innggiri wuruwa bug-o. Mbal Pem Nagawan misiget iri-ge ap pidsa-nen idnak Nagawan Indo-nen yusu-o. Ap pidsa-nen at ebem nggi yogola-ge, imbiringgat mende kwarat nggilara wok ondoso-o.

OROMA 10:18

Alat nde, ”Ir-e wene kuligit lak yiga, lak?” luk an-nen kin waneyeg-o. Lag-o. Kuliga irir-o. Engga mbarak pem-nen yosolar-e: ”It enne-ge yi wi ndi wi wigak yij-o. Nde, it-nen yidnak wene-ge ap lak kuri wok yij-o” luk yij-o.

OROMA 16:25

Mbal Pem Nagawan erembel wanuwog-o! At-nen-e kit kinndi angin tubu yidnak pem tugup lak tak kunpurag-e ndak-nen yusu-o. Iri kwarusu iri-ge, an-nen yak kindidnak aid wene, Yesus Kerisut owene iri-ge, obi-net kura woraidnak wene iri yawo nam tak pusu wene na bem-nen irit kwarusu-o.

OROMA 16:26

Nde, yawo-nen-e pem-et woraso Mbal Pem Nagawan-nen-e ”iri nggal mag-o” yidnak pem yi nap ndi nap oboksa-nen enaru luk inndi angin tubu yogolat, at-nen yidnak yidnak nak kwarogolat makluk-ge, Mbal Pem Nagawan ene lomboksa yugwi nap-nen mbaridnak engga bem-nen-e kura yidnak wene iri-ge nam tak pili-o.

OROMA 3:4

Mondok lag-o! Ap oboksa ennesiget yugwi-t nde, Mbal Pem Nagawan-e mondok ndemeret wene nak yoso-o. Mbal Pem Nagawan engga mbarak pem-nen yosolar-e: ”Kat-nen wene yosola-ge, lud tak wene nak yij-o luk yuwag-o. Nde, kat kebem wene mbarogola-ge, kar-et ombol pem yugun-o” luk mbarij-o.

OROMA 8:3

Nde, ki nap enpage ndeyak me, imiri mbarak pidnak wene-nen kwarurag-e meya agaid iri-ge Mbal Pem Nagawan-net kwarij-o. Kwarosolar-e, meya kwarugwi elem lak tak puwakluk, at ambik Ambara ibil lobok yosolar-e, meya kwarugwi nap enaboro worak irit ibil lobok yid iri-nen-e meya kwarugwi elem ki nap enarem worasu iri na urugwe nggwe rak pij-o.

OROMA 9:5

Isarael nap na-ge na nenlawingga-nen wigarak-net yili-o. Kerisut abage nggweyak ma nap en-page worak iri-ge it Isarael nap-nen wigarak-net yusu-o. Nde, yi mende ndi mende oboksa ombol pem kek tak woraso Mbal Pem Nagawan na-ge unu kek tak woralik nalik irit wolmag-o. Amen.

1 KORINTUS 15:47

Nanduk woraso Aram iri-ge nggweyak pem-nen ndak worak me, nggweyak ma nab-er-o. Alat nde, imbirik lobok yid Aram iri-ge aid arem-nen mbuwagaij-o.

1 KORINTUS 2:7

Alat nde, Mbal Pem Nagawan indi tenggerak elem kura bidnak kura elem iri-ge Mbal Pem Nagawan-nen o yu ndak wirigit lak ma-nen nit kek tak nenpeyekluk, lud tak pidnak wene iri na yak kindili-o.

2 KORINTUS 1:19

Nde, Mbal Pem Nagawan Ambara Yesus Kerisut na owene kit kennggendumu-ge Silwanus-nen na, Timotius-nen na, an-nen na yak kindi-ge owene iri-ge ”Ob-o, Lag-o” yoso-nen yusu-ge lag-o. Are, at ebem-e ”Ob-o” iri nak worasu-o.

NGGALATIA 2:8

Nde, Yawuri nap enmanggim Peterus-e wirik ibidnak nap kwat momtak amawi wok tid, at Mbal Pem Nagawan iri na-net an na enlem nin nap enmanggim wirik nibidnak nap kwat momtak amawi wok nirij-o.

NGGALATIA 4:4

Alat nde, iri kwarurak tarem-e ndak yosola-ge, Mbal Pem Nagawan-nen-e at ambik ambara ibil lobok yosola, at ambara na-ge ki kwami-nen ndet ebamu-ge, imiri mbarak pidnak wene urugwe nggwe worala-ge,

EPESUS 1:9

Mbal Pem Nagawan-nen at indi-n pidnak kura wene nit mirik nonposolar-e, ar-e Kerisut ebem-nen ”Irit timin-o” luk nanduk-net lud tak pidnak kura wene iri-ge nam tak puruk mirik ninpij-o.

EPESUS 6:19

Nanongga an nemende tu kuwarak posola, kura bidnak aid wene na-ge an-nen kwiye lag-et nam tak peyek-nen an namanggim na tepan yogolat wolmer-o.

KOLOSE 1:23

Nde, mbigija-ge kit-nen kinndi angin tubu yidnak pem mondok tugup lak woragolar-e, aid wene kuligep na bem kinndi mbung mbung tak woraidnak na amawisa-t wanogolat woragup na-e. Aid wene iri-ge nggweyak ma woragwi nap oboksa yak indidnak wene-nen yusu-o. Nde, Paulus an-e aid wene iri ndegel oboso nap-nen yusu-o.

KOLOSE 1:27

Mbal Pem Nagawan-nen ”Irit timin-o” luk yidnag-e yu nggal-o. At-nen idnak kura wene, kek tak pidnak wene iri-ge, ap enlem oboksa ennggendumu-nen nam tak purag-o luk yusu-o. Nde, kura wene iri-ge yu-o: Kerisut kit kenarem worala-ge, Mbal Pem Nagawan unu kek tak pidnak iri-ge totno-t wanul-o luk kinndi mbung mbung tak wolmomtag-o.

KOLOSE 1:6

Nde, kit kendam wok yid aid wene iri-ge iri nggal-et nggweyak ma yu me yi wi ndi wi wigak yosolar-e, ebe kwat yusu-o. Mbal Pem Nagawan-nen we wok ondoso elem obok na kulurug-e, ndemeret kenaru yigep kuri-nen yawo tarem-e kit kennggendumu-nen na irit aid wene wigak yusu-o.

KOLOSE 2:2

Iri yusu iri-ge, it inndi yanggo luk, it na it-nen nabuwa kabuwa woragolar-e, it inndi-n kwara yebet kagola-ge, Mbal Pem Nagawan-nen idnak kura wene enaru makluk iri yusu-o. Nde, kura wene iri-ge Kerisut at-net yusu-o.

2 TESALONIKA 1:10

Iri kwaruwa tarem-e Nagawan Indo-ge at winde nap oboksa ennggenggerak-nen at erembel wanogolat, inndi angin tubu yidnak nap oboksa-nen at wi langgu mbal obogolat yuwa Tarem-e nit-nen yak kindidnak wene wanigep pem-e, kit na it ennggendum iri me-t woragub-o.

2 TESALONIKA 2:7

Nde, meya nak kwarugwi mende iri-ge yawo na eyabu teberebe wanusu-t nde, at puk tak oboso na wabosola-ge,

1 TIMOTIUS 3:9

It iri-ge it-nen yebet kagwi inndi mbek tak pem-net Mbal Pem Nagawan-nen nam tak pidnak inndi angin tubu yugwi wene iri-ge kwara tena wolmomtak nap mag-o.

IBERANI 1:3

At Ambara iri-ge Mbal Pem Nagawan kektak woraso abinal-net yusu-o. Ambara iri-ge Mbal Pem Nagawan abage ndak worak-net yusu-o. At ene amawi bem-nen yi mende ndi mende oboksa yogo buruk worasu-o. At iri-nen-e ap-nen meya yogolat woraidnak oboksa marak purug-e, aid arem woraso Amawi worak Mbal Pem Nagawan na inggi kigit nggwe kore yij-o.

IBERANI 12:2

Nenlengen-e Yesus ebem-et kere kererak wolmog-o. Nde, nit ninndi at ebem angin tubu yul kuri-nen woroksiyem kuri Yesus-nen nak yongga nunduwa-o. Yesus na-ge e lang pang tak pem wat yosolar-e, abok-nen nalen kamin-er-o peraruk-nen e lang pang tak pem wat yogolat-nen ininggiri kagwi na kagit lak wat yij-o. Watlug-e, Mbal Pem Nagawan-nen koreyak woraso sa iri na inggi kigit ambigit nggwe yawo na koreyak worasu-o.

IBERANI 7:7

Wene yu-ge lugud tak purak puk wene-o. Ap kek tak iri-net ap teberak imbiringgat tak unpugwi-o.

IBERANI 8:1

Nit-nen yu yili wene yu ebe-ge yu-o: Nit nentepan ombo nggulok iri nggal kwarak iri-ge Mbal Pem Nagawan Mondok Kek tak aid arem woraso-nen koreyak woraso sa inggi kigit ambigit nggwe koreyak worasu-o.

1 PETERUS 1:12

Nde, Mbal Pem Nagawan-nen at ene lomboksa yugwi nap yak indid iri-ge, it ondomok enmanggim yak indigit lag-o, Are, kit kenmanggim-et yak indij-o. Kit yawo kwara kulili Aid Wene iri-ge aid wene yugwi nap-nen-e aid arem-nen mbuwaidnak Konak Indi na amawi bem-nen mul kindiga-o Nde, wene iri-ge aid nap-nen na enaru momtag-e ukwe worag-et worali-o.

1 PETERUS 1:20

Kerisut iri na-ge o ndak wirigit lak ma-net Mbal Pem Nagawan-nen lenak ebamu-o. Nde, woroksiyem yawo tarem-nen-e kit kenmanggim nam tak pid irir-o.

1 PETERUS 1:21

At ebem nak-nen Mbal Pem Nagawan ebem kit kinndi angin tubu yili-o. Mbal Pem Nagawan-nen-e at iri na wat yidnak nap ennggendumu-nen uruk tak posolat, kek tak obosolat yij-o. Iri bem-e, Mbal Pem Nagawan ebem nak kinndi angin tubu yogolat, at ebem nak kinndi mbung mbung tak woragolat yili-o.

1 PETERUS 3:18

Nde, Kerisut na irit, ap-nen meya yidnak pem mondok misik tarem-et ap pidsa enmanggim wat yij-o. Lud tak nak kwaroso nab-e lud tak nak kwarugwi buk nap enmanggim wat yosolar-e, Mbal Pem Nagawan eram lit nunpuruk mbereyekluk wat yamu-o. Nde, ki nap enpage worak iri na wiriga-t nde, indi irit uruk tak pij-o.

1 PETERUS 3:22

Yesus Kerisut iri-ge aid arem lagarik, yawo-ge Mbal Pem Nagawan inggi kigit nggwe koreyak woralar-e, aid nap min aid arem pemerinta min amawi worak mende pidsa-ge at nak-nen tena worasu-o.

1 YOANES 1:2

Urug-et woraso iri-ge ap-nen kujwakluk nam tak posola-ge, nit-nen kaige-o. Iri bem-e, at owene iri yak kondogolat, Eid imin woraso pem-et urug-et woralik nalik wolmomtak elem nit ninmbiri bem nam tak pid iri na kenggel kondogolat yili-o.

1 YOANES 3:5

Nde, Kerisut lobok yid iri-ge ap-nen meya yidnak korak peyekluk lobok yij-o luk kenaru nar-o. Nde, ar-e mondok meya mbi kwaroso bug-o.

1 YOANES 3:8

Nde, Sere na-ge nanduk nanduk-net meya nak kwat tenak woraso me, meya nak kwat tenak woragwi nab-e Sere ilirak-net yili-o. Nde, Sere-nen kwaroso iri na lak tak peyekluk Mbal Pem Nagawan Ambara na nggweyak ma yu me lobok yij-o.

NAM PARA WENE 17:5

Nde, kwe na imbiriwak pem-e unu kura misik mbarak woragaij-o. Nde, unu kura iri-ge: ”Mbabel nggulok, terak ye unpugwi kwami oboksa min nggweyak ma yu me-nen mbilaro ngin mende kwarugwi min iniya-o” luk mbarag-o.

NAM PARA WENE 17:7

Wi yosola-ge, aid nap iri na-nen an yak norosolar-e: ”Kar-e noluk-nen wi yusu-o? Kwe iri-nen idnak kura wene min ebem koreyak worasu ndakngge isilepma worak iri-ge anggul-e tuju, anggul ambo-ge sepulu iri-nen idnak wene min yak kirimin-o.

NAM PARA WENE 7:9

Iri luk, yik kaginggal-e, ap kwarat ndok worak, wanat unpurak mondok meya irit eneyagi-o. It iri na-ge ap enlem oboksa min ap enlem ndomok oboksa min ab-e ap oboksa min ap enne oboksa min ndok worak ereba na-ge nagawan koreyak woraso ondoro na min Lomba Wam Marik na min urugwe nggwe mendak woragolar-e, unsum loro yutluk, mbari angga ininggem tena woraiga-o.