YOSUA 7:21 - Alkitab Singog In Mongondow Masa In Tanaa

²¹ Kon sigad in barang mita inta inagow naton, akuoi nokoontong kon jubah tobatú inta totuu mogaga, pinomia in Babilonia, bo saḷaka doman mita doyowa nokilo, bo buḷawan tobatú noiḻiu kon tobotak in kilo. Moibog totok in akuoi in barang mita tatua, dá ginamáku bo iḷobongku kon butá kon ḷoḷaiganku; saḷaka in kon ḻimonag totok.”

YOSUA 7:21 ပူးပေါင်းရင်းမြစ်များ

KINOBAḺIAN 10:10

Kon dungkuḷ dodatuannea pinangkoi nongkon Babel, Erekh, bo Akad, toḷu tatua komintan kon Babilonia.

KINOBAḺIAN 3:6

Inontong in bobay tatua kon mopia in pangkoi kayu tatua, bo bungainea koontongan in mopira doman kaanon. Sia in norai kon mopiabí totok aka sia in mobaḻí mopandoi. Manangka intua sia in nosipú kon bungai in pangkoi in kayu tatua, bodongka kinaannea, bo inogoiannea doman in ki buḷoinea, bo kinaan doman i buḷoinea ḷoḷaki.

KINOBAḺIAN 34:27

Naonda in nopaḷut pinoḻimodan tatua, ki adí mita i Yakub ibanea nogagow kon kotá tatua saḷaku toḻiu in yaat in gina monia sin ki ai-ai monia ain pinokopo oyámai monia.

KINOBAḺIAN 6:2

mahaḷuk mita i allah in nokoontong kon adí mita bobay tatua mongoḷunat. Bo mulai tonibuḷoion monia in mongodeaga mita inta koibog monia.

SAMUEL 2 11:2

Kon singgai inta moḷoḷabungdon tobatú, naonda in ki Daud nobangon nongkon pinosiugannea, nodondaḷoi in sia kon atop in komaḻig inta notondodai tatua. Nongkon tua inontongnea in bobay tobatú yogot in moinggú, moḷunat totok in bobay tatua.

DATU MITA 2 7:8

Intau opat inta pinayaki kuḻit tatua in noiyaputdon kon bingkí in pinononḷoḷaigan tatua, bo sinumuot kon ḷoḷaigan tobatú. Nongaan bo nonginum in mosia kon tua bo nogamá kon buḷawan, saḷaka takin ḷambung mita bo binayá binuni. Nopaḷut mako kon tua nobui mangoi in mosia bo sinumuot kon ḷoḷaigan ibanea, bo nogaid doman kon natua.

AYUB 31:1

Pinongin ibot akuoi in modandi mongodeaga moguod diábí bobuionku takin ibog in awak.

MAZMUR 119:37

Ḷukadai in akuoi sinbá diá momatuk kon inta diá in mangaḻenea, ogoiaidon in akuoi in kobiagan podudui in ibog-Mu.

IḶUAIAN 20:17

Dika moibog in sinitogi in intau ibanea: baḷoinea, ki buḷoinea bobay, atanea mita, bobiagonnea, keledainea, ande onuka inta nobaḻí sinitoginea.”

AMSAL 1:19

Totuu, intau inta motayak kon pakéon pongin aid inta moraat, yo nyawaneabí tontaní in toḻiunea.

AMSAL 23:31

Dikabí mopomayá mako kodondouḷugan in anggur in iko, umpaka batangannea totok in mokoangá bo koontongan mopouḻi-uḻinag kon bonu in galas bo tumuot mopira kon sigogow.

AMSAL 28:22

Intau inta motamaa moibog ḷagi mooyúon; diábí kinotaauannea kon roriga in ḷagidon moiantug kon inia.

AMSAL 4:23

Ḷukadai in ginamu kopira, sin ginamu in monantúbí kon daḷan in kobiaganmu.

YESAYA 28:15

Moiko in noguman kon moiko ain nomia kon dodandian takin popatoi bo ain nomia kon yopakat takin dunia in intau minatoi. Notantúdon kon i monimu kon bodito inta moiduduimai in diábí moiantug kon inimu, sin moiko in momaké in akaḷ monimu pogoḻingoi kon awakmu.

YESAYA 29:15

Moboditodon in intau inta moḷongasi mobuni kon tomayánea kon i Tuhan! Mogaid in mosia takin umuni-uni, bo kai monia kamai diábí tobatúmai in nokoontong andeka nonotaau kon onu inta ain inaidan monia.

HABAKUK 2:9

Kinutukdon in iko! Iko in mopooyúon in motoḷuadímu pongin kauntungan inta nouḻímu pinodoyon kon aid moḻingá, sinbá baḷoimu tontaní in moodom bo moiḷagui nongkon susa bo bodito.

LUKAS 12:15

Noiduduimai kon tua ki Yesus in noguman kon intau moantó kon tua, “Mokopopia in moiko bo umuran kiḷuka-ḷukadmai sinbá diá modunia, sin umpakabí moantó totok in kapunyaan, táe kobiagan mononoi tua in diábí sinantú in kapunyaan tatua.”

LUKAS 12:2

Diábí tobatúmai in noibuni in diá koontongan bo diá doman in tobatúmai inta binuni in diá popotaau.

EPESUS 5:3

Moiko nion umat i Allah, tuamai in aid mita inta mokotor bo inta diá patus aidan, andeka ibog inta moiḻiu dika aidan kon sigad monimu sinbá diá in dodoyonan intau mita mopotaḷá kon i monimu.

EPESUS 5:5

Torop in singogku tanaa: intau inta mokotor in oaidnea, andeka inta mogaid kon inta diá patus aidan, andeka ibog inta moiḻiu (aid natua notongkaibí in aid mosumba kon berhala ibanea), dá intau mita natua in diábí baḻíon umat inta pinarentaan i Kristus bo i Allah.

ULANGAN 7:25

Tubádon in patong mita berhala inta sinumba monia. Dika mongibog kon saḷaka ande buḷawan inta kopake-paké monia bo dika mogamá sin pakéonmu tontaní. Aka moiko ḻimimpat kon parenta tatua matoi in moiko, sin ki Tuhan Allahmu in doíbí in mokoontong kon posumbaan kon patong berhala.

KOLOSE 3:5

Tuamai Inggamáaidon in ibog mita in dunia inta umuran monuyayow kon i monimu, ná oaid inta mokotor, oaid mita inta diá patus aidan, ibog in awak, ibog mita inta moraat, bo ibog mita inta moiḻiu (sin ibog inta moiḻiu tua in notongkaibí in mosumba kon berhala).

IBRANI 13:5

Aka mobiag yo dikabí kawasaan in ibog kon doit, táe kosanangbí in momaké kon onu inta nouḻímu sin ki Allah nogumandon nanaa, “Akuoi in diábí mopomayá mako andeka monaḷámai kon inimu.”

YAKOBUS 1:15

Moiduduimai kon tua, aka ibog inta moraat tatua bo duduian, dá mobaḻídon in oaid inta diá mopia; bo aka aid diá mopia tatua bo moguyangdon, dá popatoi in bungainea.

YOSUA 7:20

“Totuu,” guman i Akhan, “Akuoi ain nogaid kon dosa kon i Tuhan, Allah in Israel. Naa in inaidanku:

YOSUA 7:22

Bo iḻimikatdon in ki Yosua nopotabá in intau minayá in ḷoḷaigan i Akhan. Bo noniata magí dá barang mita inta ilarang tatua komintan kon tua, binuni kon bonu in butá, bo saḷaka in kon ḻimonag totok.

PETRUS 2 2:15

Popisí in mosia bo doí dumudui kon onu inta noitutui, dá noiḷangkamdon in mosia. Mosia in dinumuduidon kon i Bileam ki adí Beor tungkuḷ intua. Ki Bileam naa in moibog totok tondanan sinbá mogaid kon inta moraat.