YOËL 2:19 - Alkitab Singog In Mongondow Masa In Tanaa

¹⁹ Sia in notubag kon i monia nanaa, “Tanaa in moiko komintan in ogoian-Ku: in gandum, anggur bo ḷana in zaitun sin kaanon, sinbá moiko komintan in pobotugon. Diábí pomayá-Ku mako in singkuḻeon in moiko andeka kosingan in bangusa mita.

YOËL 2:19 ပူးပေါင်းရင်းမြစ်များ

YEREMIA 31:12

Mosia in mamangoi in Tombuḷud in Sion takin pogot motamburiang, poḷat modondong takin pia in gina popisí in bayongan inta inogoi-Ku kon i monia, gandum, ḷana, anggur, sapi bo domba. Mosia in mobaḻídon naonda bo taman inta mobayong in tubignea, bo diábí kodaitan in onu bo onu.

YEHEZKIEL 34:29

Poḷumbaan-Kubí in gobá mita monia dá diá bidon in malarat in kaanon kon butá tatua. Mosia in diá bidon singkuḻeon bui in bangusa mita ibanea.

YEHEZKIEL 36:15

Diá bidon paraḷu in butá tanaa in mokodongog kon singkuḻe in bangusa mita andeka mobaba kon singkuḻe in intau. Butá tanaa in diá bidon moyompat bui kon bangusa inta nogutun kon tua. Akuoi, ki Tuhan Inta Totok in moḷantud ain nosingog.’ ”

YEHEZKIEL 36:29

Moiko in poḷuaton-Kudon nongkon bayongan in inta mokokotor kon inimu. Parentaan-Kubí in gandum sinbá mobiag motoḷubú modapot in moiko in diádon kon dodai in onda in koantugan in gogoy.

YEHEZKIEL 36:30

Dugangan-Kubí in kotoḷubú in pangkoi mita in ayopmu bo bungai mita in pinomuḷa kon gobámu, dá moiko in diádon kon dodai in onda moiyitak kon malarat in kaanon inta mokoraat kon tangoimu kon sigad in bangusa mita.

YEHEZKIEL 39:29

Akuoi in mopogonúbí in Roho-Ku kon bangusa in Israel, bo diá bidon monaḷámai bui kon i monia. Akuoi, ki Tuhan, Inta Totok in moḷantud ain nosingog.”

HOSEA 2:15

Gobá mita in anggurnea in pobuion-Kubí bui kon inia, bo Ḷopá in Roriga in baḻíon-Ku ngara pongamangan. Kon tua sia in motomu kon i-Nakó ná kon tungkuḷ in sia noguodpa, kon tungkuḷ in sia bagu iḻumuai nongkon Mesir.

HOSEA 2:21

Kon dodai intua, aka umat-Ku Israel mosambayang, Akuoi in mongindongogbí kon i monia. Nongkon ḷangit ḷabúon-Ku monag in uyan dá butá mopomungai kon gandum, anggur bo ḷana in zaitun.

YOËL 1:10

Gobá mita nogoguyaatdon in tanaa. Butá nonogumatoi; sin minatoidon in bayongan in gandum, noingkagdon in bungai in anggur, bo nodaitdon in ḷana in zaitun.

YOËL 2:24

Dá gandum in buidon momonu kon tampat pomomugutan; anggur bo ḷana in zaitun in moiḻimpóbí nongkon pomomugutan.

IMAMAT 26:5

Bungai in boyó kon butá monimu moguntu-guntuḷ, modapot in aka moiangoidon in wakutunea mosipú kon bungai in anggur, umuranpa doman in moiko moratab kon gandum. Bo aka wakutuneadon momuḷa bui kon gandum, moiko in umuranpa doman mosipú kon bungai in anggur. Moiko in diábí kodai-daitan in kaanon bo mobiag motompia kon butámu.

ZAKHARIA 8:12

Mosia in moponimboibí in bibit takin dame. Pangkoi mita in anggur monia in momungaibí, butá in mopoḷuaibí in bungainea, bo uyan in umuranbí morogot. Bayongan in barakat tatua in ogoi-Kubí kon bangusa mita inta nobiagpa nongkon bangusa tanaa.

MATIUS 6:33

Táe, tayakpa muna in ki Allah bo aidaidon onu inta kinoibog-Nea. Dá komintan tua in ogoi-Neabí doman kon inimu.

ULANGAN 11:14

Aka natua in aidan monimu, dá poonag i Tuhan in uyan kon butámu kon wakutunea, mopaḷut mako in moiko mosipun kon bungai in boyó, bo kon dodai in moiko momangkoidon momunak. Dá moiko in diádon kodaitan in gandum, anggur bo ḷana in zaitun,

RUT 1:6

Diá noonggot kon kinopatoian mako in buḷoi bo adínea inta doyowa tua kino dongogandon i Naomi kon ki Tuhan in nomarakatdon kon umat in Israel takin nobogoi in bungai in boyó inta mopia. Tuamai in ki Naomi bo mototakanea doyowa in nonoḻisídon sin monaḷámaidon kon Moab.