YOHANES 15:7 - Alkitab Singog In Mongondow Masa In Tanaa

⁷ Aka moiko bo umuran motobatú takin-Ku bo totundú-Ku in umuran popotonop mako monimu kon gina, yo poigumdon kon i Amá kon onukabí in koibog monimu; dá onu in pinoigummu tua in ogoi-Neabí.

YOHANES 15:7 ပူးပေါင်းရင်းမြစ်များ

DATU MITA IMITÁNEA 3:5

Doḷom tua ki Tuhan in nokipogontong kon inia kon bonu in togoindop bo noguman, “Salomo, igumdon onuka in koibogmu, ogoi-Kubí intua kon inimu!”

AYUB 22:26

Dá iko in motaaudon umuran mopirisaya kon i Allah, bo monotaaudon kon Sia in nobaḻí pangkoi in kopiaanmu.

AYUB 23:12

Parenta mita i Allah umuran dinuduianku, ibog-Nea dinuduianku, bo deemanbí ibogku tontaní.

MAZMUR 119:11

Totundú in sinagúku kon bonu in ginaku, sinbá akuoi diá baradosaan kon ini-Mu.

MAZMUR 37:4

Tayakdon in kopiaanmu kon i Tuhan, Pooropon-Neabí in ibog in ginamu.

AMSAL 10:24

Intau inta motuḻid in gina mokouḻí kon onu inta sinayaknea; intau moraat mokouḻí kon onu inta totok in kinoondoknea.

AMSAL 4:4

akuoi in sinundú i amáku. Sia in noguman, “Toropdon in tongginaku mita, dikabí mokoimontanmai in koḻionganmu. Aidaibí onu inta sinundúku mita, sinbá mosanang in kobiaganmu.

YESAYA 58:8

Dá bayag in monimbayagdon kon inimu naonda bo modiug mobayag, bo kekebmu mita in ḷagidon mopia. Akuoi in moyotakinmubí sin moposaḷamat kon i monimu. Koangoian-Ku in mogoḻiungbí kon i monimu nongkon bayongan in tampat.

YEREMIA 15:16

Iko in nosingog kon inakó, bo akuoi in nokidongog kon bayongan in tosingogon-Mu. Akuoi naa in Iko in kitogi, o Tuhan Allah Inta Totok in mokawasa, tuamai in tosingogon-Mu mita in mokosanang bo mokoḷunganga kon inakó.

MATIUS 7:7

“Poigumdon, dá ogoianbí in moiko. Potayakdon, dá mokouḻí bí in moiko. Ponangkokódon, dá pobukatanbí in moiko kon ḷoḻingkop.

YOHANES 14:13

Bo onukabí in poigumon monimu podoyon kon tangoi-Ku, aidan-Kubí intua kon i monimu, sinbá ki Amá in pomuliaan pongin i Adí.

YOHANES 15:16

Deemanbí moiko in nomiḻí kon i-Nakó. Akuoibí in nomiḻí kon i monimu, bo nopotabá kon i monimu mayá sinbá modiamai kon bungai mobayong, bungai mita inta diá moyopú. Dá ogoibí i Amá in onukabí inigum monimu inta pinodoyon kon tangoi-Ku.

YOHANES 16:23

Kon singgai tatua, moiko diá bidon moḻibó kon onu bo onu kon i-Nakó. Poguman-Kudon kon i monimu: Onukabí in igumon monimu kon i Amá podoyon kon tangoi-Ku, ogoibí i Amá intua kon i monimu.

YOHANES 8:31

Onda intua ki Yesus in noguman kon intau mita in Yahudi inta ain nopirisaya kon i-Nia, “Aka moiko bo umuran dumudui kon inta sinundú-Ku, yo moiko in totu-totuudon mobaḻí dumodudui-Ku,

YOHANES 8:37

Kinotaauan-Kubí kon moiko nion in buíbí i Abraham. Tongá moiko in moḷongasi moḻimod kon i-Nakó, popisí in moiko doí motarima kon totundú-Ku.

GALATIA 5:16

Nanaabí in makusudku: Kobiagdon in moiko podudui kon ibog in Roho i Allah, donaaibí moibog mobiag podudui ibog in intau.

ULANGAN 6:6

Dika mokoimontanmai in mokoḻiong kon parenta mita inta inogoiku kon i monimu singgai in naa.

KOLOSE 3:16

Umuran kon gina-gina mako in totundú mita i Kristus inta mobarakat tua, sahingga moiko in mobijaksana bo mopandoi in motundú bo mononggina kon utat mita. Dika mokoḻiong in mopodondong in Mazmur bo dondong mita rohani; podondongdon kon i Allah takin porasaan mosukur kon bonu in ginamu.

YOHANES 1 2:14

Uḻe Adíku mita, akuoi in nomais kon naa kon i monimu, sin moiko in nonotaaudon kon i Amá. Pinaisku in naa kon i monimu amá mita, sin moiko in nonotaaudon kon i-Nia inta oyúondon nongkon pinomangkoianmai. Pinaisku in naa kon i monimu intau mita inta nongobagupa, sin moiko in moropot. Singog i Allah noitonop kon bonu in ginamu, bo sinaḷowdon monimu ki Inta Moraat.

YOHANES 1 2:27

Táe aka soaḷ moiko nion ain bidon inogoian i Kristus in Roho-Nea. Bo kon dodai in Roho tatua mongawasapa kon i monimu, diá bidon paraḷu in intau ibanea in motundú kon i monimu, sin Roho bidon tatua in motundú kon bayongan yagi-yagi kon i monimu. Bo onu in tundúon-Nea totuubí intua deemanbí tongá uboḷ. Tuamai tantúdon dudui kon onu inta ain sinundú-Nea tua kon i monimu bo umurandon kobiag motobatú takin i Kristus.

YOHANES 1 3:22

Bo onu in igumon naton kon i-Nia, tarimaanbí naton, sin kita in umuran dinumudui kon parenta-Nea mita bo nogaid kon onu inta mokosanang kon gina-Nea.

YOHANES 1 5:14

Bo kita in mobaranibí in mayá kon tayowon i Allah, sin moyakinbí in kita kon indongoganbí i Allah in onu in pinoigum naton, aka inta pinoigum naton tua noyokaan kon onu inta kinoibog-Nea.