YOHANES 14:12 - Alkitab Singog In Mongondow Masa In Tanaa

¹² Poguman-Kudon kon i monimu: Intau inta mopirisaya kon i-Nakó, mogaidbí kon onu inta ain inaidan-Ku, modapot in moiḻiubí kon tua in aidannea, sin Akuoi in mayá kon i Amá.

YOHANES 14:12 ပူးပေါင်းရင်းမြစ်များ

MATIUS 21:21

Ki Yesus notubag kon i monia, “Poguman-Ku kon i monimu, aka moiko bo totu-totuu mopirisaya bo diá mohawatir, yo moiko in deemanbí tongá motaau mogaid kon ná inta pinomia-Ku kon pangkoi in ara tatua, táe moiko motaaubí doman moguman kon buḷud tanaa, ‘Pobuatdon nongkon tampatmu tanion bo koḷabúdon kon bonu in dagat’; yo mobaḻíbí doman intua.

MARKUS 11:13

Nongkon moyayúpa inontong-Neadon in pangkoi in ara inta nobambar. Dá nongandupa in Sia notayak kon ḷabú in bungainea. Táe diábí tobatúmai in nouḻí-Nea, koḻikud in daunnea mita, sin dodai intua deemanpabí doman pomomungai in ara.

MARKUS 16:17

Naa in tanda mita inta moyotakin kon i monia inta mopirisaya, mosia in moguntun kon dimukud mita moraat podoyon kon tangoi-Ku; mosia in mosingog kon bonu in bahasa inta diá kinotaauan monia.

YOHANES 14:28

Dinongog bidon monimu in Akuoi in noguman, ‘Akuoi in mayábí, táe buibí in Akuoi mamangoi kon inimu.’ Aka moiko in motabi kon i-Nakó, yo mosanangbí in gina monimu in Akuoi in mayá kon i Amá, sin ki Amábí in moḷobe-ḷoben nongkon i-Nakó.

YOHANES 16:7

Táe totuubí in poguman-Ku tanaa kon i monimu: Totokbí in mopia kon i monimu aka mayá in Akuoi, sin aka Akuoi bo diá mayá, yo diábí mamangoi kon i monimu in mototuḷung tatua. Táe aka Akuoi bo mayá dá potabá-Kubí mangoi in Sia kon i monimu.

YOHANES 4:37

Totuubí in toḻibag nanaa, ‘Tobatú in momuḷa, ibanea i mokoyut.’

YOHANES 5:20

Sin motabibí in ki Amá kon Adí bo poontong-Neabí kon i-Nia in bayongan inta inaidan-Nea tontaní. Modapotbí in poontong i Amá kon i-Nia in oaidan mita inta moḷobe-ḷoben nongkon oaidan mita tatua, dá moiko in moherangdon.

YOHANES 7:33

Ki Yesus in noguman kon intau mobayong inta kon bonu in Baḷoi Tuhan, “Diá bidon moonggot Akuoi in moyotakin monimu, sin mopaḷut mako kon tua Akuoi in mayádon kon i-Nia inta nopotabá kon i-Nakó.

YOHANES 7:39

Ki Yesus in nongonguman kon soaḷ Roho i Allah, inta bain tarimaan in intau mita inta mopirisaya kon i-Nia. Sin wakutu intua Roho i Allah in diápa inogoi; sin ki Yesus in diápa pinomulia.)

OUMAN IN RASUL MITA 10:46

Sin inontong bo dinongogdon monia tontaní, onu in siningog in intau mita tatua kon bonu in bahasa noyagi-yagimai bo mosia in totok domandon modayow kon i Allah. Dá ki Petrus in nosingog nanaa,

OUMAN IN RASUL MITA 16:18

Tongonumai degá nosinggai in bobay tatua umuran momaḷú natua. Diádon nokotahang in ki Paulus in mokidongogmai kon pomaḷúannea natua dá binobuinea bo poḷat noguman kon dimukud tatua, “Podoyon kon tangoi Yesus Kristus akuoi in moguman kon inimu ḷuaidon nongkon bobay tanion!” Dá kon dodaipa doman in tatua iḷumuai in dimukud moraat tatua nongkon bobay tatua.

OUMAN IN RASUL MITA 19:12

Aka lenso andeka baan inta nokoimontandon pinaké i Paulus bo diaan kon intau mita notakit, yo mopiabí mita in takit monia bo dimukud mita moraat in ḷumuaibí doman mita nongkon i monia.

OUMAN IN RASUL MITA 2:33

Sia biningkat bo inogoian in tampat pomomarentaan inta moḷantud, bo inogoian i Allah in kawasa, bo notarima kon Roho i Allah inta ain pinodandi tua, bo Roho doman tatua in inogoi-Nea kon inami naa, tuata inta inontong bo dinongog monimu kon naa,

OUMAN IN RASUL MITA 2:41

Noantó in intau in nopirisaya kon inta pinoguman i Petrus bo poḷat nokibaptis. Dodai intua intau inta nopirisaya in nodugangdon toḷu noribu in kobayongnea.

OUMAN IN RASUL MITA 4:16

kai monia, “Onubí in pomiaan naton kon intau mita tatua? Sin bayongan in intau inta kon Yerusalem naa aindon nokotaau kon taya duabí tua in nogaid kon bayongan soaḷ inta mokoherang totok kon intau. Tua in diábí motaau bayowan naton.

OUMAN IN RASUL MITA 4:33

Takin kawasa moḷoben, rasul mita tatua in nopotaau kon ki Yesus ain nobiag bui. Dá totokdon in binarakatan i Allah in mosia.

OUMAN IN RASUL MITA 4:4

Táe intau mita inta ain nokodongog kon onu inta ain sinundú in rasul mita tatua nobayong in nopirisaya. Dá nodugangdon in kobayong monia, kon bonu in ponarukiraan ḻimamaidon noribu in kobayongnea in ḷoḷaki.

OUMAN IN RASUL MITA 5:15

Intau mita kon tua in umuran mopoḷuai in intau mita inta mongotakit bo pobayá in doḷaag popouḻid kon tosiugan andeka boḷad, sinbá mosia diá bo diá kotugatan in oḻinow i Petrus aka ki Petrus moitaḻib.

OUMAN IN RASUL MITA 6:7

Natuata inta nobaḻí sahingga pirman i Allah in totokdon noisiar magí mako bo intau mita inta nopirisaya kon i Yesus kon Yerusalem in nodugangdon totok in kobayongnea. Bo noantó domandon in imang in nopirisaya kon i Yesus.

OUMAN IN RASUL MITA 8:7

Sin inontongdon monia tontaní in dimukud mita moraat iḷumuai nongkon intau inta sinoḷangannea tatua takin kumarak. Ná doman tua, nobayong doman totok in intau inta ḻempeng bo intau mita pelong in nopia.

OUMAN IN RASUL MITA 9:34

Ki Petrus noguman kon i Eneas, “Eneas, ki Yesus Kristus in mongundam kon inimu. Pobangondon bo toinutdon in tosiuganmu tanion.” Dá kon dodaipa doman tatua bo nobangon in ki Eneas, bo nopirisayadon in mosia kon i Tuhan.

OUMAN IN RASUL MITA 9:40

Táe nodaitnea pinoki ḷuaian in mosia kon gopot tatua, bo sia in sinumungkud nosambayang. Nopaḷut mako nosambayang, nobobui in sia kon mayat tatua bo noguman, “Tabita, pobangondon!” Dá ki Dorkas nobukádon kon mata, bo naonda inontongnea in ki Petrus, bango-bangon in sia bo iḻimitú.

SURAT I PAULUS KON JAMAAT RUM 15:19

inta mokoherang totok kon intau bo diá in poporupaan. Tua mita in nobaḻí sin kawasa in Roho i Allah. Habar Mopia soaḷ ki Kristus aindon pinohabarku komintan kon intau mita, pinangkoipamai kon Yerusalem nodapot in Ilirikum.