1 KORINTUS 1:18 - Nanduk Ngget Tul Pidnak Wene

¹⁸ Kerisut e lang pang tak pem wiridnak wene na-ge it lak momtak tula mbitli nap-nen-e wid-nen yugwi wene nggal tak pili-t nde, nit ninmiri yurak tula mbitli nap-nen-e wene iri-ge Mbal Pem Nagawan amawi kwat yusu-o.

1 KORINTUS 1:18 ပူးပေါင်းရင်းမြစ်များ

YIDNAK YIDNAK WENE 13:41

’Kit pusurugwi nap wa-e. Kinndi yebet ker-o. Wir-o luk, lak mer-o. Kit woragola tarem-nen an-nen kwarimin iri-ge ap-nen yak kendelep nggal-e, wene na bem kinndi angin tubu yelep pug-o’ ” yij-o.

YIDNAK YIDNAK WENE 17:18

Nde, ap nggomo undugwi nap ereb-e Epikuros nap min Stoa nap min-e Paulus imin wene onggo onggo yogolat-nen it erep-nen imin yogolar-e: ”Indi-ge mbirigit lag-et wene yoso yu-ge no wene yusu-o?” luk yiga-o. Nde, at-nen Yesus owene min at uruk yidnak wene min yak ondosola, it erep-nen yogolar-e: ”Ap yu-ge ap sal unkugi owene yoso-o” luk yiga-o.

YIDNAK YIDNAK WENE 17:32

Nde, it-nen-e wat yidnak nap uruk tak pidnak wene na kulurug-e, ap ereb-e nggweyel ibiga-t nde, it erep-nen yogolar-e: ”Wene yu-ge tuguruk kuluwok-nen misik tarem na yurag-o” luk yiga-o.

YIDNAK YIDNAK WENE 2:47

Mbal Pem Nagawan erembel wanogolat kwarogola-ge, ap pidsa-nen it inndingen tak inpiga-o. Iri ala-ge, pelin na pelin na Nagawan Indo-nen-e inmiri yidnak nab-e it inmin nambenak onposolat woragaij-o.

OROMA 1:16

Aid wene iri-ge Mbal Pem Nagawan-nen idnak amawi me, ebem inndi angin tubu yidnak nap oboksa inmiri yoso-o. Nandug-er-e Yawuri nap, imbirig-e, enlem nin nap na inmiri yoso ala karuk, an-e aid wene na bem-e ninnggiri mondok kasu bug-o.

1 KORINTUS 1:21

Mbal Pem Nagawan indi lid tak elem pem me, ap inndi lid tak elem iri na bem-nen at enaru momtag-e meya-o. Are, nit-nen yili wene, wid wene nggal tak pili yu bem inndi angin tubu yili nap iri perak nde Mbal Pem Nagawan-nen inmiri yurak peragaij-o.

1 KORINTUS 15:2

Kit-nen nde aid wene na puksa tena woragola-ge, an-nen yak kindigi aid wene iri-net kinmiri yuwa-o. Nde, aid wene na bem kwara kinndi angin tubu yigit lak ala-ge, ebe kwat ma bug-o.

1 KORINTUS 2:14

Alat nde, Konak Indi wanigit lak nap-nen-e Mbal Pem Nagawan Indi-nen we wok ondoso mende wanurag-e meya-o. We wok ondoso mende-ge Konak Indi bem nak-nen enaru yugwi me, at-nen-e wid-nen yugwi nggal kwarak pidnak pem-e at ondomok indi bem-nen aru momtag-e meya-o.

1 KORINTUS 2:2

An nindi-nen perasolar-e, kit kennggendumu woralar-e, nin wene nan wene pidsa keya buruk, Yesus Kerisut min at e lang pang tak pem wiridnak wene min nak tena woramin-o luk irit peragi-o.

1 KORINTUS 3:19

Nggweyak ma nap inndi tenggerak elem yili na-ge Mbal Pem Nagawan erengen pem-e wid-nen yugwi nggal-nen yusu-o. Mbal Pem Nagawan engga mbarak pem-nen yosolar-e: ”Nagawan Indo-nen-e ap indi nggat nggat worak na ngonok tak obosolar-e, at ondomok indi nggat nggat iri na-net ngonok tak ubusu-o” luk,

1 KORINTUS 4:10

Kerisut ebem-e nir-e wid alat nde, kir-e Kerisut ebem-e kinndi tenggerak worali-o! Nir-e ndeyag-et nde, kir-e kenmawi kwarar-o! Nir-e mbilaro ngin worali-t nde, kir-e kunnu kek tak irit worali-o!

2 KORINTUS 10:4

Nit wim tumburuwokluk nensan wanili iri-ge, nggweyak ma nap-nen wim pugwi san nggal-e lag-o. Are, kerep pak ndamoroso san-e Mbal Pem Nagawan amawi-net yusu-o.

2 KORINTUS 4:3

Nde, nit-nen yak indili aid wene iri-ge lumurak worala-ge, it lak yurak nap enambigir-e lumurak worasu-o.

1 TESALONIKA 1:5

Nde, nit-nen-e aid wene kit kendam waruk lobok yige iri-ge, we nenne nak-nen yak kindigit lag-o. Are, Konak Indi amawi bem-nen na ”Yu-ge ndemeret wene-net yusu-o” luk, mondok nenaru yidnak pem-nen na yak kindige nar-o. Nde, kit kenmanggim ala, nir-e kit kennggendumu woragolat-nen yabu wanige na-ge kenaru nar-o.

2 TESALONIKA 2:10

meya nak kwarugwi mende bem lak tak unpurak nap onmbol pem lasolat ma-o. Nde, it lak tak unpuwa iri-ge, it-nen-e it inmiri yurak ndemeret wene iri na insili rak puruk, wanigit lak yidnak pem-nen kwat unpuwa-o.

IBERANI 12:2

Nenlengen-e Yesus ebem-et kere kererak wolmog-o. Nde, nit ninndi at ebem angin tubu yul kuri-nen woroksiyem kuri Yesus-nen nak yongga nunduwa-o. Yesus na-ge e lang pang tak pem wat yosolar-e, abok-nen nalen kamin-er-o peraruk-nen e lang pang tak pem wat yogolat-nen ininggiri kagwi na kagit lak wat yij-o. Watlug-e, Mbal Pem Nagawan-nen koreyak woraso sa iri na inggi kigit ambigit nggwe yawo na koreyak worasu-o.

IBERANI 4:12

Nde, Mbal Pem Nagawan-nen yidnak wene-ge uruk nak woraso, amawi kwarat-nen yusu-o. Yalawi anggat ponok ponok worak iri-ge anggar-e te-t nde, Mbal Pem Nagawan-nen yidnak wene-ge anggar-e terak minik-net yusu-o. Wene iri-nen at enarem nggosolar-e, enaboro-nen ukwe yugwi inndi na arik lenak posolat, inndi-nen ukwe yugwi inndi na arik lenak posolat, il min enpa min lenak posolat; ap inndi-nen ukwe ukwe yugwi min ap inndi arem-nen yebet kagwi min nam tak poso abam-nen yusu-o.