YOSUA 8:29 - Alkitab Singog In Mongondow Masa In Tanaa

²⁹ Datu in kotá tatua in binambé kon oigi tobatú, bo pinomayá mako nodapot in ḷoḷabungnea. Kon dodai in mata in singgai sinumoyop, pinoki gamádon i Yosua in mayat tatua bo iḷumbú kon tayowon in ḷoḻingkop moḷoben in kotá. Onda intua tampat tatua binumbunan in batu inta mobarong totok. Batu mita tatua umuranpabí oyúon nodapot in tanaa mako.

YOSUA 8:29 ပူးပေါင်းရင်းမြစ်များ

SAMUEL 2 18:17

Onda intua mayat i Absalom binuat bo pinogonag kon bonu in parigí inta moonag kon kayuon. Parigí tatua binumbunan monia in batu nodapot in kinoḷantud. Bayongan tontara in Israel noḷagui nobui kon baḷoinea-baḷoinea.

ESTER 7:10

Natuata in nobaḻí ki Haman pinobambé kon oigi inta ain pinosindognea kon i Mordekhai. Nopaḷut mako kon tua noinggamádon in torú i datu.

MAZMUR 107:40

Ki Tuhan in nopoompá kon mongongawasa monia, bo nopotabá kon i monia nodondaḷoi kon ḷopá in kayuon inta diá in daḷannea.

MAZMUR 110:5

Ki Tuhan in kon dotá in koḷananmu, aka Sia bo tumorú yo datu mita in taḷowon-Neabí.

YOHANES 19:31

Itoi mita in Yahudi in doíbí aka mayat in intau mita inta pinopopakú kon kayu pinoyotaḻempang umuran moigantong mako kon tua umaai Singgai in Sabat, apa doman Sabat dodai intua in Singgai Moḷoben. Sin singgai inta pinopopakúan kon i Yesus tua in noiḷabú kon singgai inta mopoikoḷomai in Sabatdon tatua. Dá itoi mita i Yahudi minayádon kon i Pilatus bo nopoigum sinbá sioḷ in intau mita inta pinopopakú kon kayu pinoyotaḻempang tatua tokoputoḷandon bodongka popoponag in mayat monia nongkon kayu pinoyotaḻempang tatua.

OUMAN IN RASUL MITA 12:23

Bo kon dodaipa doman intua sinokap in malaekat i Allah in sia sin totokdon mopoompámai kon i Allah. Pangabisannea minatoi in sia bo kinaan in oḷuasi mita.

YOSUA 10:30

Ki Tuhan in nopountung domandon kon intau in Israel nongkon kotá tanaa bo datu monia. Diá tobatúmai in pinomayánea nobiag; bayongan in intau kon bonu in kotá tatua iḻimod. Inaidanmai i Yosua in datu in kotá tatua ná doman pinogogaidnea kon i datu in Yerikho.

YOSUA 10:33

Ki Horam, datu in Gezer namangoi notuḷung kon i Lakhis, táe sinaḷow doman i Yosua in sia bo tontaranea mita; diá tobatúmai in kinotaḷáan, nodait minatoi.

YOSUA 12:9

Datu mita inta sinaḷow, kobayongnea in toḷu nopuḷú bo mita; mosia tua in datu mita inta nongkon kotá tanaa: Yerikho, Ai (kon diug in Betel), Yerusalem, Hebron, Yarmut, Lakhis, Eglon, Gezer, Debir, Geder, Horma, Arad, Libna, Adulam, Makeda, Betel, Tapuah, Heper, Apek, Lasaron, Madon, Hazor, Simron-Meron, Akhsap, Taanakh, Megido, Kedes, Yokneam (kon Karmel), Dor (kon pintad) Goyim (kon Galilea) bo Tirza.

YOSUA 7:26

Nopaḷut mako kon tua binumbunandon monia in tampat tatua in batu inta mobarong totok bo dapot in tanaa oyúonpa doman intua. Tuamai in tampat tatua in sinangoianpa Ḷopá in Roriga. Dá noobotdon in torú i Tuhan.

YOSUA 8:23

koḻikudon in ki datu in Ai. Sia in dinomok bo dinia pinobayá kon tayowon i Yosua.