YOSUA 10:40 - Alkitab Singog In Mongondow Masa In Tanaa

⁴⁰ Bayongan in butá tatua pinotungkud i Yosua. Sia nonaḷow kon bayongan in datu mita inta kon buḷud, kon oyuk mita in buḷud kon dotá in pomukaan, kon sipangkoion mita in buḷud kon dotá in toyopan, bo kon ḷopá mita kon dotá in toḷatan. Diábí in tobatúmai in intau in pinomayánea mako nobiag; komintanbí iḻimod. Tua in pinoduduibí kon parenta i Tuhan, Allah in Israel.

YOSUA 10:40 ပူးပေါင်းရင်းမြစ်များ

DATU MITA IMITÁNEA 15:29

Naonda in ki Baesa nobaḻídon datu ḷagidon in sia noḻimod kon bayongan in motoḷuadí i Yerobeam. Podudui kon onu inta ain pinoguman i Tuhan pinongin mogogundoinea ki nabi Ahia nongkon Silo, dá bayongan in motoḷuadí i Yerobeam kinoḻimodan, diá tobatúmai in nokoḷagui.

NEHEMIA 9:24

Buí monia in nonaḷow kon butá in Kanaan; intau mita kon tua pinotungkud-Mu. Umat-Mu inogoian-Mu in kawasa momia kon onu in koibognea aidan kon bangusa mita in Kanaan bo kon datunea mita.

MAZMUR 9:17

Ki Tuhan in nokipogontongdon tontaní popisí in singog inta sinantú-Nea in moadil. Intau moraat noiḷosok kon aidnea tontaní.

IḶUAIAN 34:12

Dika momia kon dodandian takin intau mita kon butá inta kobayáan monimu, sin tua in mobaḻídon poyogaḷap inta mokopopisí kon kopatoianmu.

PINOGIAPAN 13:17

Naonda in pinotabá i Musa in mosia minayá, sia in nongoyow kon i monia, “Bayádon pongin utuan, mopobayá ná dotá in toḷatan kon butá in Kanaan, bo turus mopobayá ná buḷud.

ULANGAN 1:7

Tanaa kokaidon in ḷoḷaiganmu bo bayádon kon buḷud in intau Amori bo kon bayongan in butá inta kon diugneamai, tuata in Ḷopá in Yordan, butá inta notombuḷud bo inta nooyuk, butá inta kon dotá in toḷatan bo pintad in Dagat Toyuak. Bayádon ḻitúai in butá in Kanaan bo Buḷud in Libanon modapot kon ongkag moḷoben in Eprat.

ULANGAN 2:34

Kon dodai doman intua inagow naton bo irimumud in bayongan kotá, bo noḻimod kon bayongan intau inta nogutun kon tua, ḷoḷaki bobay bo adí mita. Diádon tobatúmai in sinaḻiban.

ULANGAN 7:24

Sia in moposarakanbí in datu mita monia kon inimu. Ḻimodonbí monimu in mosia, bo tangoi monia in koḻiongandon. Diábí tobatúmai in mokotahang monayow kon i monimu; mosia komintan in daitonbí monimu yopúon.

YOSUA 10:35

Kon singgai doman tatua kinoagowan monia in Eglon, bo noḻimod kon bayongan in intau kon tua ná inta inaidan monia kon Lakhis.

YOSUA 10:37

poḷat nogagow kon kotá tatua. Datunea bo bayongan in intau kon kotá tatua bo kon kotá mita ibanea inta kon diugneamai, nodaitbí iḻimod. Ki Yosua in norimumud kon bayongan in kotá tatua ná pinogogaidnea kon kotá in Eglon. Diá tobatúmai in pinomayánea mako in nobiag kon tua.

YOSUA 10:39

Kotá tatua bo datunea bo bayongan in kotá inta noyodiugmai kon tua inagow i Yosua. Bayongan in intau kon tua iḻimod. Inaidanmai i Yosua in Debir bo datunea ná pinogogaidnea kon Hebron bo Libna takin datunea.

YOSUA 11:16

Ki Yosua in nogagow kon bayongan in butá tatua – kon buḷud, kon sipangkoion in buḷud, pinomayá kon utuan ande inta kon toḷatan; bo bayongan doman butá in Gosyen, takin Ḷopá in Yordan.

YOSUA 12:8

Butá tatua in nongkon buḷud, kon sipangkoion in buḷud kon dotá in toyopan, Ḷopá in Yordan butá inta kon sipangkoion in buḷudnea, butá mita inta kon oyuk mita kon dotá in pomukaan, bo butá in padang gurun kon dotá in toḷatan. Butá mita tatua in pinogogutunandon in intau in bangusa Het, Amori, Kanaan, Peris, Hewi bo Yebus.

YOSUA 18:21

Kotá mita inta nobaḻí kapunyaan in motoḷuadí kon bonu in suku i Benyamin, kobayongnea komintan in mopuḷú bodoyowá in kotá takin ḻipú mita kon diugneamai, tuata in Yerikho, Bet-Hogla, Emek-Kezis, Bet-Araba, Zemaraim, Betel, Haawim, Para, Opra, Kepar-Haamonai, Opni, bo Geba.

YOSUA 6:17

Bayongan in kotá takin tombonunea musti daiton monimu payongon mobaḻí sosumba kon i Tuhan. Tongá ki Rahab, bobay sundaḷ takin ginaḷumnea in pomayádon mako in mobiag, sin sia in notuḷungdon kon toimata mita naton.

YOSUA 8:2

Ai bo datunea in musti aidanmu ná pinogogaidmu kon Yerikho bo datunea koḻipod. Táe tanaa in barangnea mita bo bobiagonnea in motaaudon gamáanmu mobaḻí kapunyaanmu. Posadiadon in mayá monubu kon kotá tatua taḻikokogan nongkon tumi.”

YOSUA 8:27

Bobiagon bo barang mita inta inagow kon kotá tatua, ginamá in intau mita in Israel nobaḻí kapunyaan monia, pinodudui kon ná inta pinoguman i Tuhan kon i Yosua.

YOSUA 9:24

Mosia notubag, “Pinomia nami in natua sin dinongogdon nami kon ki Tuhan Allah inta sinumba i Tuang tua ain nopotabá kon i Musa, mogogundoi-Nea tua, nobogoidon kon i Tuang in bayongan butá tanaa bo moḻimod kon bayongan in intau inta nogutun kon butá tanaa kon dodai in tai Tuang mogamádon kon butá tatua. Kami in moondokdon totok aka ḻimodon in kami, tuamai pinomia nami in tanaa mita.