YOHANES 1 4:21 - Alkitab Singog In Mongondow Masa In Tanaa

²¹ Tuamai, naa in parenta inta inogoi i Kristus kon i naton: Ki ine in motabi kon i Allah yo musti motabi kon i utatnea doman.

YOHANES 1 4:21 ပူးပေါင်းရင်းမြစ်များ

IMAMAT 19:18

Dika mopotuḻí in yaat in ginamu bo dika moyaat in gina kon intau ibanea, táe kotabibí in tumpaḷa intau ná kototabimu kon awakmu tontaní. Akuoi in ki Tuhan.

MATIUS 5:43

“Aindon dinongog monimu in Pirman nanaa: kotabibí in yobayatmu bo kodoídon in saturumu.

LUKAS 10:37

Mototundú kon agama tatua in notubag, “Intau inta ain inangoian in tabi bo poḷat notuḷung kon intau tatua.” Ki Yesus in noguman, “Dá aka natua, yo bayádon bo aidai doman in natua!”

YOHANES 15:12

Naa parenta-Ku: Positabianbí in moiko, ná doman Akuoi in notabi kon i monimu.

GALATIA 5:14

Bayongan in hukum in agama sinipun kon tobatú parenta tanaa, “Kotabibí in tumpaḷa intau ná kototabimu kon awakmu tontaní.”

GALATIA 5:6

Sin aka kita bo ain notobatú takin i Kristus Yesus, yo soaḷ sunaton ande diá sunaton, diábí mobaḻí soaḷ kon i naton. Sin totok moponting in pirisayabí kon i Kristus bo tua in moniata kon tabi naton kon tumpaḷa intau.

TESALONIKA 1 4:9

Diábí bain paisonpa bui nami kon i monimu in tabi monimu kon utat mita inta tumpaḷa mopirisaya kon i Kristus. Sinundú bidon i Allah in moiko kon musti mototabian.

PETRUS 1 3:8

Naa in kasimpulannea: utat mita poramuji mobiag motobatú kon tosingogon bo porasaan. Moiko in musti umuran mositabian ná doyowa mogutat. Moiko in musti doman mosituḷungan bo mokopoompá kon dodia.

PETRUS 1 4:8

Tongá soaḷ tanaa inta totok in moponting, moiko in musti totu-totuu mositabian tobatú bo tobatú, sin aka moiko bo mositabian dá mangaḻenea kon tua moiko in moibog doman mosiampungan.

YOHANES 1 2:7

Utatku mita inta kinotabiku! Onu in pinaisku tanaa in deemanbí parenta mobagu, táe parentabí inta noonggotdon inta ain pinogumanku kon i monimu kon wakutu in moiko bagupa nopirisaya kon i Kristus, tuata in habar inta nongkon i Allah bo inta ain dinongog monimu koḻipod.

YOHANES 1 3:11

Nongkon pinomangkoianmai habar tanaa ain pinotaau kon i monimu: Kita in musti mositabian tobatú bo tobatú.

YOHANES 1 3:14

Kinotaauandon naton kon kita iḷumuaidon nongkon kawasa in popatoi, bo nomampingdon kon bonu in kawasa inta mokobiag, sin lantaran kita notabidon kon i utat mita naton. Sin ki ine in diá motabi kon i utatnea, yo sia tua in tantúpa nobiag kon bonu in kawasa in popatoi.

YOHANES 1 3:18

Adíku mita! Donaaibí in kita motabi tongá kon bibig ande tongá kon singog, táe poniatabí in tabi tatua kon oaid naton.

YOHANES 1 3:23

Naa in pinarenta-Nea kon i naton: Kita in musti mopirisaya kon i Adí-Nea, tuata in ki Yesus Kristus, bo kita in musti umuran mositabian, ná inta ain pinarenta i Kristus kon i naton.

YOHANES 1 4:11

Utat mita inta kinotabiku, aka tabi i Allah totuu moḷoben kon i naton, dá kita in mustibí doman mositabian.