YOHANES 2 1:2 - Alkitab Singog In Mongondow Masa In Tanaa

² Sin ki Allah in umurandon nogutun kon bonu in gina naton, bo Sia in umuranbí doman kotaki-takin naton.

YOHANES 2 1:2 ပူးပေါင်းရင်းမြစ်များ

YOHANES 14:16

Poigumon-Kubí kon i Amá, bo ogoian-Neabí moiko in mototuḷung ibanea, inta umuran mogutun moyotakin monimu.

YOHANES 15:7

Aka moiko bo umuran motobatú takin-Ku bo totundú-Ku in umuran popotonop mako monimu kon gina, yo poigumdon kon i Amá kon onukabí in koibog monimu; dá onu in pinoigummu tua in ogoi-Neabí.

KORINTUS 1 9:23

Tongábí bá moiyaput in Habar Mopia nongkon i Allah kon bayongan intau, dá inaidanku intua komintan, sinbá moitakin doman mokouḻí kon barakat in akuoi.

KORINTUS 2 4:5

Sin habar inta pinoyaput nami tua in deemanbí habar soaḷ oaidan nami tontaní. Táe habarbí soaḷ ki Yesus Kristus inta Tuhan; bo kami naa in tongábí simpaḷmu mita popisí in ibog i Tuhan.

KOLOSE 3:16

Umuran kon gina-gina mako in totundú mita i Kristus inta mobarakat tua, sahingga moiko in mobijaksana bo mopandoi in motundú bo mononggina kon utat mita. Dika mokoḻiong in mopodondong in Mazmur bo dondong mita rohani; podondongdon kon i Allah takin porasaan mosukur kon bonu in ginamu.

TIMOTIUS 2 1:5

Umuran kotoropanku in kopopirisayamu kon i Kristus inta totu-totuu tua naonda bo kopopirisaya i baaymu ki Lois bo ki inámu ki Eunike. Bo moyakinbí totok in akuoi kon kopopirisayamu nion ná bí doman onda bo kopopirisaya monia tua.

PETRUS 2 1:12

Tuamai tantú ponoropku intua kon i monimu, umpakabí kinotaauandon monimu, sinbá moiko in mopirisayadon totok kon totundú nongkon i Allah inta ain sinarima monimu tatua.

YOHANES 1 1:8

Aka kita in moguman kon kita in diá kon dosa, dá monguboḷbí in kita kon i naton tontaní; bo ki Allah in doí bidon mogutun kon bonu in gina naton.

YOHANES 1 2:14

Uḻe Adíku mita, akuoi in nomais kon naa kon i monimu, sin moiko in nonotaaudon kon i Amá. Pinaisku in naa kon i monimu amá mita, sin moiko in nonotaaudon kon i-Nia inta oyúondon nongkon pinomangkoianmai. Pinaisku in naa kon i monimu intau mita inta nongobagupa, sin moiko in moropot. Singog i Allah noitonop kon bonu in ginamu, bo sinaḷowdon monimu ki Inta Moraat.

YOHANES 1 2:17

Dunia naa bo bayongan tombonunea inta kinoibog in intau koyogotdon in moyoyang. Táe intau inta dinumudui kon ibog i Allah, i mobiagbí mononoi.