YESAYA 9:9 - Alkitab Singog In Mongondow Masa In Tanaa

⁹ “Baḷoi mita nongkon tela noumpagdon, táe buibí posindogon nami in baḷoi mita mobagu inta pomiaan nongkon batu. Pangkoi mita in ara pinupuḷdon, táe baḷuaianbí nami in kayu ḷokuyú in Libanon inta totok in mopia.”

YESAYA 9:9 ပူးပေါင်းရင်းမြစ်များ

DATU MITA IMITÁNEA 22:25

Ki Mikha in notubag, “Bain indoianmu in mobaḻí kon tungkuḷ in iko tumuot kon gopot tobatú sin mogadop.”

AMSAL 16:18

Aid moḷoḷatú mokopopisí kon korimumudan; mododia mokopopisí kon korumbunan.

YESAYA 26:11

Tuhan, Iko in nogoḷatdon mohukum kon musung-Mu mita, táe diábí kinotaauan monia. Pomayádon mako mosia in mooyá in mokoontong kon tabi-Mu kon umat-Mu. Pomayádon mako modait in mosia moyopú pongin hukuman inta ain pinopooḷat-Mu mako kon i monia.

YESAYA 28:1

Moboditodon in kotá inta kino ibo-ibog in intau mita moḷoḷoḷangu in Israel! Kogaganea in mopopatdon naonda bo bungang inta noḷaḷow kon tudu in uḷu monia. Moboditodon in kotá inta noḷantud monik kon yuak in ḷopá inta noḷumbá, inta kinosanang in intau mita inta nongoḷoḷangudon totok.

YESAYA 28:3

Onu inta totok in kinoibog in itoi mita inta nongoḷoḷangu tatua in ritakan.

YESAYA 46:12

Indongogaidon in Akuoi, ei intau mita moḷoḷatú, moiko inta noguman kon kauntungan in noyayúpabí.

YESAYA 48:4

Kinotaauan-Ku kon iko in motogat in gina, motontogat in uḷu naonda bo pamandot.

YESAYA 7:2

Kon dodai in ki datu in Yohuda nokodongog kon tontara in Siria in sinumuotdon kon butá in Israel bo nobaḻídon totakin, sia takin bangusanea totokdon in noondok, nodapot in gugurdon mako in mosia naonda bo pangkoi in kayu inta dinandú in tompot.

YESAYA 9:8

Bayongan in intau in Israel bo intau in Samaria in monotaaubí kon ki Tuhanbí inta ain nogaid kon tua. Tanaa moḷoḷatú in mosia bo motosiḷantud. Guman monia,

YEREMIA 32:24

Intau mita in Babel ain noposindog in dinding mita pongopungan kon ḻibu mita in kotá sin mogagow, bo tanaa mosia in nonubu. Parang, gogoy, bo yampoi in takit in mokopopisí kon kotá tanaa moḷabú kon ḻima monia. Iko in nokoontong kon bayongan inta pinoguman-Mu in noniatadon.

YEHEZKIEL 30:19

Natuata Akuoi in mohukumbí kon Mesir, dá kotaauandon monia kon Akuoibí in ki Tuhan.”

YEHEZKIEL 33:33

Bayongan inta pinogumanmu tatua in mobaḻíbí, bo aka moiangoidon in wakutunea, kotaauandon monia kon nokoimontandon in nabi tobatú nogutun kon yua-yuak monia.”

YEHEZKIEL 7:27

Datu in mogamui, ki adí ḷoḷaki in datu kobuḻian in kamang bo rayat in gugur mako sin moondok. Akuoi in mohukumbí kon i monimu podudui in bayongan in aidmu bo mohakim kon i monimu ná pinohohakim monimu kon intau ibanea. Dá kotaauandon monimu kon Akuoibí in ki Tuhan.”

YEHEZKIEL 7:9

Akuoi in diábí motabi andeka mongampung kon inimu. Akuoi in mohukumbí kon inimu podudui in bayongan in aid moromú inta ain inaidan monimu. Dá kotaauandon monimu kon Akuoibí in ki Tuhan bo Akuoibí in nohukum kon i monimu.”

HOSEA 8:14

Intau in Israel noposindog in komaḻig mita, táe mosia in nokoḻiong kon i Inta nomaḻí kon i monia. Intau in Yohuda nodugang kon kobayong in kotá mita inta dininding, táe Akuoi in mopoonagbí in tuḷú sin momagong kon bayongan in komaḻig bo kotá mita monia.”

MALEAKHI 1:4

Aka buí i Esau, intau mita in Edom tatua in noguman, “Kotá mita nami ain irimumud, táe buibí posindogon nami,” dá ki Tuhan in motubag, “Mosia in motaaubí moposindog bui, táe bui-Kubí umpagon in sia. Mosia in tangoionbí ‘Butá moraat’ bo ‘Bangusa inta kinotugatan in torú i Tuhan modapot in mononoi.’ ”

MALEAKHI 3:13

Ki Tuhan in noguman, “Tosingogonmu mita in totuubí kon mopoompámai kon i-Nakó.” “Táe moiko in moguman, ‘Onu degá in siningog nami kon ini-Mu?’

MALEAKHI 4:1

Guman i Tuhan Inta Totok in mokawasa, “Moiangoibí in wakutunea bayongan in intau inta moḷoḷatú bo inta moraat in tubáan naonda bo wawa. Kon singgai tatua mosia in tubáan modait, bo diá in tonggagatan in kon i monia.

PETRUS 1 5:5

Ná doman tua, utatku mita inta nongomudapa, mokopotoindudui kon guyanga mita. Moiko in musti mokopoompá kon dodia bo moibog doman mosibantungan sin kon Buk Motusi ain pinais nanaa: “Ki Allah in mohukum kon intau inta mokaḷakuang, táe motabibí kon intau inta moompá in dodia.”