YOHANES 16:19 - Alkitab Singog In Mongondow Masa In Tanaa

¹⁹ Kinotaauanbí i Yesus kon mosia in moibog moḻibó kon i-Nia. Dá tuamai Sia in noguman, “Koina Akuoi in noguman, ‘Diádon moonggot, moiko in diádon mokoontong kon i-Nakó, bo diá domandon moonggot poindoian monimu kon i-Nakó.’ Tua degá inta oumanonmai monimu mongo onu in makusudnea?

YOHANES 16:19 ပူးပေါင်းရင်းမြစ်များ

MATIUS 6:8

Manangka intua yo donaaidon moiko dumudui kon oaid monia. Sin kotaauanbí i Amámu onu in paraḷumu, wakutu in moiko diápa moigum kon i-Nia.

MATIUS 9:4

Táe kinotaauandon i Yesus in raian monia tatua, tuamai Sia in noḻibó, “Nongonu sin moiko in moraibí kon soaḷ mita inta moraat kon bonu in ginamu?

MARKUS 9:32

Diá kinomangaḻean in murí-Nea mita in makusud in singog i Yesus tatua, táe moondok mosia in moḻibó kon i-Nia.

YOHANES 13:33

Adí-Ku mita, Akuoi in diá bidon moonggot in moyotakin monimu. Tayakonbí monimu in Akuoi, táe ná inta ain pinoguman-Ku kon itoi mita in Yahudi bo inta pinoguman-Ku doman kon i monimu, tampat inta bayáan-Ku in diábí kodapotan monimu.

YOHANES 14:19

Diádon moonggot bo diádon ontongon in dunia naa in Akuoi. Táe moiko in mokoontongbí kon i-Nakó. Bo lantaran in Akuoi nobiag, dá moiko in mobiagbí doman.

YOHANES 16:16

“Diádon moonggot bo diádon in moiko mokoontong kon i-Nakó, ná doman tua diádon moonggot poindoian mako monimu kon i-Nakó.”

YOHANES 16:18

Mosia in umuran moḻibó, “Onu in mangaḻenea, ‘diádon moonggot’? Diá komangaḻean naton mongo onu in oumanon-Nea tanion!”

YOHANES 16:23

Kon singgai tatua, moiko diá bidon moḻibó kon onu bo onu kon i-Nakó. Poguman-Kudon kon i monimu: Onukabí in igumon monimu kon i Amá podoyon kon tangoi-Ku, ogoibí i Amá intua kon i monimu.

YOHANES 16:26

Kon wakutudon tuata moiko in moigum kon i Amá podoyon kon tangoi-Ku; pokotaaudon, Akuoi in diábí moigum kon i Amá sin ogoi kon i monimu,

YOHANES 16:30

bo kinotaauan bidon nami kon bayongan yagi-yagi kinotaauanbí i Tuhan. Diá bidon paraḷu in intau moḻibó kon onu bo onu kon i Tuhan. Tuamai kami in mopirisayabí kon ki Tuhan in namangoibí nongkon i Allah.”

YOHANES 21:17

Intoḷuneadon ki Yesus in noḻibó kon inia, “Simon adí i Yohanes, motabi degá in iko kon i-Nakó?” Moajardon totok in gina i Petrus sin ki Yesus nodapot in kotoḷu in noḻibó kon inia. Dá ki Petrus in notubag bui, “Tuhan, kinotaauanbí i Tuhan in bayongan yagi-yagi. Kinotaauanbí i Tuhan kon akuoi in motabibí kon i Tuhan!” Bo ki Yesus in noguman kon inia, “Ḷukadaidon in domba-Ku mita.

YOHANES 6:61

Kinotaauanbí i Yesus kon murí-Nea mita in mongunsingogbí doman kon soaḷ tatua. Dá tuamai Sia in noguman, “Degá mokotersinggung kon i monimu in singog-Ku mita tatua?

YOHANES 7:33

Ki Yesus in noguman kon intau mobayong inta kon bonu in Baḷoi Tuhan, “Diá bidon moonggot Akuoi in moyotakin monimu, sin mopaḷut mako kon tua Akuoi in mayádon kon i-Nia inta nopotabá kon i-Nakó.

IBRANI 4:13

Diábí tobatúmai in mahaḷuk in diá ontongon i Allah. Bayongan yagi-yagi komintanbí ontongon-Nea mako motarang kon tayowon-Nea. Bo mustibí tanggung jawab bo naton kon tayowon-Nea.

WAHYU 2:23

Dumoduduinea mita in ḻimodon-Kubí doman sinbá kotaauandon in bayongan jamaat kon Akuoibí naa in Sia inta nonotaau kon raian bo gina intau. Bo moiko in tuḻían-Kubí podudui in aid monimu tontaní.