YOHANES 6:51 - Alkitab Singog In Mongondow Masa In Tanaa

⁵¹ Akuoibí in roti inta noponag nongkon soroga, roti inta mobogoi in kobiagan. Intau inta mokaan kon roti tanaa in umuranbí mobiag. Roti inta ogoi-Ku kon kobiagan intau kon dunia naa in awak-Kubí.”

YOHANES 6:51 ပူးပေါင်းရင်းမြစ်များ

MATIUS 20:28

Ná ki Adí Intau namangoi deemanbí mokibantung, táe mamangoibí mobantung bo mobogoi in nyawa-Nea potobut kon dosa in intau mobarong.”

LUKAS 22:19

Onda intua ki Yesus in nogamá kon roti. Bo naonda in sinambayangan-Nea mako, binonsi-bonsig-Nea in roti tatua bo inogoi kon i monia poḷat noguman, “Naadon in awak-Ku [inta pinosarakan kon i monimu. Aidai doman in naa, saḷaku tanda kon moiko in umuran monorop kon i-Nakó.”

YOHANES 1:14

Pirman ain nobaḻí intau, Sia in nogutun kon sigad naton, bo kita ain nokoontong kon kamuliaan-Nea. Kamuliaan inta sinarima-Nea saḷaku Adí tuḷong i Amá. Pinongin i-Nia tua kita mokoontong kon i Allah bo tabi-Nea kon i naton.

YOHANES 1:29

Nopoikoḷomai kon singgai, indoianmai Yohanes ki Yesus namangoi kon inia. Bo ki Yohanes in noguman, “Indoiai, tuata in ki Adí in Domba i Allah inta momopat kon dosa in dunia.

YOHANES 11:26

Bo intau nobiag inta mopirisaya kon i-Nakó in mobiagbí mononoi. Mopirisaya degá in iko kon singog-Ku tatua?”

YOHANES 3:13

Diábí in tobatúmai intau inta nokoimontandon namonik in soroga, koḻikudbí in Sia inta ain noponag kon dunia naa, Sia tuata in ki Adí Intau.

YOHANES 3:14

Bo ná doman ki Musa inta nopoponik in uḷag tambaga kon pangkoi in kayu kon padang gurun, dá natua doman in ki Adí Intau musti poḷantudon,

YOHANES 3:16

Popisí in ná domai tua in tabi i Allah kon intau kon dunia naa, dá inogoi-Neadon in ki Adí-Nea tuḷong, sinbá bayongan in intau inta mopirisaya kon i-Nia diá in moyoyang, táe mokouḻí kon kobiagan mononoi.”

YOHANES 3:36

Intau inta mopirisaya kon Adí tatua, mokouḻíbí kon kobiagan mopia bo mononoi, táe intau inta diá motoindudui kon Adí tatua, diábí doman mokouḻí kon kobiagan. Sia in umuran hukumon i Allah.

YOHANES 5:24

Totuu totok in singog-Ku tanaa: Intau inta monarukira kon singog-Ku mita, bo mopirisaya kon i-Nia inta nopotabá kon i-Nakó, yo oyúon in kobiagan mopia bo mononoi. Sia in diábí hukumon; sia in noipilatdon nongkon kinopatoian bo mokouḻí kon kobiagan.

YOHANES 6:33

Sin roti inta inogoi i Allah in Siabí inta noponag nongkon soroga bo nobogoi in kobiagan kon intau kon dunia.”

YOHANES 6:35

Dá kai Yesus doman, “Akuoibí naa in roti inta mobogoi in kobiagan, intau mita inta mamangoi kon i-Nakó in diá bidon angoian bui in gogoy. Bo intau inta mopirisaya kon i-Nakó in diá bidon moyoga-yogang bui.

YOHANES 6:41

Intau mita Yahudi mulaidon mongunsingog kon i Yesus, sin ki Yesus in noguman: “Akuoi in roti inta noponag nongkon soroga.”

YOHANES 6:47

Pokotaaudon: Intau inta mopirisaya, oyúonbí in kobiagan mopia bo mononoi.

YOHANES 6:48

Akuoibí naa in roti inta mobogoi in kobiagan.

YOHANES 6:50

Táe diábí natua in roti inta noponag nongkon soroga; intau inta mokaan kon roti tatua in diábí matoi.

YOHANES 7:38

Soaḷ intau inta mopirisaya kon i-Nakó in pinaisdon kon Buk Motusi nanaa, ‘Nongkon bonu in ginanea ḷumuai in bokaká inta mobogoi in kobiagan.’ ” (

KORINTUS 2 5:19

Kami nopotaau kon ki Kristus in binaḻí bidon i Allah tonsigad sinbá intau in motaaudon mamangoi moyodame takin-Nea. Tua komintan inaidan i Allah sin diá bidon pinononggina-Nea mako in bayongan taḷá inta ain inaidan in intau kon i-Nia. Bo Siabí doman tua in nobogoi in oaidan kon inami mopoyaput in habar mita tatua.

KORINTUS 2 5:21

Sin Sia inta nodarit kon bayongan in oaid inta diá mopia, pinaké domandon i Allah mobaba kon bayongan in dosa naton, sinbá kita in buidon mobiag motompia takin i Allah sin notobatúdon i Kristus.

EPESUS 5:2

Kobiagbí takin oyúon tabi, ná ki Kristus motabi kon i naton. Sia in nopokuruban in kobiagan-Nea kon i naton bo nobaḻí tobatú sosumba inta totok in mobondu bo inta mokosanang kon gina i Allah.

EPESUS 5:25

Buḷoi ḷoḷaki, musti motabi kon i buḷoinea, ná doman tabi i Kristus kon jamaat inta dapot in noposarakan in awak-Nea sin kopontingan in jamaat tatua.

TITUS 2:14

Sia tuata inta ain noposarakan in awak-Nea sin mopoḷuat kon i naton nongkon bayongan inta moraat, bo kita in baḻíon-Nea tobatú umat inta noiḷuatdon nongkon kawasa in dosa bo tongádon mobaḻí umat-Nea inta morajing mogaid kon inta mopia.

IBRANI 10:20

Binukatandon i Yesus in daḷan mobagu bayáan naton, daḷan inta mobogoi in kobiagan. Daḷan tatua in mongin gorden inta awak i Yesus tontaní.

PETRUS 1 2:4

Tuamai, angoidon kon i Tuhan. Sia in naonda bo batu inta nobiag, batu inta iḷumbú in intau mita sin inanggap monia diá baraguna; táe piniḻídon i Allah nobaḻí batu inta totok in moponting.

YOHANES 1 2:2

Bo pinotonsigad kon i Yesus Kristus tuata, bayongan in dosa naton inampungan. Bo deemanbí doman tongá taḷá naton, táe taḷábí doman in bayongan intau.

YOHANES 1 4:10

Naabí in tabi tua: Deemanbí kita in notabi kon i Allah, táe ki Allahbí in notabi kon i naton bo nopotabá kon i Adí-Nea sin motobut kon bayongan in dosa naton.

YOHANES 1 4:14

Kami tontaní ain nokoontong kon i Adí i Allah, bo kami in nopohabar kon Sia in pinotabá mangoi i Amá sin mobaḻí Datu Mopoposaḷamat in dunia naa.