YOHANES 19:17 - Alkitab Singog In Mongondow Masa In Tanaa

¹⁷ Ki Yesus iḷumuai takin kopota-potaan in kayu pinoyotaḻempang popopakúan kon i-Nia bo nopobayá in tampat inta sinangoian “Tampat in Ḷungkaká”. (Kon bonu in bahasa Ibrani sinangoian Joljuta.)

YOHANES 19:17 ပူးပေါင်းရင်းမြစ်များ

KINOBAḺIAN 22:6

Ki Abraham nopopotaan in kayu tatua kon obaga i Ishak, bo sia in nodia kon tosilad bo baga in tuḷú sin ponontuḷúan. Naonda in taya dua i adínea kon daḷan,

DATU MITA IMITÁNEA 21:13

Intau moraat doyowa iḻimitú noyogintayow i Nabot, bo kon tayowon in intau mobayong noponapud in mosia in tosingogon kon sia in nogodi-godimaidon kon i Allah bo kon i datu. Tuamai in sia dinia pinoḷuai in kotá bo inarab in batu nodapot in minatoi.

IMAMAT 24:14

“Diadon in intau tatua kon ḷuai in ḷoḷaigan. Bayongan intau inta nokodongog kon inia nogodi-godimai, musti mopoukat in ḻima monia kon uḷu in intau tatua sin mobogoi in katarangan kon sia in kotaḷá. Bo bayongan umat musti mogarab in batu kon inia dapot in matoi.

MATIUS 10:38

Bo ki ine in doí momotaan kon kayu pinoyotaḻempang bo dumudui kon i-Nakó, sia doman tua in diábí patus mobaḻí dumodudui-Ku.

MATIUS 16:24

Bo ki Yesus in noguman kon murí-Nea mita, “Pomuḷoi intau inta moibog dumudui kon i-Nakó, sia in musti monaḷámai kon oaidannea tontaní bo momotaan kon roriganea, bo dumudui kon i-Nakó.

MATIUS 27:37

Bo kon ḻimonik in uḷu-Nea pinopopakuan monia in dopí inta pinaisan in pais inta binaḻí dodoyonan pinohukuman kon i-Nia: “Naadon in ki Yesus Datu intau Yahudi.”

MARKUS 10:21

Dá ki Yesus inimindoi kon intau tatua takin tabi bo noguman nanaa, “Dongkadon tobatú in paraḷumu aidan. Bayádon potaḷui in bayongan kapunyaanmu; bo ogoi kon intau nobogá in boḻinea tatua, dá mokouḻídon iko kon kapunyaan kon soroga. Onda intua angoidon dudui kon i-Nakó.”

MARKUS 15:26

Bo kon ḻimonik in kayu pinoyotaḻempang tatua pinopopakúan doman monia in pais inta binaḻí monia dodoyonan pinopopakúan monia kon i-Nia. Nanaa in pinais tua: “Datu Intau in Yahudi”.

MARKUS 15:32

Aka totuu in Sia Datu in Israel, Datu Mopoposaḷamat, yo pomayádon mako in tanaa Sia in moponag nongkon kayu pinoyotaḻempang tatua, sinbá ontongon nami bo mopirisaya domandon in kami kon i-Nia!” Intau mita inta pinopopakú kon kayu pinoyotaḻempang noyotakin i Yesus noningkuḻe doman kon i Yesus.

MARKUS 8:34

Onda intua ki Yesus nogoiní kon intau moantó inta noyotakin murí-Nea mita bo noguman kon i monia, “Intau inta moibog dumudui kon i-Nakó musti ḻiongonnea in kopontingannea tontaní bo momotaan kon kayu pinoyotaḻempang bo umuran dumudui kon i-Nakó.

LUKAS 14:27

Intau inta doí momotaan kon kayu pinoyotaḻempang bo dumudui kon i-Nakó, sia tua in diábí motaau mobaḻí dumodudui-Ku.

LUKAS 23:26

Dá ki Yesus in diniadon monia. Kon daḷan mosia noyodungkuḷ in tobatú intau, tangoinea in ki Simon. Sia in nongkon ḻipú in Kirene bo mopobayá in kotá tatua. Dinomok monia in sia bo pinakisa pinoki potaanan in kayu pinoyotaḻempang bo dumuduianmai kon tumi i Yesus.

LUKAS 23:33

Naonda in noidapotdon kon tampat inta sinangoian “Ḷungkaká”. pinopopakúdon monia kon kayu pinoyotaḻempang in ki Yesus takin intau moraat doyowa tua. Tobatú in kon dotá in koḷanan bo tobatú in kon dotá in koḷoigi i Yesus.

LUKAS 23:38

Kon uḷuanmai i Yesus pinaisan nanaa, “Naadon in Datu Intau Yahudi.”

LUKAS 9:23

Onda intua Sia in noguman doman kon i monia, “Intau inta moibog dumudui kon i-Nakó, mustibí ḻiongonnea in oaidannea tontaní, bo momotaan kon roriganea pomuḷoi in singgai bo umuran dumudui kon i-Nakó.

YOHANES 19:13

Nokodongogmai kon natua, pinoki diadon i Pilatus iḷumuai in ki Yesus, bo minayádon in sia iḻimitú kon kadera pongadilan inta sinangoian Taḷog Batu (Litostrotos). (Kon bonu in bahasa Ibrani sinangoian Gabata.)

YOHANES 5:2

Kon Yerusalem kon diug in tampat inta sinangoian “Ngara in Domba” oyúon in tobatú tabang, inta aka kon bonu in bahasa Ibrani sinangoian Betesda. Kon tua ḻima in tampat pobobarasanangan.

OUMAN IN RASUL MITA 7:58

Pinoḷuai monia in sia kon kotá tatua bo inandur in batu. Intau mita inta nokoontong kon inta nobaḻí tatua noḷongkut kon ḷambung bo pinoki kadai monia kon tobatú tayowmobiag inta ki Saulus in tangoinea sin moduḷu doman mogandur.