YESAYA 11:4 - Alkitab Singog In Mongondow Masa In Tanaa

⁴ Intau bogá ihakimnea kinoadil, intau inta diá kodaya dinuḷuannea takin gina motuḻid; intau kotaḷá ihukum podudui in parentanea, intau moraat iyompatnea.

YESAYA 11:4 ပူးပေါင်းရင်းမြစ်များ

SAMUEL 2 8:15

Natuata in nobaḻí ki Daud nomarenta kon bayongan in Israel bo noḷukad sinbá rayatnea in umuran koadilon bo kopiaan in pomomarenta.

AYUB 15:30

Sia in diábí moiḷagui kon sindip; tuḷú in momokakbí kon tokatnea mita. Moputúbí in sia in tompot nongkon bibig i Allah.

AYUB 4:9

Naonda bo deḷang, natuata in torú i Allah momutú kon i monia dapot in moyopú!

MAZMUR 110:2

Nongkon Sion ki Tuhan in mopooḷadbí in dodatuanmu; kawasaaidon in musungmu mita!

MAZMUR 18:8

Bo nodandú in dunia bo noḷundan, apad mita in buḷud nodandú bo mogugur popisí in torú i Allah.

MAZMUR 2:9

Mosia in putoḷonmubí in tungkud uatoi bo ḷosionmu naonda bo kuyon butá.’ ”

MAZMUR 76:10

Kon tungkuḷ in Iko simindog sin monisigdon sin moposaḷamat kon intau inta dinorot kon dunia.

YESAYA 1:17

pobalajardon mogaid kon inta mopia. Posindogdon in inta moadil bo ḷumbúdon in aid mondorot; ogoidon kon uno-unon in hak monia bo duḷuai in pelekara in boba-bobay mita.”

YESAYA 13:11

Ki Tuhan in noguman, “Akuoi in mohukumbí kon dunia popisí in aidnea moraat, bo intau mita inta moraat popisí in dosa mita monia. Bayongan in inta moḷoḷatú in poompáan-Kubí, intau mododia bo moromú in hukumon-Ku.

YESAYA 14:30

Moiko in koantuganbí in malarat in gogoy inta motoyang, bo bayongan in intau inta kinotaḷáan in ḻimodonbí. Noyotoḻikud kon tua, intau inta totok in nobogá nongkon umat i Tuhan in mokouḻíbí kon kaanon, bo intau mita inta diá kodaya in mobiagbí moaman bo mobiag motompia.

YESAYA 16:5

Onda intua intau tobatú nongkon buí i Daud in mobaḻí datu, bo sia in momarenta kon bangusanea podoyon kon tabi bo satia. Sia in moposindog in inta moadil bo moḷamemet in mogaid kon inta mobanar.)

YESAYA 2:4

Sia in mohakimbí kon sigad in bangusa mita, bo momontow kon pelekara kon sigad in suku mita in bangusa. Pitow in tontaḷon pomiaan pajeko, bo ginubat aidan roratab. Bangusa mita in diábí mositubuan, diábí domandon mosadia moparang.

YESAYA 26:6

Intau mita bogá bo inta mororiga in moritakbí kon inia.”

YESAYA 29:19

Intau mita bogá bo mokooyá in mokorasadon bui kon kobiagan mopia inta inogoi i Allah inta mokudus Allah in Israel.

YESAYA 3:14

Ki Tuhan in mobaḻí hakim kon itoi mita in umat-Nea. Naa in ponapud i Tuhan kon i monia: “Moiko inta nogagow kon bungai in anggur kon gobá mita; baḷoimu nopuḻing in pakakat inta inagow monimu kon intau bogá.

YESAYA 30:28

Sia in nopotabá in tompot umuna kon i-Nia naonda bo ḷunud modapot in sigogow inta mokoiḻig kon bayongan yagi-yagi. Sia in moyopú kon bangusa mita, bo diá mopotuoi kon tomayá mita monia inta moraat.

YESAYA 30:31

Intau in Asyur in modoḻiokbí aka mokodongog kon singog i Tuhan bo mokorasa kon hukuman-Nea inta mobogat.

YESAYA 30:33

Nongkon koḻipodpabímai ain sinadia in tampat potubáan kon i datu in Asyur. Tampat tatua modaḷom bo mooḷad, binonuan in kayu pondungú inta noyoguntuḷdon. Ki Tuhan in mopoyongkitdon intua pongin mopoirup in poginaan-Nea ná ongkag in balerang.

YESAYA 32:1

Indoiaidon, moiangoibí in wakutunea datu tobatú momarenta moadil bo itoi mita in bangusa mopobayá in inta moadil.

YESAYA 32:7

Bo intau mouboḷ morai bo mogaid kon onu inta moraat. Sia in motayak kon daya sin mopobodito kon intau bogá pongin tosingogon mita inta uboḷ bo moḷamboi kon i monia mokouḻí kon haknea.

YESAYA 33:22

Bayongan in touḷut kon kapaḷ monia diá in mangaḻenea; ḻeagnea mita diá motaau songkaan! Bayongan in kaoyúonan in musung in agowon naton, bo mobayong totok, modapot in intau ḻempeng in mokouḻíbí doman kon tonsilai. Ki Tuhan tontaní in mobaḻí datu naton; Sia in momarenta, moposindog in hukum bo moposaḷamat kon i naton nongkon musung.

YESAYA 40:7

Bonok in moingkag bo bungang in moḷaḷow, aka ki Tuhan mopoirup in tompot inta mopatú. Totuubí kon bangusa tatua in naonda bo bonok.

YESAYA 49:2

Binaḻí-Nea in tosingogonku mita ná koḷanit in pitow, ḻima-Nea tontaní in pinoḷukad-Nea kon inakó. Binaḻí-Nea in akuoi naonda bo piot inta inatá, bo sinagúnea kon bonu in potoḷónea sinbá kosadi-sadiadon pakéon.

YESAYA 61:1

Kawasa i Tuhan Inta Totok in Moḷantud oyúon kon inakó; Sia in nomiḻí bo nopotabá kon inakó sin modia kon habar mopia kon intau nobogá bo moḻipoi kon intau inta nokuyang in ginanea, sin mopotaau kon intau inta sinokodakop kon mosia in ḷagidon poḷuaton, bo kon intau mita kon bonu in ponjara kon mosia in ḷagidon poḷuaion.

YESAYA 9:7

Ki Tuhan ain nopoḷabú in hukuman kon dodatuan in Israel.

YEREMIA 33:15

Kon dodai intua intau moadil tobatú nongkon buí i Daud in piḻíon-Kubí mobaḻí datu. Datu tatua in mogaid kon onu inta moadil bo inta totuu kon sinangkub in butá.

YEREMIA 5:28

bo moḷongó bo mobiag motompia. Aid monia moraat diá in imbuitnea. Mosia in diábí moadil kon pelekara in adí mita uno-unon, bo diá moduḷu kon hak in intau mita inta dinorot.

HOSEA 6:5

Tuamai in Akuoi nopotabá in nabi-Ku mita sin mopotaau kon inimu onu inta ain sinantú-Ku kon moiko in mustibí hukumon bo yopúon. Inta koibog-Ku kon i monimu in nobayag bo nosilang bidon:

ZEPANYA 2:3

Angoidon bui kon i Tuhan, ei bayongan intau inta moompá in dodia kon butá tanaa, bo bayongan in intau inta dinumudui kon parenta-Nea mita. Pogaidon kon onu inta kinoibog i Tuhan, bo pokoompádon kon dodia kon tayowon-Nea. Dika-dika bo iko in moisimparut nongkon hukuman kon singgai ki Tuhan mopoontong in torú-Nea.

MALEAKHI 4:6

Baḻíonneabí in guyanga mita ḷoḷaki bo ki adínea mita motobatú kon gina, sinbá Akuoi in diá mamangoi sin moyompat kon butámu.”

MATIUS 11:5

Moiko ain nokoontong: intau bilog mokoindoi, intau ḻempeng mokobayá, intau pinanyaki kuḻit inta mokorongó nopia, intau bongoḷ mokodongog, intau minatoi in nobangon bo Habar Mopia pinoyaput kon intau mita bogá.

MATIUS 5:5

Pia in kamang in intau inta moaḷus in oaid bo pososingog sin mosia tua i motarima kon dandi i Allah.

OUMAN IN RASUL MITA 9:1

Wakutu intua ki Saulus umuranpabí mogogondok bo moḻimod kon bayongan intau inta ain nopirisaya kon i Tuhan Yesus. Sia in minayá kon i imang moḷoben,

KORINTUS 2 10:1

Akuoi ki Paulus, inta kain intau in diá mobarani moyogintayow mako, tongá mobarani aka moyogiyayúan monimu. Tanaa mako pinodoyon kon koaḷus bo kopopia in gina i Kristus,

GALATIA 5:23

moompá in dodia, bo mokotahang kon gina. Diábí in hukum agama in molarang kon oaid mita natua.

TESALONIKA 2 2:8

bain tua bo koontongandon in intau moraat tatua. Sahingga in aka ki Tuhan Yesus mamangoi yo ḻimodon-Nea in intau moraat tatua takin tompot inta pogirup-Nea, bo yoyangon-Nea wakutu in Sia mamangoi takin kamuliaan-Nea.

TITUS 3:2

Tongginaai sinbá mosia in diá umuran moibog moponapud in uboḷ kon intau ibanea andeka moibo-ibog mobobayowan i inekadon, sin maníka umuran mokopopia kon dodia kon tumpaḷa intau bo mokopoaḷus doman kon pososingog takin bayongan in intau.

YAKOBUS 3:13

Aka kon sigad monimu oyúon intau inta mobijaksana bo mopandoi, yo mustibí intua poniatanea kon kobobiag mopia takin mogaid kon soaḷ mita inta mopia, inta sinakinan in gina inta diá mosiḷantud bo kabijaksanaan.

WAHYU 1:16

Ḻima-Nea koḷanan in nokadai kon tundi pitu, bo kon bibig-Nea iḷumuai in tobatú pitow moḷanit inta doyowa in matanea. Pogot-Nea in monindar naonda bo mata in singgai inta noutudon.

WAHYU 19:11

Noiduduimai kon tua inontongku in soroga nobukat, bo inontongku oyúon in tobatú kabaḷo nobudó. Ki inta sinumakoi kon kabaḷo tatua, tangoinea ki Mosatia bo ki Mobanar. Sia in moadilbí in monantú kon hukuman bo kon parang.

WAHYU 19:15

Nongkon bibig-Nea tua iḷumuai in tobatú pitow inta moḷanit bo inta pakéon-Nea monaḷow kon bangusa mita. Sia in nomarenta kon i monia takin tungkud uatoi. Sia in momugut kon anggur kon bonu in tampat pomomugutan kon anggur torú i Allah Inta Totok in Mokawasa.

WAHYU 2:16

Sin tuamai, pogogaidon in mogaid kon dosa mita monimu! Aka diá, yo ḷagidon in Akuoi mamangoi kon i monimu bo duduran-Ku in pitow inta kon bibig-Ku in intau mita tatua.