YOHANES 4:22 - Alkitab Singog In Mongondow Masa In Tanaa

²² Moiko intau in Samaria mosumba kon i inta diá kinotaauan monimu, táe aka kami intau in Yahudi nosumba kon i-Nia inta kinotaauan nami, sin kasaḷamatan in namangoi nongkon intau in Yahudi.

YOHANES 4:22 ပူးပေါင်းရင်းမြစ်များ

KINOBAḺIAN 49:10

Ki Yohuda in mokadai kon tungkud in dodatuan, Buínea in momarenta dapot in mononoi. Bangusa mita in modia mangoi kon pajak, bo tumungkud takin moondok kon tayowonnea.

EZRA 4:2

Tuamai in nokipodungkuḷ in mosia kon i Zerubabel bo tongguḷu mita in inanakan, bo noguman, “Ogoipa in kami tumakin mogaid kon Baḷoi Tuhan, sin kami in mosumbabí doman kon i Allah i utat mita, ná doman ki utat mita. Kami in umuranbí moposumba in kuruban kon i-Nia pinangkoi kon ki Esar-Hadon, datu in Asyur nodia mangoi kon inami.”

MAZMUR 147:19

Sia in nopotaau in koyow-Nea kon umat-Nea, atorang bo hukum-Nea kon umat inta piniḻí-Nea.

MAZMUR 68:20

Dayowdon in ki Tuhan, sin Siabí in ki Allah inta noposaḷamat kon inaton; pomuḷoi in singgai momotaan in Sia kon dodiaan naton.

YESAYA 12:2

Totuu, ki Allah tua in mopoposaḷamatku, akuoi in mopirisaya kon i-Nia. Akuoi in diábí moondok, sin Sia in moginropot kon inakó. Mopoposaḷamatku in ki Allah, Kon i-Nia in popoyaputanku in dondong.

YESAYA 12:6

Ponggoḷokapdon ei intau mita in Sion, podondongdon takin sanang in gina. Ki Allah mokudus in israel totuu kon momulia, Sia in nogutun kon yua-yuak monimu.”

YESAYA 2:3

mosia komintan in moguman, “Igai in kita mayá motakod kon Buḷud i Tuhan, mayá in baḷoi Allah in Israel. Sia in motundúbí kon i naton onu in musti aidan naton. Kita in dumuduibí kon daḷan-Nea, sin totundú i Tuhan in mamangoi nongkon Yerusalem, Sia in mosingog nongkon Sion.”

YESAYA 46:13

Akuoi in mopodiug bidon kon singgai popoḷuatan, kasaḷamatan inta ogoi-Ku in diá bidon mobaḷui. Akuoi in moposaḷamatbí kon Yerusalem, bo mobogoi in kahoromatan kon Israel.”

ZAKHARIA 9:9

Ei intau in Sion, pokoḷungangadon! Ei intau in Yerusalem, ponggoḷokapdon! Indoiaika! Datumu in mamangoi takin nountung! Sia in datu moadil inta nodia kon kasaḷamatan. Táe moompá totok in dodia sia in noiyaput sinumakoi kon keledai, keledai batánea.

LUKAS 24:47

Bo podoyon doman kon tangoi i Datu Mopoposaḷamat tatua mustibí popotaau kon bayongan in bangusa, kon intau in mustibí mogogai in mogaid kon inta diá mopia bo potaau doman kon ki Allah in mongampungbí kon bayongan dosa mita monia. Bo habar tatua in musti popotaau pangkoion kon Yerusalem.

OUMAN IN RASUL MITA 17:23

Sin wakutu in akuoi nodondaḷoi kon kotámu tanaa, bo nonarukiramai kon tampat mita pososambayangan monimu kon naa, akuoi nokoontong doman kon tampat pobobogoian monimu kon sosumba; kon tampat tatua pinaisan nanaa, ‘Kon i Allah Inta Diá Kotaauan.’ Yo ki Allahbí inta diá kinotaauan monimu tuata in potaauku naa kon i monimu.

OUMAN IN RASUL MITA 17:30

Oaid mita naton inta diá mopia inta koḻipod ain bidon iḻiong i Allah, asaḷ bo tanaa mako kita bo bayongan intau kon dunia, mogogaidon in mogaid kon dosa mita.

OUMAN IN RASUL MITA 3:26

Tuamai in ki Allah nomiḻí kon simpaḷ-Nea, bo nopotabá kon i-Nia namangoi muna kon i monimu, sinbá Sia in momarakat kon i monimu. Nanaa in pomomarakat-Nea kon i monimu, pogogai-Neadon in moiko komintan in mogaid kon moraat ná inta biasamai aidan monimu.”

SURAT I PAULUS KON JAMAAT RUM 11:18

Tuamai in dikabí moiko in diá mopandung kon tanga mita inta ain pinongkó tatua. Toropbí kon moiko in tongábí tanga. Deemanbí tanga in mobogoi in kaanon kon uakat, táe uakatbí in mobogoi in kaanon kon tanga mita.

IBRANI 7:14

Kinotaauan bidon in bayongan imang kon ki Tuhan naton nongkon sukubí in Yahudi. Diábí kon dodai in onda in kinotangoian i Musa in suku tatua wakutu in sia nongonguman kon soaḷ imang mita.