YOHANES 12:29 - Alkitab Singog In Mongondow Masa In Tanaa

²⁹ Intau mobayong kon tua in nokodongog doman kon singog tatua. Mosia in noguman, “Gotup intua!” Táe oyúon doman in noguman, “Deeman! Malaekatbí nosingog kon i-Nia!”

YOHANES 12:29 ပူးပေါင်းရင်းမြစ်များ

AYUB 40:9

Moropot degá in iko ná Akuoi? Degá mokogonugur in singogmu ná singog-Ku?

IḶUAIAN 19:16

Kon singgai inta nogintoḷu, dodai in doḷo-doḷomneapa nonggotup bo nongilat. Goḷom inta mobunod noitukatdon kon tudu in buḷud bo kinodongogandon singog in torompet inta totok in moḷangon. Bayongan in intau kon ḷoḷaigan urot mako sin moondok.

IḶUAIAN 20:18

Naonda in intau mita nokodongog kon gotup bo singog in torompet, bo nokoontong kon kilat bo buḷud inta nopuḻing poyok, mosia urot mako sin moondok bo sinimindogdon iyumayú.

YEHEZKIEL 10:5

Singog in pongaḻikokaban in kerub mita tatua in kinodongogan nodapot kon palas kon ḷuai, naonda bo singog i Allah inta Totok in mokawasa.

OUMAN IN RASUL MITA 9:7

Bayongan in intau inta noyotakinnea in nongoitaḻikokog bo pinunguḷ; sin mosia in nokodongog domandon kon singog tatua táe diábí tobatúmai intau in inontong monia.

WAHYU 11:19

Dá nobukatdon in Baḷoi Allah kon soroga, bo kinoontongandon in Poti Dodandian kon bonunea. Bo nongilatdon moyo-moyodudui bo gonugur in gotup inta modowawá mako, takin doman ḻinug bo uyan eis inta totok morogot.

WAHYU 14:2

Bo dinongogku in singog nongkon ḷangit naonda bo singog in dunuk moḷoben bo ná doman singog in gotup inta totok in moropot. Singog inta dinongogku tua ná doman onda bo singog in kecapi mita inta kinuti in intau inta motaau mokuti.

WAHYU 6:1

Onda intua inontongku ki Adí in Domba tatua noḷosi kon meterai muna inta kon sigad in meterai pitu tatua. Bo dinongogku in tobatú mahaḷuk inta kon sigad in mahaḷuk opat tatua in noguman, “Igai!” Singog-Nea naonda bo singog in gotup.

WAHYU 8:5

Nopaḷut mako kon tua malaekat tatua in nogamá kon tampat pototubáan kon kamania bodongka binonuannea in tuḷu inta nongkon tampat pobobogoian kon sosumba. Nopaḷut mako pinogarabnea kon butá naa. Dá totokdon nonggotup bo nongilat inta moyodudu-duduimai bo nobaḻídon in ḻinug.