YOHANES 6:45 - Alkitab Singog In Mongondow Masa In Tanaa

⁴⁵ Kon bonu in Buk in nabi mita pinais nanaa: ‘Komintan intau tundúonbí i Allah.’ Dá bayongan intau inta ain nokodongog kon totundú bo nobalajar nongkon i Amá, mamangoibí kon i-Nakó.

YOHANES 6:45 ပူးပေါင်းရင်းမြစ်များ

YESAYA 2:3

mosia komintan in moguman, “Igai in kita mayá motakod kon Buḷud i Tuhan, mayá in baḷoi Allah in Israel. Sia in motundúbí kon i naton onu in musti aidan naton. Kita in dumuduibí kon daḷan-Nea, sin totundú i Tuhan in mamangoi nongkon Yerusalem, Sia in mosingog nongkon Sion.”

YESAYA 54:13

Bayongan in intaumu mobaḻí murí-Ku, mosia in mobiag mooyúon bo motompia.

MIKHA 4:2

mosia komintan in mogumanbí, “Igai in kita motakod kon tombuḷud i Tuhan mayá in Baḷoi i Allah in Israel! Sia in motundúbí kon i naton onu in musti pomiaan naton. Kita in dumuduibí kon daḷan-Nea sin totundú i Tuhan in mamangoibí nongkon Yerusalem; nongkon Sion Sia in mosingog kon umat-Nea.”

MATIUS 11:27

Bo ki Yesus in noguman, “Bayongan yagi-yagi inogoi i Amá kon i-Nakó, bo diá doman tobatúmai in nonotaau kon Adí koḻikudbí in ki Amá, bo diá doman tobatúmai intau in nonotaau kon i Amá kuḻikudbí in Adí bo intau inta kinoibog in Adí popoontongan.

MATIUS 17:5

Koyogotpa in ki Petrus nosingog kon tua, daḻi-daḻí noikoḷubung magí kon i monia in goḷom inta mobunod bo kinodongogan nongkon goḷom tatua in singog inta noguman, “Naadon in Adí-Ku inta kinotabi-Ku, Sia tanaa inta kinoibog-Ku, indongogaidon in Sia.”

MARKUS 1:2

Habar Mopia tatua in pinangkoi ná inta pinais i Nabi Yesaya, nanaa, Ki Allah in noguman: “Naadon in totabá-Ku, ‘Pinotabá-Ku in sia umuna kon ini-Mu, sinbá sia in momontang kon daḷan bayáan-Mu.’

LUKAS 1:70

Ná inta ain pinodandi-Nea pinongin nabi-Nea mita inta ain piniḻí-Nea.

LUKAS 18:31

Ki Yesus in nogoiní kon murí-Nea mopuḷú bodoyowá, bo noguman nanaa, “Indongogai! Tanaa mako kita in mopobayádon in Yerusalem, bo bayongan inta ain pinais in nabi mita soaḷ Adí Intau in intompodandon kon tua.

YOHANES 10:27

Domba-Ku mita in mokidongogbí kon singog-Ku mita. Kinotaauan-Kubí in mosia, bo mosia in dumuduibí kon i-Nakó.

YOHANES 6:37

Bayongan in intau inta inogoi i Amá-Ku kon i-Nakó in mamangoibí kon i-Nakó. Ki inekabí in mamangoi kon i-Nakó diábí in diá tarimaan-Ku.

YOHANES 6:65

Bo ki Yesus in bui noguman, “Tuamai Akuoi in mopotaaudon kon inimu, diábí tobatúmai in intau in motaau mamangoi kon i-Nakó, aka diá kinoibog i Amá.”

OUMAN IN RASUL MITA 13:40

Manangka intua tarukira totok kopira, dika modapot in mobaḻí kon i monimu onu in pinoguman in nabi mita nanaa,

OUMAN IN RASUL MITA 7:42

Dá sinaḷáanmai i Allah bo pinomayá-Neadon mako in mosia in nosumba kon tundi mita kon ḷangit. Tua in notongkai ná inta ain pinais kon bonu in buk nabi mita. Nanaa, ‘Ei intau mita Israel! Deemanbí Akuoi in pinorataan monimu bo pinobogoian in sosumba mahaḷuk kon bonu in opat nopuḷú notaong kon rawang bungaion.

EPESUS 1:17

Akuoi in mopoigum kon i Allah, inta ki Tuhan naton ki Yesus Kristus, ki Amá inta momulia totok, sinbá ogoian in Roho-Nea in moiko. Roho tatua in mopobaḻí kon i monimu mobijaksana bo poontong-Nea in ki Allah kon i monimu, sahingga in kotaauandon monimu in Sia.

PILIPI 3:15

Manangka intua kita inta ain noguyang in pirisaya umuran morai natua. Bo aka oyúon in kon sigad monimu in diá notongkai in raiannea, dá insilanganbí i Allah intua kon i monimu.

TESALONIKA 1 4:9

Diábí bain paisonpa bui nami kon i monimu in tabi monimu kon utat mita inta tumpaḷa mopirisaya kon i Kristus. Sinundú bidon i Allah in moiko kon musti mototabian.

IBRANI 10:16

“ ‘Naadon in dodandian inta inaidan-Ku takin i monia kon singgai mita moiduduimai,’ ki Tuhan in noguman doman nanaa, ‘Hukum-Ku mita in potonop-Kudon kon bonu in gina monia, bo popopais-Kudon kon bonu in raian monia.’ ”

YOHANES 1 2:27

Táe aka soaḷ moiko nion ain bidon inogoian i Kristus in Roho-Nea. Bo kon dodai in Roho tatua mongawasapa kon i monimu, diá bidon paraḷu in intau ibanea in motundú kon i monimu, sin Roho bidon tatua in motundú kon bayongan yagi-yagi kon i monimu. Bo onu in tundúon-Nea totuubí intua deemanbí tongá uboḷ. Tuamai tantúdon dudui kon onu inta ain sinundú-Nea tua kon i monimu bo umurandon kobiag motobatú takin i Kristus.