YEREMIA 7:30 - Alkitab Singog In Mongondow Masa In Tanaa

³⁰ Intau in Yohuda ain nogaid kon inta moraat. Berhala mita monia inta kinorongó-Ku tua ain inukat monia kon bonu in Baḷoi-Ku, nodapot in nokonajisdon kon tua.

YEREMIA 7:30 ပူးပေါင်းရင်းမြစ်များ

DATU MITA 2 21:3

Tampat mita pososumbaan kon dewa inta ain inumpag i Hizkia ki amánea in buineabí pinosindog. Noposindog in sia in mezbah mita sin poibadaan kon i Baal, bo nogaid kon patong i Dewi Asyera, ná inta pinomia i Ahab datu in Israel. Ki Manasye in nosumba doman kon tundi mita.

DATU MITA 2 21:4

Ki Tuhan in ain noguman kon Yerusalem in tampat koangoian-Nea bo tampat pooibadaan kon i-Nia, táe kon tua kon Baḷoi Tuhan, ki Manasye in noposindogdon in mezbah mita kon dewa mita.

DATU MITA 2 21:7

Lambang i Dewi Asyera in sinagúnea kon bonu in Baḷoi Tuhan, bokaka soaḷ tampat tatua ki Tuhan in nogumandon kon i Daud bo kon i Salomo ki adínea ḷoḷaki, “Baḷoi-Ku bo Yerusalem naa, inta ain piniḻí-Ku nongkon sigad in butá in suku in Israel inta mopuḷú bo doyowa, in tampat inta ain sinantú-ku mobaḻí tampat pooibadaan kon i-Nakó.

DATU MITA 2 23:12

Mezbah mita inta pinosindog in datu mita in Yohuda kon atop kon ḻimonik mita in gopot i Datu Ahas in irimumud. Ná doman tua in mezbah mita inta pinosindog i Datu Manasye kon bosí posiḷosi in Baḷoi Tuhan, irimumud i Yosia, bo iḷumbú kon Ḷopá in Kidron.

TAWARIKH 2 33:15

Iḷumbúnea in patong mita in dewa in bangusa mita ibanea bo berhala mita inta ain inukatnea kon Baḷoi Tuhan. Kinokainea in mezbah mita in berhala inta kon buḷud kon Baḷoi Tuhan, bo kon tampat mita ibanea kon Yerusalem. Tua komintan in dinianea kon ḷuai in kotá bo iḷumbú.

TAWARIKH 2 33:3

Tampat mita pososumbaan kon berhala inta ain irumbun i Hizkia, ki amánea, pinosindognea bui. Sia in noposindog in mezbah mita sin poibadaan kon i Baal, bo nogaid in sia kon patong mita i Dewi Asyera, bo poḷat nosumba kon tundi mita.

TAWARIKH 2 33:7

Patong in berhala inukatnea kon bonu in Baḷoi Tuhan, bokaka tampat tatua in pinoguman bidon i Allah kon i Daud bo kon i Salomo ki adínea ḷoḷaki, “Baḷoi-Ku kon Yerusalem naa, inta ain piniḻí-Ku nongkon sigad in mopuḷú bodoyowá in butá in suku Israel, in tampat inta ain sinantú-Ku nobaḻí tampat pooibadaan kon i-nakó modapot in mononoi.

YESAYA 66:4

Tuamai Akuoi doman in mogaidbí kon onu in koibog-Ku bo mopouma kon i monia in bodito mita inta koondok monia. Sin kon tungkuḷ in Akuoi nogoiní, diá in notubag; kon tungkuḷ in Akuoi nosingog, diá in nokidongog. Mosia in moibo-ibogbí moḷawang kon i-Nakó bo mogaid kon inta moraat.”

YEREMIA 16:18

Dosa bo aid monia moraat in tuḻían-Kubí pongin hukuman kodua noguntuḷ, sin mosia in noponajisdon kon butá-Ku takin berhala mita. Berhala mita tatua in diábí konyawa naonda bo mayat.”

YEREMIA 23:11

Ki Tuhan in noguman, “Nabi bo imang doí tumoḷutui kon i-Nakó. Nodapot in kon Baḷoi-Ku kinouḻían-Kudon in mosia nogaid kon inta moraat.

YEREMIA 32:34

Nodapotbí in baḷoi inta pinosindog poibadaan kon i-Nakó ain pinonajis monia pinongin nogukat kon berhala mita monia inta mokorongó kon tampat tatua.

YEREMIA 32:35

Mosia in noposindog in mezbah mita kon i Baal kon Ḷopá in Hinom, bo noposumba in adí mita monia kon i Dewa Molokh. Bokaka, Akuoi in diábí nokoimontanmai in nokiaid in natua kon i monia, noidapotbí in diábí kon dodai in onda in noigonúmai kon gina-Ku kon mosia in mogaid kon inta totok in moraat natua bo mokopopisí kon intau in Yohuda baradosaan.”

YEHEZKIEL 7:20

Dungkuḷmai mopia in gina monia kon permata monia inta mongogaga, táe popisí in pinakédon monia nomia kon berhala mita inta mokorongó, dá binaḻí i Tuhan in kapunyaan monia nobaḻí inta mokokoningkim.

YEHEZKIEL 8:3

Sia in nopotonggó in naonda bo ḻima, bo norambun kon buokku. Onda intua kon bonu in oontongon tatua, akuoi sinintak in Roho i Allah kinoḷantud namonik in ḷangit bo dinia kon Baḷoi Tuhan kon Yerusalem, kon ngara tumuot kon dangkuḷon inta kon bonunea kon dotá in utuan. Kon tua oyúon in patong berhala inta ain nokopomuká kon torú i Allah.

DANIEL 11:31

Bo sia in nokidia in tontara mita inta nokokotor kon Baḷoi i Tuhan. Mosia in momopatbí kon kuruban muḷoi in singgai bo moposindog in inta mokokoningkim inta sinangoian Aid moraat inta mokorimumud.

DANIEL 9:27

Datu tatua in momiabí kon dodandian moropot takin mobayong in intau pitu notaong in koonggotnea. Kon ruak in wakutu inta sinantú tatua, sia in mopogogaibí in mobogoi in kuruban bo sosumba. Onda intua inta mokokoningkim inta sinangoian Aid moraat inta mokorimumud in ukatonbí kon Baḷoi Tuhan bo umuranbí kon tua modapot in sia inta nogukat kon tua koḷabúan in koyopúan inta ain sinantú i Allah kon inia.”