ZAKHARIA 14:7 - Alkitab Singog In Mongondow Masa In Tanaa

⁷ Kon singgai tatua diá bidon in mosindip. Singgai in umuran bidon mobayag, natuabí doman kon dodai in doḷom. Táe tongábí ki Tuhan in nonotaau mongo toonu in koangoian in singgai tatua.

ZAKHARIA 14:7 ပူးပေါင်းရင်းမြစ်များ

MAZMUR 37:18

Ki Tuhan in noḷukad kon kobiagan in intau motoḷutui, kapunyaan budel monia in umuranbí mononoi.

YESAYA 11:9

Kon Sion, Buḷud Motusi i Allah, diábí in moraat andeka momoguyaat. Dunia naa in mopuḻingbí in sinotaau soaḷ ki Allah, naonda bo tubig momuḻing kon dagat.

YESAYA 24:23

Buḷan in simindip bo mata in singgai in diá bidon monindar, sin ki Tuhan Inta Totok in mokawasa in momarentabí mobaḻí datu. Sia in momarentabí kon Yerusalem, kon tudu in Buḷud in Sion, bo mopoontong in koagung-Nea kon itoi mita in umat-Nea.

YESAYA 30:26

Buḷan in monindarbí ná kobayag in mata in singgai, bo mata in singgai in mobayagdon kopitu in kobayagnea ná biasamai, naonda bo bayag in pitu nosinggai sinipun nobaḻí tosinggai. Tua komintan in mobaḻíbí kon tungkuḷ in ki Tuhan mobakut bo mongundam kon kekeb mita in umat-Nea inta ain binibilnea.

YESAYA 45:21

Pongadu in pelekaramu, poontong in buktinea mita, oo, biódon mako in mosia moyopakat moyotakin. Ki ine in nopotaau intua bo nopotaau intua nongkon dungkuḷmai? Akuoibí naa, ki Tuhan? Diábí in ilah koḻikudbí in Akuoi. Akuoibí in Allah inta moadil bo Mopoposaḷamat, diábí in ibanea mako koḻikudbí in Akuoi!

YESAYA 58:10

Ogoiaidon in kaanon kon intau inta gogoyon bo tuḷungaidon in intau mita inta dinorot. Aka moiko mogaid kon natua, dá sindip kon ḻibumumai in mobayagdon ná singgai.

YESAYA 9:7

Ki Tuhan ain nopoḷabú in hukuman kon dodatuan in Israel.

YEREMIA 30:7

Singgai motoyang ain noiangoi, singgai inta diá in poḷawangan. Kon i umat-Ku, tua in singgai inta mokoondok; táe mosia in posaḷamaton-Kubí.”

DANIEL 12:4

Bo guman in malaekat tatua bui kon inakó, “Daniel, taḷobaidon in buk tatua in tanaa, bo kompitaidon in meterai sinbá umuran moitaḷob mako modapot kon singgai tumi. Mobayong in intau in monungkuḷ monaridi kon onu inta koyogot mobaḻí. Táe diábí in mangaḻe in inta iḷongasi monia.”

HOSEA 3:5

Táe moiangoibí in wakutunea bangusa in Israel mobui kon i Tuhan Allah monia, bo kon i datu monia nongkon buí i Daud. Bo moondok in mosia poḷat mohoromat kon i Tuhan, poḷat motarima kon barakat-Nea mita.

AMOS 8:9

Moiangoibí in wakutunea baḻíon-Ku in mata in singgai tumoyop moutupa in singgai bo dunia in simindipdon kon dodai in singgaipa. Akuoi, ki Tuhan, Inta Totok in moḷantud, ain nosingog.

MATIUS 24:36

“Tongá wakutu in kobaḻían tua in diábí tobatúmai intau in nokotaau, umpakabí malaekat kon soroga yo diábí doman, umpaka ki Adí Allah yo diábí doman, tongábí ki Amá kon soroga in nonotaau.

MARKUS 13:32

“Umpaka natua, táe diábí in tobatúmai in mokotaau kon singgai ande wakutu kobaḻían tua. Malaekat mita kon soroga bo Adí in diábí doman monotaau kon tua, tongábí ki Amá in monotaau.

OUMAN IN RASUL MITA 1:7

Ki Yesus in notubag, “Diábí paraḷu kotaauanmu in sempo andeka wakutunea, sin tua in ki Amá-Kubí in monantú podudui in kawasa-Nea.

OUMAN IN RASUL MITA 15:18

inta ain nopotaau intua komintan nongkon dungkuḷpamai.”

OUMAN IN RASUL MITA 17:26

Nongkon intau tobatú pinomia-Nea in bayongan intau bo pinoutun-Nea kon dunia naa. Siabí doman tua inta nonantú nongkon pinomangkoianmai, toonu bo kon onda in motaau kobiagan in intau.

OUMAN IN RASUL MITA 17:31

Sin ain bidon sinantú-Nea in wakutu pongadilan kon bayongan intau kon dunia naa. Oaidan tatua aidan in tobatú intau inta ain piniḻí i Allah tontaní. Bo bá totu-totuu mopirisaya in bayongan intau kon soaḷ tatua, dá biniag bui i Allah in Sia nongkon kinopatoian-Nea!”

TESALONIKA 1 5:2

Sin kinotaauan bidon monimu kon singgai koangoian bui i Tuhan naonda bo singgai koangoian in mononakow kon wakutu in doḷom.

WAHYU 11:15

Bo malaekat impitunea in nogirup kon torompetnea, dá kinodongogandon in singog mita inta mongoḷangon totok nongkon soroga noguman, “Kawasa momarenta kon dunia naa, masai naa kinadaiandon i Tuhan naton, bo i Datu mopoposaḷamat inta pinodandi-Nea. Sia bidon in momarenta modapot in mononoi!”

WAHYU 14:6

Noiduduimai kon tua akuoi in nokoontong kon tobatú malaekat ibanea inta iḷumayug noḷantud kon ḷangit. Malaekat tatua in nodia kon Habar Mopia inta mononoi sin poyaputon kon intau kon dunia naa bo kon bayongan bangusa, suku bahasa bo negara.

WAHYU 21:23

Kotá tatua diá bidon paraḷu simbayagan mata in singgai ande buḷan, sin kamuliaan i Allah aindon nokosimbayag kon tua, bo ki Adí in Domba in nobaḻí togánea.

WAHYU 21:25

Tumongo singgai ngara mita tatua diábí ḻingko-ḻingkopan, sin diá bidon doḷom kon tua.

WAHYU 21:3

Bo akuoi in nokodongog kon baḷú moropot nongkon tampat pomomarentaan tatua, noguman: “Indoiai! Tanaa mako tampat pogogutunan i Allah kon yua-yuakdon in intau! Sia in mobiagdon takin i monia, bo mosia in mobaḻídon umat-Nea. Bo ki Allah in mogutundon kon sigad monia bo mobaḻídon ki Allah monia.

WAHYU 22:5

Mosia in diá bidon moparaḷu kon togá andeka bayag mata in singgai, sin diá bidon modoḷo-doḷom in kon tua, bo ki Tuhan Allahbí tontaní in monimbayag kon i monia. Bo mosia in momarentabí saḷaku datu modapot in kopaḷutannea.