YOHANES 6:27 - Alkitab Singog In Mongondow Masa In Tanaa

²⁷ Donaaibí mogaid sinbá mokouḻí kon kaanon inta modai-daitpa bo inta mobongkog. Táe pogaidbí sinbá mokouḻí kon kaanon inta diá mobongkog bo inta mobogoi in kobiagan mononoi. Kaanon tatua in ogoibí i Adí Intau kon i monimu, sin Sia ain ilantik i Allah inta ki Amá.”

YOHANES 6:27 ပူးပေါင်းရင်းမြစ်များ

MAZMUR 2:7

Guman i datu, “Akuoi in moibog mopotaau in onu inta ain sinantú i Tuhan. Guman-Nea kon inakó, ‘Iko in ki adí-Ku ḷoḷaki, singgai in naa Akuoi in nobaḻí ki Amámu.

MAZMUR 40:7

Sosumba bo kuruban oḷudon kinodoí-Mubí, kuruban payongon bo kuruban potobut kon dosa diábí in inigum-Mu. Táe inogoian-Mudon in bongoḷan in akuoi inta pokidongog kon singog-Mu.

AMSAL 9:5

“Koḻigai mokaan kon kaanonku bo monginum kon anggur inta ain pinomiaku.

MOHOHUTUBA 6:7

Intau naa in mogaid tongábí bá oyúon in kaanon, táe diábí kon dodai in onda moorop in sia.

YESAYA 42:1

Guman i Tuhan, “Naa in mogogundoi-Ku inta binaba-Ku, intau inta piniḻí-Ku inta mokosanang kon gina-Ku. Akuoi ain nobogoi in kawasa-Ku kon inia, sin modia kon koadilan kon batúan in bangusa.

YESAYA 55:2

Onubí in mangaḻenea in motaḷui kon onuka inta diá mokoguḻí kon ibog, bo mogaid kon onu inta diá mokobotug? Duduiaidon in parenta-Ku dá moiko in mokaanbí kon inta mopia, bo mokaan kon kaanon inta mopia in nanamnea.

YEREMIA 15:16

Iko in nosingog kon inakó, bo akuoi in nokidongog kon bayongan in tosingogon-Mu. Akuoi naa in Iko in kitogi, o Tuhan Allah Inta Totok in mokawasa, tuamai in tosingogon-Mu mita in mokosanang bo mokoḷunganga kon inakó.

HABAKUK 2:13

Bangusa mita inta pinotungkudmu yumoyiga totok táe diá in mangaḻenea, bo bayongan inta posindogon monia nodait kinaan in tuḷú. Tua komintan in noidoyonbí kon ibog i Tuhan Inta Totok in mokawasa.

MATIUS 17:5

Koyogotpa in ki Petrus nosingog kon tua, daḻi-daḻí noikoḷubung magí kon i monia in goḷom inta mobunod bo kinodongogan nongkon goḷom tatua in singog inta noguman, “Naadon in Adí-Ku inta kinotabi-Ku, Sia tanaa inta kinoibog-Ku, indongogaidon in Sia.”

MATIUS 25:46

Bo mosia naa in bonuon kon tampat pohohukuman mononoi, táe intau inta mopia in mokouḻí kon kobiagan inta mononoi.”

MATIUS 3:17

Bo kinodongogandon in singog nongkon soroga noguman: “Naadon ki Adí-Ku inta kinotabi-Ku, Sia naa inta kinoibog-Ku.”

MATIUS 6:19

“Donaaidon moiko mosipun kon kapunyaan kon dunia, sin poguyaaton in sisik bo kaḻiotá, ná doman tua, mononakow mamangoi momulingkar bo monakow.

MATIUS 8:20

Ki Yesus in noguman kon inia: “Serigala oyúon in bubúnea, bo ḷagapan oyúon in pugadnea, táe ki Adí Intau diá in tampat posiugan-Nea.”

MARKUS 1:11

Poḷat kinodongogan in singog i Allah noguman, “Ikobí in ki Adí-Ku inta kinotabi-Ku, Ikobí in kinosanang in gina-Ku.”

MARKUS 9:7

Noiduduimai kon tua, mosia in kinokoḷubungandon in goḷom bo kinodongogan in singog nongkon goḷom tatua noguman, “Naabí in ki Adí-Ku inta kinotabi-Ku. Indongogai in Sia!”

LUKAS 3:22

bo Roho i Allah noponag kon i-Nia naonda bo ḷagapan paḷoma. Bo kinodongogandon in singog nongkon ḷangit noguman nanaa, “Iko in ki Adí-Ku inta kinotabi-Ku. Iko in kinoibog-Ku.”

LUKAS 9:35

Bo kinodongogandon in singog nongkon yuak in goḷom tatua in noguman, “Tanaa in ki Adí-Ku inta piniḻí-Ku. Indongogaidon in Sia!”

YOHANES 10:28

Mosia tua in ogoian-Kubí in kobiagan mononoi, bo nopasti bidon kon diábí moputu-putú. Diábí tobatúmai intau in mokoagow kon i monia nongkon ḻima-Ku.

YOHANES 11:42

Kinotaauan-Kubí kon umuran-Mubí indongogan in Akuoi, táe singogon-Ku in naa, kon tayowon in intau mita inta kon naa, sinbá mopirisaya in mosia kon Ikobí in nopotabá mangoi kon i-Nakó.”

YOHANES 14:6

Ki Yesus in notubag, “Akuoibí naa in daḷan kon monotaau kon i Allah bo mokouḻí kon kobiagan. Diábí in tobatúmai intau in mokoyaput kon i Amá, aka diá mongin i-Nakó.

YOHANES 15:24

Aka kuma kon yua-yuak monia bo Akuoi in diápa nogaid kon soaḷ mita inta diápa kon dodai in onda inaidan in intau, yo mosia in diábí binaradosa. Táe tanaa mosia ain nokoontong kon onu inta ain pinomia-Ku, bo mosia in mosaturu kon i-Nakó andeka kon i Amá-Ku.

YOHANES 17:2

Amá inogoi-Mudon in kawasa kon i-Nia sin mongawasa kon bayongan inta nobiag, sinbá Sia in mobogoi doman in kobiagan mononoi kon i monia inta inogoi i Amá kon i-Nia.

YOHANES 3:15

sinbá bayongan in intau inta mopirisaya kon i-Nia mokouḻí kon kobiagan mononoi.

YOHANES 3:33

Sin intau inta mopirisaya kon onu inta inouman-Nea tatua, akúonneabí kon ki Allah tua in mobanar.

YOHANES 6:40

Totuu, naabí in kinoibog i Amá-Ku: Bá bayongan intau inta nokoontong kon Adí bo nopirisaya kon i-Nia mokouḻí kon kobiagan mopia bo mononoi, bo mobiag bui kon singgai ponantúan.”

YOHANES 6:47

Pokotaaudon: Intau inta mopirisaya, oyúonbí in kobiagan mopia bo mononoi.

YOHANES 6:51

Akuoibí in roti inta noponag nongkon soroga, roti inta mobogoi in kobiagan. Intau inta mokaan kon roti tanaa in umuranbí mobiag. Roti inta ogoi-Ku kon kobiagan intau kon dunia naa in awak-Kubí.”

YOHANES 6:53

Bo ki Yesus in noguman kon i monia, “Poguman-Kudon kon i monimu, Aka moiko bo diá mokaan kon awak i Adí Intau bo monginum kon dugú-Nea, yo diábí in moiko mobiag.

YOHANES 6:54

Intau inta mokaan kon awak-Ku bo monginum kon dugú-Ku sia in mokouḻí kon kobiagan mopia bo mononoi bo biagon-Kubí in sia kon Singgai Ponantúan.

YOHANES 6:58

Naabí in roti inta noponag nongkon soroga: deemanbí ná roti inta kinaan in mogoguyang monimu. Sin naonda in nokaan mako kon roti tatua, mosia in minatoi doman. Táe intau inta mokaan kon roti tanaa in umuranbí mobiag.”

YOHANES 6:62

Yo onu degá in mobaḻí aka moiko in mokoontongdon kon i Adí Intau mamonik bui kon tampat-Nea inta muna?

YOHANES 6:68

Dá ki Simon in noḻibó, “Tuhan, kon i inepa in bayáan nami? Tosingogon i Tuhan mobogoi in kobiagan mopia bo mononoi.

YOHANES 8:18

Inta nobogoi in kosakusian soaḷ Akuoi in doyowabí, Akuoi bo ki Amá-Ku inta nopotabá kon i-Nakó.”

OUMAN IN RASUL MITA 10:38

Bo kinotaauanbí domandon monimu kon ki Allah ain nomiḻí kon i Yesus intau in Nazaret tua bo nobogoi kon i-Nia in Roho i Allah bo kawasa. Kinotaauan domandon monimu kon ki Yesus tuata inta minayá in ḻipu-ḻipúannea bo nogaid kon inta mopia poḷat nongundam kon bayongan in intau inta kinawasa in Ibilis, sin ki Allah in umuran kotaki-takin-Nea.

OUMAN IN RASUL MITA 2:22

Utatku mita intau in Israel! Indongogai in singogku tanaa: Makusudku tua in ki Yesus intau in Nazaret. Sia pinotabá i Allah mamangoi kon imonimu. Tua in moniata kon i monimu sin Sia ain nogaid kon oaidan inta mokoherang totok bo nopoontong in tanda mita inta nongkon i Allah. Tua mita in inaidan-Nea kon yua-yuak monimu bo tua in kinotaauanbí monimu.

SURAT I PAULUS KON JAMAAT RUM 4:11

Sia in sinunat bambí noiduduimai, tongá sunatnea tatua in tongábí saḷaku tanda kon sia ain sinarima i Allah saḷaku intau inta mokosanang kon gina-Nea, popisí in mopirisaya kon i Allah. Sia in sinarima i Allah kon wakutu in diápa dinumudui kon atorang in sunat tatua. Bo ki Abraham in nobaḻí guyanga in bayongan intau inta mopirisaya kon i Allah, bo popisí intua, dá sia sinarimadon i Allah saḷaku intau inta mokosanang kon gina-Nea, umpakabí mosia in diá sinunat.

SURAT I PAULUS KON JAMAAT RUM 6:23

Sin aka bungai in dosa tua in popatoibí, táe kobiagan mopia bo mononoi in moyotakin i Kristus Yesus, Tuhan naton, tua in inogoibí i Allah pinomorosen.

KORINTUS 1 6:13

Oyúon doman in nosingog kon kaanon tua in pinobonubí kon sian, sin sianbí in sinantú tampatnea. Táe sian bo kaanon tumpaḷabí diá in baraguna kon i Allah. Tuamai pakébí in awakmu mogaid kon onu inta kinoibog i Tuhan, deemanbí mogaid kon inta kinodoí-Nea sahingga in umuran-Neabí ḷukadan in awakmu.

KORINTUS 1 9:2

Umpaka intau ibanea in diá mopirisaya kon akuoi in rasul, táe moiko in nopirisayabí. Sin buktinea moiko in nobaḻídon intau Keresten.

KORINTUS 2 4:18

Kami in diábí monarukiramai kon onu inta koontongan. Sin inta koontongan tua in diábí mononoi, táe aka inta diá koontongan yo tuabí in mononoi.

GALATIA 5:6

Sin aka kita bo ain notobatú takin i Kristus Yesus, yo soaḷ sunaton ande diá sunaton, diábí mobaḻí soaḷ kon i naton. Sin totok moponting in pirisayabí kon i Kristus bo tua in moniata kon tabi naton kon tumpaḷa intau.

ULANGAN 30:13

Tampatnea in deemanbí doman kon ḷoḷan in dagat, dá moiko in moḻibó, ‘Ki ine in mayá ḷumoḷan kon dagat sin mogamá kon tua bo pakéon naton, sinbá kodongogan naton bo motaaudon duduian?’

PILIPI 2:13

Sin ki Allahbí in mopogonú kon ginamu sinbá moibog bo mokosanggup moposanang in gina i Allah in moiko.

KOLOSE 1:29

Sinbá koyaputanku intua, dá tuamai akuoi in moramuji totok in mogaid. Akuoi in moramuji takin bayongan ropot inta inogoi i Kristus kon inakó bo inta nongawasa doman kon inakó.

KOLOSE 2:22

Bayongan atorang tatua in soaḷbí mita inta naonda in pakéon yo diádon in baragunanea. Tua in tongábí atorang bo totundú mita inta pinomia in intau.

KOLOSE 3:2

Raidon in soaḷ mita inta kon soroga, donaai morai kon soaḷ mita inta kon dunia.

TIMOTIUS 2 2:19

Táe dodoyonan moroton inta ain pinomia i Allah tua in diá bidon in mokodandú. Kon ḻimoniknea in pinaisdon nanaa, “Kinotaauanbí i Tuhan in umat-Nea inta kinotabi-Nea,” bo “Intau inta mongaku umat i Tuhan in mustidon mogogai in mogaid kon inta noitaḷá.”

IBRANI 12:16

Ḷukadaibí doman sinbá diá in intau mobiag mokotor andeka doí moguntun kon soaḷ mita inta nongkon i Allah, ná inta inaidan i Esau. Sia in nobarani totok nopotaḷui in haknea saḷaku adí guya-guyang tongá popisí in kaanon topindan.

IBRANI 4:11

Tuamai, koḻigai in kita moramuji totu-totuu in tumuot kon tampat pogogogaian tatua, sinbá diá tobatúmai in intau kon sigad naton in diá moituot kon tampat tatua ná mosia koḻipod sin popisí in diá mopirisaya kon i Allah.

YAKOBUS 1:11

Kon dodai mata in singgai momuká bo mopatúdon totok, yo moḷaḷow in bonok tatua sahingga in bungainea moḷabúdon bo diá domandon mopira. Natua doman intau nooyúon, morimumud in sia kon dodai in sia yogot mopobayá in totayaknea.

PETRUS 1 1:24

Kon bonu in Buk Motusi pinaisdon nanaa: “Bayongan in intau kon dunia naa naonda bo bonok, bo bayongan in kamuliaannea naonda bo bungai in bonok. Bonok moḷaḷow, dá bungainea in mototak doman;

PETRUS 2 1:17

Kon tuabí in kami wakutu in Sia i horomat bo pinomulia i Allah Amá. Kon wakutu intua kinodongogandon in singog nongkon i Inta Totok Momulia, inta noguman kon i-Nia, “Naabí in ki Adí-Ku inta Kinotabi-Ku. Sia in kinosanang in gina-Ku!”