YOHANES 6:38 - Alkitab Singog In Mongondow Masa In Tanaa

³⁸ Sin Akuoi in namangoi nongkon soroga deemanbí mamangoi mogaid kon onu inta kinoibog-Ku tontaní, táe mogaidbí kon inta kinoibog-Nea inta nopotabá kon i-Nakó.

YOHANES 6:38 ပူးပေါင်းရင်းမြစ်များ

YESAYA 53:10

Ibogbí i Tuhan sia in kotugatan in roriga, bo moposarakan in kobiagan nobaḻí kuruban potobut kon dosa. Dá moumur in kobiagannea bo mokoontong kon buínea pongin inia ibog i Tuhan in koaidan.

MATIUS 20:28

Ná ki Adí Intau namangoi deemanbí mokibantung, táe mamangoibí mobantung bo mobogoi in nyawa-Nea potobut kon dosa in intau mobarong.”

YOHANES 3:13

Diábí in tobatúmai intau inta nokoimontandon namonik in soroga, koḻikudbí in Sia inta ain noponag kon dunia naa, Sia tuata in ki Adí Intau.

YOHANES 3:17

Sin ki Allah in nopotabá kon i Adí-Nea namangoi in dunia naa deemanbí mamangoi mohakim kon intau kon dunia naa, táe mamangoibí moposaḷamat kon i monia.

YOHANES 3:31

Inta namangoi nongkon soroga noiḻiubí nongkon bayongan yagi-yagi. Inta namangoi nongkon dunia noibonubí kon dunia naa bo nongonguman doman kon soaḷ in dunia mita naa. Ki ine inta nongkon omonik Sia in noiḻiubí nongkon bayongan yagi-yagi.

YOHANES 4:34

Ki Yesus in noguman, “Kaanon-Ku naa in dumuduibí kon onu inta kinoibog i-Nia inta nopotabá kon i-Nakó, bo moginḷapat kon oaidan inta pinoki aid-Nea kon i-Nakó.

YOHANES 5:19

Tubag i Yesus kon intau mita tatua, “Poguman-Kudon kon i monimu, Adí in diábí mokoaid kon onu bo onu aka mopomaké in kawasa-Nea tontaní. Sia in tongábí mogaid kon onu inta ain inontong-Nea inaidan i Amá-Nea. Sin onu in inaidan i Amá, tua doman in inaidan i Adí.

YOHANES 5:30

“Akuoi in diábí motaau in mogaid kon onu bo onu podudui in ibog-Ku tontaní. Akuoi in tongábí mohakim podudui in onu inta pinarenta i Allah. Bo moadilbí in pononantú-Ku, sin Akuoi in diábí dinumudui kon ibog-Ku tontaní, táe dinumuduibí kon ibog i Amá inta nopotabá mangoi kon i-Nakó.

YOHANES 6:29

Ki Yesus in notubag, “Tanaabí in kinoibog i Allah nongkon i monimu: Popirisayadon kon i-Nia inta pinotabá mangoi i Allah.”

YOHANES 6:33

Sin roti inta inogoi i Allah in Siabí inta noponag nongkon soroga bo nobogoi in kobiagan kon intau kon dunia.”

YOHANES 6:42

Mosia in noguman, “Sia naa in ki Yesus, ki adí i Yusup toh? Kinotaauanbí nami in ki iná bo ki amá-Nea! Yo nongonu sin Sia in mogumanbí, kon Sia in noponag nongkon soroga?”

YOHANES 6:57

Ki Amá inta nobiag tua, in nopotabá kon i-Nakó, bo Akuoi doman in nobiagbí nongkon i Amá. Natua doman in intau inta mokaan kon awak-Ku, sia in mobiagbí doman nongkon i-Nakó.

SURAT I PAULUS KON JAMAAT RUM 15:3

Sin ki Kristuspa in diábí norai kon kopontingan-Nea tontaní. Kon bonu in Buk Motusi in pinais nanaa, “Bayongan hojatan inta pinonapud kon ini-Mu ain noiantug kon inakó.”

EPESUS 4:9

Dá aka kai naton “Sia noponik” dá mangaḻenea kon tua munapabí in Sia noponag nodapot kon gantog in butá naa.

IBRANI 5:8

Umpaka ki Yesus Adí i Allah, táe nobalajardon in Sia nokopotoindudui pinongin in roriga inta ain kinorasaan-Nea.