YOHANES 1 2:19 - Alkitab Singog In Mongondow Masa In Tanaa

¹⁹ Saturu mita i Kristus tua in intaubí mita inta nonaḷámaidon kon i naton naa, lantaran mosia tua in deemanbí totuu intau naton. Aka mosia intau mita naton, tantú mosia in umuranbí noyotakin naton. Natuabí sinbá motarangdon kon i naton kon mosia tua in diábí totu-totuu moibog mopirisaya kon i Tuhan moyotakin naton.

YOHANES 1 2:19 ပူးပေါင်းရင်းမြစ်များ

AYUB 17:9

Intau inta mopia bo inta diá kotaḷá, moyakindon totok kon kobobiagnea mokosanang kon i Allah.

MAZMUR 37:28

Sin ki Tuhan in motabibí kon oaid inta mopia bo moadil, intau inta motoindudui kon i-Nia in diábí bio-bióon-Nea mako in moiḷaḻe. Sia in moḷukadbí kon i monia modapot in mononoi, táe buí in intau moraat in yompatonbí.

MAZMUR 41:9

Guman monia, “Takitnea in mobogatdon totok, diábí doman inta mobangonpa bui in sia.”

MATIUS 24:24

Sin oyúon in mongaku ki Mesias bo mongaku nabi táe mosia tua intaubí mongongakaḷ, tongá mosia in mogaid doman kon tanda mita inta moḷoben bo soaḷ mita inta mokoherang sahingga in aka mobaḻí, yo mosia in mokoakaḷ doman kon intau mita inta ain piniḻí.

MARKUS 13:22

Sin ki inta deeman totu-totuu mopoposaḷamat bo ki inta deeman doman totu-totuu nabi in mamangoibí. Mosia in mogaid doman kon soaḷ mita inta diá in poḻiuan, bo soaḷ mita inta mokoherang sin ponguboḷ, bo aka oyúon in kasampatan yo mopoyaying doman kon umat mita i Allah.

LUKAS 8:13

Aka bibit inta noḷabú kon butá inta nobayong in batu, tua in ibarat intau inta nokidongog kon Pirman i Allah, bo notarima takin pia in gina, táe onu in dinongog monia tua diá noitonop kon bonu in gina monia. Mosia in tongá nopirisaya notoyong, naonda in kino angoian sobaan, mosia in diá nonahang bo nobaḷui in pirisaya monia kon i Allah.

YOHANES 15:2

Pomuḷoi in tanga kon i-Nakó inta diá momomungai, pongkóon-Nea, bo pomuḷoi in tanga inta momungai, gaatannea in daunnea bo daritan-Nea sinbá modugangdon modatog in bungainea.

YOHANES 4:14

táe intau inta monginum kon tubig ogoi-Ku in diá bidon moyoga-yogang, sin tubig inta ogoi-Ku kon inia in mobaḻí bidon bokaká kon bonu in awaknea, bo umuran ḷumuai bo mobogoi in kobiagan mononoi.”

OUMAN IN RASUL MITA 15:24

Aindon dinongog nami kon oyúondon in intau nongkon sigad nami in namangoi kon i monimu bo mongacau poḷat mopoyaying in pirisaya monimu. Bokaka mosia tua in diábí pinotabá nami.

OUMAN IN RASUL MITA 20:30

Modapot in oyúon doman in intau mita kon sigad monimu in mobaḻí mopopotaau in habar inta diá totuu. Mosia in mogaid kon natua sinbá intau mita inta ain nopirisaya kon i Yesus in moiḷaḻe bo dumudui kon i monia.

SURAT I PAULUS KON JAMAAT RUM 9:6

Deemanbí makusudku moguman kon dandi i Allah in diádon pakéon; táe deemanbí komintan intau Israel in umat inta piniḻí i Allah.

KORINTUS 1 11:19

Tongá oyúonbí doman in pianea kon tua, sinbá koontongandon in intau inta totu-totuu nobaḻí Keresten.

ULANGAN 13:13

kon tongonumai intau moraat nongkon bangusamu aindon nopoḷaḻe kon intau inta nogutun kon kotá sin mosumba kon ilah mita inta diá kinotaauan monimu.

TIMOTIUS 2 2:10

Tuamai akuoi in notababí in notanggung kon tua komintan lantaran kopontingan in intau mita inta ain piniḻí i Allah, sinbá mosia in mokouḻí doman kon kasaḷamatan inta inaidan i Kristus Yesus bo takin kamuliaan inta mononoi.

TIMOTIUS 2 2:19

Táe dodoyonan moroton inta ain pinomia i Allah tua in diá bidon in mokodandú. Kon ḻimoniknea in pinaisdon nanaa, “Kinotaauanbí i Tuhan in umat-Nea inta kinotabi-Nea,” bo “Intau inta mongaku umat i Tuhan in mustidon mogogai in mogaid kon inta noitaḷá.”

TIMOTIUS 2 3:9

Táe ain bidon notantú kon mosia tua in diá bidon mokouḻí kon onu bo onu, sin pompuḷong monia tua in kinotaauanbí in bayongan intau, naonda bo ki Yanes bo ki Yambres doman tungkuḷ intua.

IBRANI 10:39

Kita naa in deemanbí umat inta mobaḷu-baḷui in pirisaya bo inta diá koharapan. Táe umatbí inta mopirisaya kon i Allah bo inta posaḷamaton.

YOHANES 2 1:7

Tanaa mako in nobayongdon kon dunia naa in intau inta motundú kon diá totuu. Mosia tua in intau inta diá mopirisaya kon ki Yesus Kristus namangoidon in dunia naa saḷaku intau. Intau natua i mongouboḷ, bo saturu i Kristus.

YUDAS 1:1

Utatku mita inta ain inoiní bo inta totok in kinotabi i Allah Amá naton, bo inta iḷukadan kon bonu in tangoi i Yesus Kristus. Saḷaku intau inta nogaid kon oaidan i Yesus Kristus, akuoi – ki Yudas – ki utat i Yakobus,

YUDAS 1:19

Mosiadon naa in intau mita inta mokopomuká kon kogoguyaatan in pinonobatúan jamaat. Mosia in diá kinawasaan in Roho i Allah, táe kinawasaandon in ibog mita in dunia naa.