YOHANES 15:25 - Alkitab Singog In Mongondow Masa In Tanaa

²⁵ Tongá musti bidon natua, sinbá mobaḻídon in onu inta pinais kon bonu in Hukum Agama monia nanaa: ‘Dia in kinodoyonan pinosaturuan monia kon i-Nakó.’

YOHANES 15:25 ပူးပေါင်းရင်းမြစ်များ

MAZMUR 109:3

Mosia in monubu kon inakó pongin tosingogon mita inta nopuḻing in yaat in gina, bo nomarang kon inakó takin diábí in kinodoyonan.

MAZMUR 35:19

Dikabí pomayá mako in akuoi in poyambáan in intau inta nondoí kon inakó takin diá in popisínea. Dika pomayá mako in akuoi in giowan in intau inta nondoí kon inakó takin diá in kinodoyonan.

MAZMUR 69:4

Akuoi in kopia mokuani nodapot in noḷopídon totok bo noingkagdon in sigogowku. Mataku in mopomporí in mogoḷat mako kon totuḷung i Allahku.

MAZMUR 7:4

O Tuhan Allahku, aka kuma bo akuoi nonombogá, nogaid kon inta moraat kon yobayat, andeka nokoporugimai kon musung takin diá in kinodoyonannea, aka kuma bo inaidanku in natua,

MATIUS 10:8

Undamaidon in intau notakit; biagdon bui in intau minatoi; undamai doman in intau inta pinanyaki kusta, bo untun in dimukud mita moraat. Naa komintan in inogoi pinonotabi kon i monimu. Manangka intua yo ponotabi domandon.

LUKAS 24:44

Onda intua Sia in noguman kon i monia, “Naadon in soaḷ mita inta ain pinoguman-Ku kon i monimu kon wakutu in kotaki-takinpa monimu in Akuoi: kon bayongan inta ain pinais soaḷ Akuoi kon bonu in buk i Musa bo buk in nabi mita, bo buk Mazmur, tua in mustibí mobaḻí.”

YOHANES 10:34

Bo ki Yesus in notubag, “Degá diábí kinotaauan monimu kon pinais bidon kon bonu in Buk Hukum in agamamu nanaa: ‘Ki Allah in nogumandon, moiko in ilahbí?’

YOHANES 13:18

Onu in pinoguman-Ku naa in deemanbí soaḷ moiko komintan. Kotaauan-Kubí ki ine inta ain piniḻí-Ku, táe bá mobaḻídon onu inta pinais kon bonu in Buk Motusi nanaa, ‘Intau inta ain nongaan noyotakin-Ku, in moḷawangbí kon i-Nakó.’

YOHANES 19:36

Tua in nobaḻí sinbá mobaḻídon onu inta pinais kon bonu in Buk Motusi, “Diábí tobatúmai in tuḷannea putoḷon.”

SURAT I PAULUS KON JAMAAT RUM 3:19

Tanaa, kinotaauandon naton kon bayongan inta pinais kon bonu in hukum agama Yahudi, pinomakusudbí kon intau mita inta nobiag dinumudui kon hukum tatua. Tuamai in diábí tobatúmai intau in motaau mobogoi in alasan onu, bo bayongan intau kon dunia naa in motaaubí tuntuton i Allah.

SURAT I PAULUS KON JAMAAT RUM 3:24

Tongábí popisí in totabi i Allah inta pinomorosen-Nea, dá hubungan in intau bo i Allah in motompiadon bui; caranea kon tua intau pinobebasdon i Kristus Yesus.

KORINTUS 2 11:7

Degá diá noitaḷá in aidku tanaa, aka akuoi in mokopoompá sinbá poḷantudon in moiko. Sin kon tungkuḷ in nopoyaput in Habar Mopia inta nongkon i Allah kon i monimu, yo akuoi in diábí nokiuboḻi topiḻikpamai kon i monimu.

GALATIA 2:21

Diábí sinolakku in totabi i Allah. Sin aka kuma bo oyúon in kasaḷamatan aka dumudui kon hukum in agama, yo diá bidon mangaḻe in kinopatoian i Kristus!

TESALONIKA 2 3:8

Kami in deemanbí tongá mokaan kon onu in ogoi intau bo diá mogaid, táe kami in iyumoyigabí totok in mogaid doḷom bo singgai sinbá diá tongá mokoposusamai kon intau ibanea.

WAHYU 21:6

Bo Sia in noguman, “Komintandon nobaḻí! Akuoi naa in ki Alpa bo ki Omega, ki Inta muna-munamai bo ki Inta tumi-tumimai, Akuoibí naa in ki Tuhan nongkon pinomangkoian nodapot in pangabisan. Intau inta moyogang in poinumon-Ku, bo tongábí ogoi pomorosen nongkon bokaká inta mobogoi in kobiagan.

WAHYU 22:17

Roho i Allah bo Nonikaan Bobay in noguman, “Koḻigai!” Ki ine in nokodongog kon naa musti moguman doman, “Koḻigaidon!” Ki ine in moyogang, pogamádon in sia kon tubig inta mobogoi in kobiagan tatua, bo diábí uboḻian.