YOHANES 16:22 - Alkitab Singog In Mongondow Masa In Tanaa

²² Natuabí doman in moiko: Tanaa mako mosusapabí in gina monimu, táe buipabí in Akuoi moyodungkuḷ monimu, dá moḷunganga in gina monimu; bo diábí tobatúmai intau in motaau mogamá kon ḷunganga in ginamu tatua.

YOHANES 16:22 ပူးပေါင်းရင်းမြစ်များ

AYUB 34:29

Aka ki Allah in monantúdon kon tongá kibio-biómai, diábí tobatúmai in intau mokobaḻí mosingog kon i-Nia. Aka mogadop in Sia, diábí tobatúmai intau in mokouḻí kon i-Nia.

MAZMUR 146:2

Akuoi in moibog modayow kon i Tuhan kon kinoouput in kobiaganku bo modondong kon i Allahku kon dodai in oyúonpa in akuoi.

MAZMUR 33:21

Mopia in gina naton popisí in Sia bo mopirisaya kon tangoi-Nea inta motusi.

YESAYA 25:9

Kon dodai intua intau in mogumanbí, “Totuubí, Siabí in ki Allah naton; Siabí inta inoḷat mako naton, sinbá kita in posaḷamaton. Totuu, naabí in ki Tuhan; Siabí inta inoḷat mako naton. Tanaaya kita in morogiow mopia in gina, sin Sia in noposaḷamatdon kon inaton.”

YEREMIA 31:12

Mosia in mamangoi in Tombuḷud in Sion takin pogot motamburiang, poḷat modondong takin pia in gina popisí in bayongan inta inogoi-Ku kon i monia, gandum, ḷana, anggur, sapi bo domba. Mosia in mobaḻídon naonda bo taman inta mobayong in tubignea, bo diábí kodaitan in onu bo onu.

MATIUS 28:8

Mosia ḷagi minayá nongkon poḷoḷobongan tatua, takin ondok bo pia in gina. Mosia noribatuk in minayá nopotaau kon murí mita i Yesus.

LUKAS 10:42

Bá poguman-Ku kon inimu kon tongábí tobatú in totok moponting. Ki Maria ain nomiḻí kon inta mopia, inta diábí bui gamáan kon inia.”

LUKAS 16:25

Táe ki Abraham in notubag, ‘Uḻe, toropdon adíku: iko aindon nokorasa kon bayongan inta mopira wakutu iko nobiagpa kon dunia, táe ki Lazarus naa in tongábí nokorasa kon bayongan inta diá mopia. Manangka intua tanaa mako sia in mokouḻí kon inta mopia kon naa. Yo iko in mokouḻí kon roriga.

LUKAS 19:26

Táe datu tatua in notubag, ‘Pokotorop: intau inta nobayongdon in kon inia, duganganbí bui. Táe intau inta diá in onu bo onu kon inia, yo onu in oyúonpa kon inia, gamáanbí doman.

LUKAS 24:41

Bo kon dodai in mosia diápa basí mopirisaya, popisí in noiḻiudon pia in gina bo noherang, ki Yesus in noḻibó kon i monia, “Oyúon degá in kaanon kon i monimu naa?”

YOHANES 14:1

“Donaai mohawatir in ginamu,” guman i Yesus kon i monia. “Popirisayadon kon i Allah, bo popirisaya kon i-Nakó doman.

YOHANES 14:19

Diádon moonggot bo diádon ontongon in dunia naa in Akuoi. Táe moiko in mokoontongbí kon i-Nakó. Bo lantaran in Akuoi nobiag, dá moiko in mobiagbí doman.

YOHANES 14:27

Kobiagan moonow bo motompia taḷaan-Ku kon i monimu. Dodamean-Kubí tontaní in ogoi-Ku kon inimu. Onu in ogoi-Ku tua deemanbí ná inta inogoi in dunia naa kon i monimu. Dika moḻia-ḻiaw in gina bo dika moondok.

YOHANES 16:16

“Diádon moonggot bo diádon in moiko mokoontong kon i-Nakó, ná doman tua diádon moonggot poindoian mako monimu kon i-Nakó.”

YOHANES 16:20

Poguman-Kudon kon i monimu, moiko nion in mongombaḷbí bo mogamui, táe mopiabí in gina in dunia naa. Morobonoḷbí in gina monimu, táe robonoḷ in gina monimu tua in mobaḷuibí ḷunganga in gina.

YOHANES 16:6

Nodapotbí in tanaa moajarbí in gina monimu sin pinotaau-Kudon intua kon inimu.

YOHANES 21:7

Dá murí inta totok in kinotabi i Yesus in noguman kon i Petrus, “Ki Tuhan intua!” Naonda in kinotaauan i Petrus kon ki Tuhan intua, nogiḷambungdon in sia (sin diá nogiḷambung in sia) bo iḷumabú in sia kon tubig.

YOHANES 4:14

táe intau inta monginum kon tubig ogoi-Ku in diá bidon moyoga-yogang, sin tubig inta ogoi-Ku kon inia in mobaḻí bidon bokaká kon bonu in awaknea, bo umuran ḷumuai bo mobogoi in kobiagan mononoi.”

OUMAN IN RASUL MITA 13:52

Dumodudui mita monia kon Antiokhia nongosanang in gina bo kinawasaan in Roho i Allah.

OUMAN IN RASUL MITA 16:25

Táe naonda in noonggotdon kon doḷom ki Paulus bo ki Silas nosambayang bo nodondong nodayow kon i Allah. Dá bayongan intau kon ponjara tua nodait nokodongog.

OUMAN IN RASUL MITA 2:46

Pomuḷoi in singgai mosia in moyosipun kon Baḷoi Tuhan; mosia mongaan doman moyotakin kon baḷo-baḷoiannea. Tua komintan inaidan monia takin pia in gina bo takin doman dodia inta moompá.

OUMAN IN RASUL MITA 5:41

Rasul mita tatua in nobuidon nongkon sidang agama tatua takin pia in gina, sin kinotaauan bidon monia kon natuabí in mobaḻí dumodudui i Yesus. Patusbí in mosia motarima kon singkuḻe lantaran ki Yesus.

KORINTUS 2 6:10

Umpakabí pinokuyang monia in gina nami, táe umuranbí moḷunganga in gina nami. Kami in koontongan nobiag nobogá, táe nobayongdon intau in binaḻí nami nooyúon. Koontongan kami diá kon onu bo onu, táe sabanarnea bayongan rupa-rupa oyúonbí kon i nami.

TESALONIKA 2 2:16

Poigumon mako ki Yesus Kristus Tuhan naton bo ki Allah ki Amá naton in umuran mopoonow bo moginrigon kon gina monimu, sinbá motaau in moiko mogaid bo mopohabar kon onu inta mopia. Motabibí in ki Allah kon i naton, bo lantaran Sia in mopia dá pinomia-Nea in kita umuran mosabar bo moharap mako kon inta mopia.

IBRANI 10:34

Bo moiko in noitakin doman nokorasa kon koajar in gina monia inta kinurung kon ponjara. Bo wakutu in kapunyaan monimu nodait inagow, diá noyaat in gina monimu, sin kinotaauandon monimu kon oyúonpabí in mopia-pia nongkon tua bo inta mononoi totok.

IBRANI 6:18

Doyowa nopasaḷ tatua in diábí mobaḷu-baḷui: Totuuonbí i Allah in dandi bo ibot-Nea tatua. Sia in diábí monguboḷ. Manangka intua kita inta umuran umoḻiung kon i-Nia, umuran-Nea inogoian in ropot bá umuran kumadai kon onu inta i harap mako kon tayowon naton.

PETRUS 1 1:8

Bo umpakabí moiko in diápa dodai onda nokoontong kon inia, táe moiko in motabibí bo umuran mopirisaya kon i-Nia. Manangka intua moḷungangabí totok in gina monimu, ḷunganga in gina inta diábí in poporupaan.