YOHANES 18:12 - Alkitab Singog In Mongondow Masa In Tanaa

¹² Bo tontara mita in Rum takin itoinea bo moḷoḷukad mita inta pinotabá in intau Yahudi nodomokdon poḷat notogot kon i Yesus.

YOHANES 18:12 ပူးပေါင်းရင်းမြစ်များ

KINOBAḺIAN 22:9

Naonda in mosia nodapotdon kon tampat inta pinoguman i Allah kon i Abraham, sia in noposindog in mezbah tobatú bodongka nopotudu in kayu inta pakéon potubaan tatua. Nopaḷut mako kon tua sinogotneadon in ki adínea bo pinopouḻidnea kon tudu in mezbah tatua, kon tudu in kayu inta tubáan tatua.

KINOBAḺIAN 40:3

bo mosia in pinobonuneadon kon ponjara kon bonu in baḷoi moḷoḷukad kon komaḻig, kon tampat pinomonjaraan kon i Yusup.

MAZMUR 118:27

Ki Tuhan in ki Allah, Sia in mopia in gina kon inaton. Bayádon in muna moyotakin kokada-kadai in tanga, bo ḻibudon in mezbah i Tuhan.

MATIUS 26:57

Naonda in dinomok monia in ki Yesus, dinia monia pinotayow kon i Kayapas. Tobatú imang moḷoben. Kon tua aindon nosipun in mototundú mita kon agama bo guhanga mita in ḻipú.

MATIUS 27:2

Sinogot monia in Sia, bo dinia pinosarakan kon i Pilatus, gubernur kon butá tatua.

MATIUS 27:27

Onda intua tontara mita i gubernur nodia kon i Yesus pinobayá in baḷoi pongadilan, bo bayongan in tontara noyosipun kon ḻibumai i Yesus.

MARKUS 14:53

Ki Yesus in dinia kon baḷoi i imang moḷoben. Kon tua, noyosipundon magí in bayongan imang itoi, itoi mita intau Yahudi bo mototundú mita kon agama Yahudi.

MARKUS 15:1

Subupa totok, bayongan Mahkama Agama, imang mita itoi bo itoi mita intau in Yahudi bo mototundú mita kon agama nogaid kon pinoyodungkuḷan motoyong. Onda intua sinogot monia in ḻima i Yesus bo dinia pinosarakan kon i Pilatus.

LUKAS 22:54

Ki Yesus in dinomok monia bo dinia pinobayá in baḷoi i imang moḷoben. Ki Petrus in dumuduianmai kon i monia, táe nongkon moyayú.

YOHANES 18:3

Dá ki Yudas in namangoidon in tampat tatua takin kodia-dia in tokolompok in tontara in Rum bo tongonu domanmai in moḷoḷukad kon Baḷoi Tuhan inta pinotabá in imang mita itoi bo in intau mita in Parisi. Mosia in nodia kon ḷoḷutam, lantera bo poḷombow.

OUMAN IN RASUL MITA 10:1

Kon Kaisarea oyúon in tobatú ḷoḷaki, tangoinea in ki Kornelius. Sia naa in itoi in “Tontara in Rum”.

OUMAN IN RASUL MITA 21:31

Naonda in mosia monomayá moḻimod kon i Paulus, intau mita minayá nopoyaput in habar kon itoi in tontara in Rum, kon Yerusalem in nokacau.

OUMAN IN RASUL MITA 21:37

Naonda in ki Paulus diaandon kon bonu in tampat monia tatua, sia in noḻibó kon itoi in tontara tatua, “Motaau degá in akuoi in moyosingog motoyong takin i Tuang?” Dá itoi in tontara tatua in noḻibó, “Eta motaau tumon bahasa in Yunani in iko?”

OUMAN IN RASUL MITA 23:10

Nodugangdon noḷoben in bobayowan monia tatua, dá noondokdon itoi in tontara tatua sin dikabo ḻibutan monia in ki Paulus bo patoion. Tuamai binayáneadon pinoki gamá in ki Paulus nongkon yuak monia tatua bo pinoki dia bui kon tampat monia tua.

HAKIM MITA 16:21

Dá intau mita in Pilistin nodomokdon kon inia bo nonurak kon batoḷ in matanea. Dinia monia in sia minayá in Gaza bo sinogot monia in rante bitú doyowa, bo pinotuot monia kon ponjara. Kon tua pinoki giḻingan monia in sia.