1 KORINTUS 13:13 - Nanduk Ngget Tul Pidnak Wene

¹³ Nde, yawo-nen-e kenan yu worasu-o: Inndi angin tubu yugwi min inndi mbung mbung tak woragwi min ap enabuwa kagwi min worasu-t nde, ija lombog-e ap enabuwa kagwi irir-o.

1 KORINTUS 13:13 ပူးပေါင်းရင်းမြစ်များ

NDAWI ENGGA 146:5

”An yongga noroso-nen yusu-o” luk Yakup Embal Pem Nagawan iri na winde luk woralat, Nagawan Indo at Embal Pem Nagawan ebem indi wat tak puruk worasu nab-e mondok alen kasolat wolmag-o.

NDAWI ENGGA 42:11

Noluk-nen an-e nindi abi kalok yosolat, yane wat tenak worasu-o? An-e Mbal Pem Nagawan ebem nindi mbung mbung tak woralat, an-e Nembal Pem Nagawan, nimiri yoso nap iri na wiwa-o yak tosolat woramin-o.

NDAWI ENGGA 43:5

Noluk-nen an-e nindi abi kalok yosolat yane wat tenak worasu-o? An-e Mbal Pem Nagawan ebem nindi mbung mbung tak woralat, an-e Nembal Pem Nagawan, nimiri yoso nap iri na wiwa-o yak tosolat woramin-o.

LUKAS 10:27

Yosoloma-ge, ap iri-nen yosolar-e: ” ’Nagawan Indo Kenmbal Pem Nagawan iri abuwa kagolar-e, kinndi oboksa min kenpe oboksa min kenmawi oboksa min kinndi nggat nggat oboksa min-net at abuwa kagolat wolmer-o’ lug-e, ’Kat kambik kabuwa kasu nggal-et kimin woragwi nap enabuwa ki-o’ yidnak nde kaso-o” luk yij-o.

LUKAS 22:32

Alat nde, Simon wa-e. Kat kindi angin tubu yigen iri-ge tugup lak woranokluk, an-e kat kamanggim tepan yigi-o. Nde, kar-e tuguruk an neram lobok yugundig-e, kat kanggamirak na inndi eyak wurugun na-e” luk yak tij-o.

OROMA 15:13

Ap inndi ebem mbung mbung tak wolmomtak elem-e Mbal Pem Nagawan-nen yusu-o. Kit kinndi-ge at ebem angin tubu yidnak me, at-nen-e enalin enalen kagwi elem min lambuksa woragwi elem min kobong tak kunpuwag-o. Iri ala, Konak Indi amawi bem-e kit kwara Mbal Pem Nagawan ebem kinndi mbung mbung tak worabokluk kobong tak kunpuwag-o.

1 KORINTUS 14:1

Iri bem-e, ap enabuwa kagwi iri-ge muk ker-o. Konak Indi-nen tembet ondoso mende irit wanurak pem kit na kit-net kenmawi kondogolar-et nde, nggok lombog-e Mbal Pem Nagawan-nen yidnak wene lomboksa yurak iri wanurak kenmawi konder-o.

1 KORINTUS 16:14

Yi kwatlik ndi kwatlik kwarogolar-e, ap enabuwa min-et kwarer-o.

1 KORINTUS 3:14

Nde, ta-nen nde o paro na bem wiridnag-e kan ninggit lak, tugup lag-et wolma bem-e at iri-ge onggo wanuwa-o.

1 KORINTUS 8:1

Nde, yawo-ge kugiwak amanggim pidnak nunggwi mende wene yimin-o. ”Nit pidsa ninndi worag-o” yugwi iri-ge nir-e nenaru-o. Iri nggal yogolar-e, ap enambik-nen kek yili-o. Alat nde, ap enabuwa kagwi elem iri-nen-e inndi tugup lak tak onposo-o.

1 KORINTUS 8:3

Alat nde, ta-nen Mbal Pem Nagawan abuwa kasu nab-e, Mbal Pem Nagawan-nen at na aru yusu-o.

2 KORINTUS 5:10

Lag-e lag-o. Nit oboksa-ge Kerisut-nen ap enpem wene mbareyekluk kore yurak sa iri me wok yul-o. Iri me-nen-e ap enariktak-nen unluk woragolat-nen kwarogolat woraidnak na onggo wanogolar-e, konak nak kwaridnak ala na, meya kwaridnak ala na, onggo-ge ndak ndag-et wanuwa-o.

2 KORINTUS 5:15

Ar-e ap oboksa enmanggim wat yid iri-ge, unluk worali nab-e it ondomok enmanggim wolma-o luk, ar-e it enmanggim wat luk, uruk tak pid nap iri na amanggim-et wolmakluk-nen wat yij-o.

NGGALATIA 5:6

Nde, nir-e Kerisut Yesus ebem woragolar-e, niniye ambasap wabidnak ala na, ambasap wabigit lak ala na, iri-nen ebe momtak mende-ge lag-o. Nde, inndi angin tubu yidnak pem-nen ap enabuwa kagwi iri nak nggok-nen yusu-o.

PILIPI 1:9

An-nen kenmanggim tepan yoso-ge yu nggal kwarobokluk-nen yoso-o: Kit-nen ap enabuwa kagwi min kenaru yugwi min yebet kagwi mende pidsa min iri-ge irit tit, irit tit kwarat mag-o luk yoso-o.

KOLOSE 1:27

Mbal Pem Nagawan-nen ”Irit timin-o” luk yidnag-e yu nggal-o. At-nen idnak kura wene, kek tak pidnak wene iri-ge, ap enlem oboksa ennggendumu-nen nam tak purag-o luk yusu-o. Nde, kura wene iri-ge yu-o: Kerisut kit kenarem worala-ge, Mbal Pem Nagawan unu kek tak pidnak iri-ge totno-t wanul-o luk kinndi mbung mbung tak wolmomtag-o.

KOLOSE 1:5

Kit kenmanggim aid arem lid lud tak pidnak mende iri bem kinndi mbung mbung tak worasu-o. Nde, iri wene-ge kir-e nanduk-net ndemeret wene aid wene iri na bem-nen kuligeb-o.

KOLOSE 3:14

Nde, mondok nggulok nanduk tak pidnag-e ap enabuwa kagwi elem-net yusu-o. Ap enabuwa kagwi elem-nen-e yi mende ndi mende lambena iminep mbarak poso-nen yusu-o.

1 TESALONIKA 1:3

Nineid Mbal Pem Nagawan imbiri bem nit-nen yebet keneyagolar-e, kit kinndi angin tubu yidnak pem-nen kwarogolat woragwi nde, ap enabuwa kagolat-nen yabu kenmawi min-et wanugwi nde, Nenagawan Indo Yesus Kerisut ebem kinndi mbung mbung tak pigeb-e mondok tugup lak worali nde, iri mende yebet yebet tak worali-o.

1 TESALONIKA 5:8

Alat nde, nir-e lengge imin kwin yidnak nap me, ninndi min-et wolmog-o. Nit-nen yorogolar-e, ninndi angin tubu yidnak min ap enabuwa kagwi elem min-e tagun nggal yorogolat, nenanggul ndimno nggal-e ninmiri yurak ninndi ebem mbung mbung tak woragwi iri na yuruwog-o.

1 TIMOTIUS 1:5

It nggomo undugun iri-ge it-nen ap enabuwa kagolar-e, enarem marak pem-net kagolat, yebet kagwi inndi yek tak pem-net kagolat, inndi angin tubu yidnak mondok mot mot pem-net kagolat makluk-nen nggomo ondugun-o.

2 TIMOTIUS 1:7

Nde, Mbal Pem Nagawan-nen-e kwiye yurak indi wok nundusu-ge lag-o. Are, Konak Indi-nen-e nenmawi rak posolat, ap enabuwa kagwi rak nonposolat, nondomok mamak puruk wolmomtak elem wok nondosolat, yusu-o.

IBERANI 10:35

Iri bem-e, kit kinndi kabak yili-ge meyog-o. Nde, kinndi angin tubu luk woragup pem-e onggo mondok nggulok wanugup nar-o.

IBERANI 10:39

Nde, nir-e ninndi angin tubu yidnak keya bidnak pem lak tak nunpurak nab-e lag-o. Are, nit ninndi angin tubu yidnak pem ninmiri yidnak nap-nen yili-o.

IBERANI 6:11

Kit kondomok tak-nen kenmawi kondogolat iri worakmu worok tak posolat-nen kit-nen ebem kinndi mbung mbung tak puruk woragwi na mondok wanurak iri-ge mondok nindingen-o.

IBERANI 6:19

Nit ninndi ebem mbung mbung tak pige wene iri-nen-e e koma tugup lak tak poso posid nggal nit ninndi-ge pem tugup lak tak poso-o. Ninndi ebem mbung mbung tak pige wene iri-nen-e o mondok marak Mbal Pem Nagawan woraso sa iri na me sum kuri worak pidnak iri na kwidsa nggwij-o.

1 PETERUS 1:21

At ebem nak-nen Mbal Pem Nagawan ebem kit kinndi angin tubu yili-o. Mbal Pem Nagawan-nen-e at iri na wat yidnak nap ennggendumu-nen uruk tak posolat, kek tak obosolat yij-o. Iri bem-e, Mbal Pem Nagawan ebem nak kinndi angin tubu yogolat, at ebem nak kinndi mbung mbung tak woragolat yili-o.

1 YOANES 2:10

Nde, at anggam abuwa kaso nab-e yaya arem worasu me, at arem-e ap enare purak mende mbi worasu bug-o.

1 YOANES 2:14

Nilirak wa-e. Kir-e Nineid Mbal Pem Nagawan kenaru yigep pem engga yu mbal kundusu-o. Neidtak wa-e. Tel kuridnak kuri-net woraso Wene na kenaru yigep pem engga yu mbal kundusu-o. Kit ap sugwe wa-e. Kir-e kenmawi worak, Mbal Pem Nagawan-nen yidnak wene na kit kenarem worasolat, Meya Kwaroso Nap na urugwe nggwe rak pogolat yigep pem engga yu mbal kundusu-o.

1 YOANES 2:24

Iri bem-e, nandug-et kuligep wene na-ge kwara parugu wolmer-o. Nde, nandug-et kuligep wene iri na kit kenarem puksa parugu woragola-ge, kir-e pempa Ambara min Eid min inmin kundik woragub-o.

1 YOANES 3:3

Iri kwat mul-o luk, iri bem indi mbung mbung tak worasu nab-e Kerisut na mbek tag-et woraso nggal, ap iri na at na at-net mbek tag-et wolmomtag-o.

1 YOANES 3:9

Mbal Pem Nagawan ambara kwat yidnak nab-e at arem-e Mbal Pem Nagawan abage-t worasu me, meya kwat tenak worasu bug-o. Nde, Mbal Pem Nagawan iri-ge at Eid me, at-nen-e meya kwat tenak wolmomtag-e meya-o.