YOSUA 18:16 - Alkitab Singog In Mongondow Masa In Tanaa

¹⁶ bo dongka nosiḻig kon sipangkoion in buḷud inta noyogintayow in Ḷopá in Hinom kon popod in utuan kon Ḷopá in Repaim. Onda intua botok in sigad tatua in nopobayá ná toḷatan nongin Ḷopá in Hinom kon dotá in toḷatan kon sipangkoion mita in buḷud kon butá in Yebus, nomoḷat nopobayá ná En-Rogel,

YOSUA 18:16 ပူးပေါင်းရင်းမြစ်များ

SAMUEL 2 17:17

Kon dodai intua ki Yonatan adí i Abyatar bo ki Ahimaas adí i Zadok nogoḷatdon mako kon diug in bokaká in tubig En-Rogel, kon bingkí in kotá in Yerusalem. Mosia in diá kobaḻí tumuot kon kotá sin moondok in ontongon in intau. Ná biasamai, ata bobay tobatú mopotaau kon i monia in habar inta musti potaau kon i Datu Daud.

SAMUEL 2 5:18

Intau in Pilistin nodapot kon Ḷopá in Repaim bo iḻitúannea.

DATU MITA IMITÁNEA 1:9

Kon singgai tobatú kon tampat inta sinangoian Batu Uḷag kon diug in bokaká in tubig in En-Rogel, ki Adonia noposumba in kuruban domba, sapi koḷakian bo ki adí in sapi inta mongoḷomumu. Nogoiní in sia kon i adí mita ḷoḷaki i Datu Daud inta ibanea, bo pogawai mita in komaḻig nongkon suku in Yohuda mamangoi kon rame pobogoian kon kuruban tatua.

DATU MITA 2 23:10

Topet, inta tampat pososumbaan kon dewa kon Ḷopá in Hinom, pinonajis. Takin natua diádon in intau inta motaau moposumba in adínea mobaḻí kuruban angagon kon i Dewa Molokh.

TAWARIKH 1 14:9

Kon dodai intua intau in Pilistin noiyaputdon kon Ḷopá in Repaim bo nogagowdon kon ḷopá tatua.

TAWARIKH 2 28:3

poḷat notubá kon dupa kon Ḷopá in Hinom. Nodapot in ki adínea ḷoḷaki tontaní in pinosumbanea nobaḻí kuruban kon berhala, podudui in kabiasaan diá mopia in intau mita inta ain pinoguntun i Tuhan nongkon butá mita in Kanaan kon tungkuḷ in intau mita in Israel sinumuot kon butá tatua.

TAWARIKH 2 33:6

Ki adínea mita pinosumbanea nobaḻí kuruban payongon kon Ḷopá in Hinom. Sia in dinumudui doman nogaid kon pongonggaing, mopirisaya kon tundi mita, totaau, bo nopoigum in totundú mita kon dimukud mita. Totok in sia binaradosa kon i Tuhan dá nokopomuká kon torú i Tuhan.

YESAYA 30:33

Nongkon koḻipodpabímai ain sinadia in tampat potubáan kon i datu in Asyur. Tampat tatua modaḷom bo mooḷad, binonuan in kayu pondungú inta noyoguntuḷdon. Ki Tuhan in mopoyongkitdon intua pongin mopoirup in poginaan-Nea ná ongkag in balerang.

YEREMIA 19:11

Akuoi in mustibí moguman kon i monia kon ki Tuhan Inta Totok in mokawasa noguman nanaa, “Bangusa bo kotá tanaa in rimumudon-Kubí dá mobaḻí naonda bo kendi inta norimumud tatua inta diá bidon motaau tompiaan bui. Intau in moḷobongbí kon mayat mita monia kon Topet, sin diádon in poḷobongan ibanea.

YEREMIA 19:2

sin mayá moyotakin monia mayá in Ḷopá in Hinom mongin Bonawang Beling. Kon tua akuoi in musti mopotaau kon onu inta pinongoyow-Nea kon inakó.

YEREMIA 19:6

Tuamai, moiangoibí in wakutunea in tampat tanaa diádon tangoion Topet andeka Ḷopá in Hinom, táe Ḷopá Bidon Pororataan.

YEREMIA 32:35

Mosia in noposindog in mezbah mita kon i Baal kon Ḷopá in Hinom, bo noposumba in adí mita monia kon i Dewa Molokh. Bokaka, Akuoi in diábí nokoimontanmai in nokiaid in natua kon i monia, noidapotbí in diábí kon dodai in onda in noigonúmai kon gina-Ku kon mosia in mogaid kon inta totok in moraat natua bo mokopopisí kon intau in Yohuda baradosaan.”

YOSUA 15:63

Kotá in Yerusalem noitakin doman kon kapunyaan i Yohuda, táe intau in Yohuda in diábí mokountun kon intau mita in Yebus inta nogutun kon tua. Dapot in tanaa intau mita in Yebus nogutunpabí noyotakin in intau in Yohuda kon kotá tatua.

HAKIM MITA 1:21

Suku i Benyamin in diá nokopoguntun kon intau in Yebus nongkon kotá in Yerusalem. Tuamai intau in Yebus umuranpa doman nogutun kon tua noyotakin in intau in Benyamin.

HAKIM MITA 1:8

Intau in Yohuda nonubu kon Yerusalem, bo nogagow poḷat nonurub kon kotá tatua bo noḻimod kon intau mita inta nogutun kon tua.

HAKIM MITA 19:10

Táe intau in Lewi tatua in doí bidon mosiug bui kon tua in doḷom tua. Sia bo ki buḷoinea ibanea tatua nobuatdon, noyotakin in bobantungnea bo takin keledainea doyowa inta oyúon in ḷoḻitúan. Naonda in mata in singgai motoḷontomdon, nodapotdon in mosia kon diug in Yebus (inta Yerusalem). Bo bobantung tatua in noguman kon i tuangnea, “Tuang, koḻigai mongandupa in kita poḷat mosiugpa kon bonu in kotá in intau in Yebus tanaa.”