YOHANES 1 3:22 - Alkitab Singog In Mongondow Masa In Tanaa

²² Bo onu in igumon naton kon i-Nia, tarimaanbí naton, sin kita in umuran dinumudui kon parenta-Nea mita bo nogaid kon onu inta mokosanang kon gina-Nea.

YOHANES 1 3:22 ပူးပေါင်းရင်းမြစ်များ

AYUB 22:26

Dá iko in motaaudon umuran mopirisaya kon i Allah, bo monotaaudon kon Sia in nobaḻí pangkoi in kopiaanmu.

MAZMUR 10:17

Tuhan, Iko in nokidongog kon sambayang in intau nobogá bo moginropot kon gina monia.

MAZMUR 34:4

Poḷantudon in ki Tuhan takinku, igai moyotakin mopomulia kon tangoi-Nea.

MAZMUR 50:15

Pokuanidon kon i-Nakó kon dodai in koantugan in bodito, Poḷuaton-Kubí in moiko, bo moiko in modayowbí kon i-Nakó.”

AMSAL 15:29

Ki Tuhan in mokidongogbí aka intau mopia mosambayang, táe Sia in doíbí mopandungmai kon intau moromú.

AMSAL 28:9

Aka iko bo diá motoindudui kon hukum i Allah, yo ki Allah in doíbí doman kon sambayangmu.

YESAYA 1:15

Aka moiko motonggó kon ḻimamu sin mosambayang, doíbí in Akuoi moindoimai. Diábí pandungon-Ku mongo kotongonu in moiko mosambayang, doíbí in Akuoi mokidongog, sin ḻimamu tatua in pinoḻimodmu kon nobayong in intau.

YEREMIA 33:3

“Pokuanidon kon i-Nakó, dá tubagan-Kubí; potaau-Kubí kon inimu in soaḷ mita inta mopia bo inta mokotongaw inta diápa kinotaauanmu.

MATIUS 17:5

Koyogotpa in ki Petrus nosingog kon tua, daḻi-daḻí noikoḷubung magí kon i monia in goḷom inta mobunod bo kinodongogan nongkon goḷom tatua in singog inta noguman, “Naadon in Adí-Ku inta kinotabi-Ku, Sia tanaa inta kinoibog-Ku, indongogaidon in Sia.”

MATIUS 21:22

Bo onu kabí in poigumon monimu kon bonu in sambayang takin mopirisaya totok, yo moiko in motarimabí kon onu inta inigummu.”

MARKUS 11:24

Manangka intua yo torop in naa: Aka moiko mosambayang bo oyúon in igumon, yo popirisayabí kon inogoibí i Allah kon inimu onu inigum monimu tua, dá tarimaanbí monimu intua.

YOHANES 14:13

Bo onukabí in poigumon monimu podoyon kon tangoi-Ku, aidan-Kubí intua kon i monimu, sinbá ki Amá in pomuliaan pongin i Adí.

YOHANES 15:10

Aka moiko umuran mogaid kon inta pinarenta-Ku, yo moiko in umuran mosatia in dumudui kon tabi-Ku, ná doman Akuoi inta umuran mosatia kon tabi i Amá-Ku sin umuran nopobayá in parenta-Nea mita.

YOHANES 15:7

Aka moiko bo umuran motobatú takin-Ku bo totundú-Ku in umuran popotonop mako monimu kon gina, yo poigumdon kon i Amá kon onukabí in koibog monimu; dá onu in pinoigummu tua in ogoi-Neabí.

YOHANES 6:29

Ki Yesus in notubag, “Tanaabí in kinoibog i Allah nongkon i monimu: Popirisayadon kon i-Nia inta pinotabá mangoi i Allah.”

YOHANES 8:29

Bo Sia inta nopotabá kon i-Nakó koyota-yotakin-Kubí, diábí dodai onda in pinomayá-Nea mako in Akuoi tontaní, sin Akuoi in umuranbí mogaid kon onu inta mokosanang kon gina-Nea.”

YOHANES 9:31

Kinotaauanbí naton kon ki Allah in diábí mokidongog kon intau mita inta binaradosa, táe tongábí mosia inta mohoromat kon i Allah, bo inta mogaid kon onu in kinoibog-Nea.

OUMAN IN RASUL MITA 17:30

Oaid mita naton inta diá mopia inta koḻipod ain bidon iḻiong i Allah, asaḷ bo tanaa mako kita bo bayongan intau kon dunia, mogogaidon in mogaid kon dosa mita.

OUMAN IN RASUL MITA 20:21

Akuoi in umuran doman noponorop kon intau mita in Yahudi bo bangusa ibanea sinbá mosia in mogogaidon in mogaid kon dosa mita monia bo mamangoi kon i Allah poḷat mopirisayadon kon i Yesus Kristus ki Tuhan naton.

PILIPI 4:18

Bayongan inta paraḷuonku inogoidon monimu kon inakó, sedang bo noiḻiudon kon tugat! Bayongan inta inogoi monimu inta pinoki dia kon i Epaproditus aindon sinarimaku. Dá tanaa mako komintandon oyúon in onu inta paraḷuku. Bayongan inta inogoi monimu kon inakó tua naonda bo kobondu in kuruban inta pinosumba kon i Allah bo inta sinarima domandon i Allah takin pia in gina.

KOLOSE 1:10

Dá moiko in mobiagdon podudui in ibog i Allah bo umuran mokosanang kon gina-Nea, sahingga kon bayongan yagi-yagi moiko in umuran mobogoi in bungai inta mopia. Bo pongotahuan monimu soaḷ ki Allah in modugang domandon.

IBRANI 13:21

Poigum mako, ki Allah inta nobaḻí pangkoi in kobiagan motompia, umuran mobogoi in bayongan inta mopia inta paraḷu pakéon monimu mogaid kon onu inta koibog i Allah. Bo poigumon doman mako takin totuḷung i Yesus Kristus, popoaidon i Allah kon i naton in onu inta kinoibog-Nea. Tantúbí dayow in ki Kristus dapot in kopaḷutannea! Amin.

YAKOBUS 1:5

Aka oyúon in kon sigad monimu in diápa totok mobijaksana; yo musti mopoigum kon i Allah, dá ogoianbí i Allah in kabijaksanaan in sia. Sin takinbí pia in gina bo tabi in ki Allah in mobogoi kon batúan in intau.

YAKOBUS 4:3

Bo umpaka ain noigum in moiko, táe diábí doman mokouḻí in moiko, sin noitaḷá in tujuan pinoigumanmu; sin onu inta inigum monimu tua in tongábí kasanangan monimu tontaní.

YAKOBUS 5:16

Tuamai moiko in musti mosi akuan kon taḷá bo mosi sambayangan, sinbá undaman in moiko. Sambayang in intau inta dinumudui kon ibog i Allah, moḷoben in kawasanea.

YOHANES 1 2:3

Aka kita bo umuran dumudui kon parenta mita i Allah, dá tua in tandanea kon kita in nonotaau kon i Allah.

YOHANES 1 5:14

Bo kita in mobaranibí in mayá kon tayowon i Allah, sin moyakinbí in kita kon indongoganbí i Allah in onu in pinoigum naton, aka inta pinoigum naton tua noyokaan kon onu inta kinoibog-Nea.