YEREMIA 4:7 - Alkitab Singog In Mongondow Masa In Tanaa

⁷ Ná singa inta iḻumuai nongkon pinogadopannea natua doman nobuatdon in momomutú kon bangusa mita inta namangoi sin momutú kon Yohuda. Kotá mita in Yohuda in mobaḻídon dongka rumbunnea tampat inta diá inutunan in intau.

YEREMIA 4:7 ပူးပေါင်းရင်းမြစ်များ

DATU MITA 2 24:1

Kon bonu in pinomarentaan in Datu Yoyakim, ki Nebukadnezar datu in Babel nonubu bo nopotungkud in Yohuda. Toḷu notaong in koonggotnea ki Yoyakin in sinumungkud kon i Nebukadnezar, táe noiduduimai kon tua nomarontak in sia.

DATU MITA 2 25:1

Onda intua ki Zedekia in nomarontak kon i Nebukadnezar datu in Babel. Tuamai in ki Nebukadnezar takin bayongan in tontaranea namangoi bo nonubu kon Yerusalem kon singgai impuḷúnea kon buḷan noginpuḷú kon taong noginsiow kon pinomarentaan i Zedekia. Mosia in noposindog in markas kon ḷuai in kotá, noposindog doman in dinding pongopungan,

YESAYA 1:7

Ḻipúmu ain iyompat; kotámu mita in nodaitdon sinurub. Koonto-ontongmu in intau ango-angoi mogamá kon butámu bo morimumud kon bayongan yagi-yagi.

YESAYA 5:9

Dinongog-Ku in ki Tuhan Inta Totok in mokawasa in nongibot, “Baḷoi mita inta moḷoben bo inta mongogaga tanaa komintanbí taḷaanmai bo diá utunan.

YESAYA 6:11

Akuoi in noḻibó, “Dapot in toonu in kaadaan tanaa, Tuhan?” Tubag-Nea, “Modapot in kotá mita mogoguyaatdon bo diádon in mogogutunnea, baḷoi mita diádon inutunan, bo butá in diádon in bonunea bo moḷogatdon,

YEREMIA 2:15

Musungnea in noganggor kon inia naonda bo singa, butánea in binaḻídon noḷogat bo diá in mangaḻenea, kotánea mita in nodait kinaan in tuḷú, pinomayádon mako diá in mogogutun.

YEREMIA 22:6

Bo kon i-Nakó yo komaḻig in datu in Yohuda in totuubí kon mogaga, ná kogaga in butá in Gilead bo buḷud mita in Libanon; táe tampat tatua in baḻíon-Kubí naonda bo padang gurun inta diá inutunan in intau.

YEREMIA 22:7

Potabá-Kubí mangoi in intau sin morimumud kon inia. Mosia in modiabí kon boḻiung, bo mogumpag kon oiginea mita inta mogaga inta pinomia nongkon kayu ḷokuyú in Libanon. Bo mosia in mopogambatbí intua kon bonu in tuḷú.

YEREMIA 25:38

Naonda bo singa iḻumuai nongkon bubúnea, natuata in ki Tuhan iḻumuai sin mohukum kon umat-Nea. Koḻingáan in parang bo torú i Tuhan in nomaḷuidon kon butá tanaa nobaḻí padang gurun.

YEREMIA 25:9

‘Akuoi in mogoiníbí kon bayongan in bangusa nongkon utuan, bo mogogundoi-Ku doman, ki Nebukadnezar datu in Babel. Mosia in potabá-Ku moparang monayow kon Yohuda bo intau inta nogutun kon bonunea takin bayongan in bangusa kon diugneamai. Bangusa in Yohuda takin bangusa mita topodiugneamai in yopúon-Ku bo bióon-Ku mako in morimumud modapot in mononoi. Intau mita inta mokoontong kon inia in moitaḻikokogbí bo mokoningkim. Akuoi, ki Tuhan, ain nosingog.

YEREMIA 26:9

Mokobaḻíbí totok in iko in moguman podoyon kon tangoi Tuhan kon Baḷoi-Nea naa in mobaḻí naonda bo Silo, bo kotá tanaa in yompaton bo mobaḻí tampat inta diádon utunan.” Bo akuoi in iḻipung in intau mobayong.

YEREMIA 27:8

Bangusa andeka dodatuan inta doí mokiompu kon i Nebukadnezar in hukumon-Ku pongin parang, gogoy, bo yampoi in takit, modapot in kon imbuitnea bangusa tatua in mokiompubí doman.

YEREMIA 33:10

Ki Tuhan in noguman, “Intau in moguman kon tampat tanaa naonda bo padang gurun, diábí in intau andeka mahaḷuk in mogutun kon tua. Tosingogon monia in totuubí, sin kotá mita in Yohuda bo daḷan mita kon Yerusalem in diádon komintan in bonunea; Diá in intau andeka mahaḷuk inta nogutun kon tua.

YEREMIA 34:22

Parentaan-Kubí in mosia sinbá mobuidon mangoi kon kotá tanaa, poḷat monubu, mogagow, bo monurub. Kotá mita in Yohuda in baḻíon-Ku naonda bo padang gurun inta diá inutunan in intau. Akuoi, ki Tuhan, ain nosingog.”

YEREMIA 4:29

Kinodongogan in dowawá in tontara inta sinumakoi kon kabaḷo bo momomiot, nokopopisí kon bayongan in intau noḷagui mopogoa-goa. Kayuon mita sinuotan monia, buḷud batu sinakod monia. Bayongan in kotá noingongowdon, diádon in moibog mogutun kon tua.

YEREMIA 44:2

Naa in koyow i Tuhan Inta Totok in mokawasa, Allah in Israel, kon i monia, “Moiko tontaní ain nokoontong kon bodito inta pinopouma-Ku kon Yerusalem bo bayongan in kotá ibanea kon Yohuda. Nodapot in tanaa mako kotá mita tatua in umuranpabí norimumud bo diá in nogutun.

YEREMIA 46:18

Akuoi ki Allah inta nobiag, Akuoi in datu, Tuhan Inta Totok in mokawasa. Naonda bo Buḷud in Tabor noipantow kon sigad in buḷud mita, bo Buḷud in Karmel noipantow nongkon dagat, natuata in ropot i inta mamangoi monubu kon inimu.

YEREMIA 49:19

Naonda bo singa inta noitukat magí nongkon kayuon moromon kon diug in Ongkag in Yordan bo namangoi in rawang pinopokaanan kon domba, natuata in Akuoi mamangoi bo baḻíon-Ku in intau in Edom baḷú moḷagui nongkon butá monia. Bo piḻíon-Ku in itoi tobatú sin momarenta kon bangusa tatua. Ki ine degá in motaau potongkaion kon i-Nakó? Ki ine in mokobaḻí mopelekara takin-Ku? Degá oyúon in itoi in motaau moḷawang kon i-Nakó?

YEREMIA 5:6

Tuamai mosia in ḻimodon in singa nongkon kayuon, bo bera-berakon in serigala nongkon padang gurun. Macan tutul in maya-mayábí mako motayak kon kaanonnea kon diug in kotá mita monia, bo pomuḷoi in intau inta ḷumuai in domokonbí. Tua komintan in mobaḻí popisí in mosia umurandon mogaid kon dosa, bo mopobui-buimaidon in monoḻikud kon i Allah.

YEREMIA 50:17

Ki Tuhan in noguman, “Intau in Israel in naonda bo paanan in domba inta inaḷowan bo pinorarit in singa. Dungkuḷ totok mosia in sinubu i datu in Asyur, bodongka ki Nebukadnezar datu in Babel nonotop kon tuḷan mita monia.

YEREMIA 50:44

Naonda bo singa inta noitukat nongkon kayuon noromon kon diug in Ongkag in Yordan bo namangoi in rawang popokaanan in domba, natuata in Akuoi, ki Tuhan, in mamangoi bo mopobaḻí kon intau in Babel daḻí moḷagui nongkon kotá monia. Bo Akuoi in momiḻí kon itoi tobatú sin momarenta kon bangusa tatua. Ki ine in motaau popotongkaian kon i-Nakó? Ki ine in mokobaḻí mopelekara takin-Ku? Oyúon degá in itoi in mokoḷawang kon i-Nakó?

YEREMIA 8:16

Musung in kon kotádon in Dan; kurik in kabaḷo in kodongogandon, bo sinangkub in butá noondokdon. Musung in namangoi sin morimumud kon sinangkub in butá naton, bo kotá doman naton bo bayongan in intau inta nogutun kon tua.”

YEREMIA 9:11

Ki Tuhan in noguman, “Yerusalem in baḻíon-Ku apug tampat pogogadopan in ungkú in kayuon. Kotá mita in Yohuda in moingongowdon, tampat inta diádon pinogutunan.”

YEHEZKIEL 12:20

Kotá mita inta tanaa nopuḻing in intau in rimumudon bo gobá mita in tudunea in mobaḻídon ḷogat. Dá kotaauandon monia kon Akuoibí in ki Tuhan.”

YEHEZKIEL 21:31

Popotugat-Kubí kon i monimu in torú-Ku inta modoko-dokot. Bo moiko in ogoi-Kubí kon intau mita inta moḻingá inta nobiasadon moḻimod.

YEHEZKIEL 32:2

“Ei intau ilo-ilow, potoingatdon totok kon i datu in Mesir. Potaau in koyow-Ku tanaa kon inia, ‘Iko in tumon naonda bo singa batánea kon sigad in bangusa mita, táe iko in naonda bo bangkeḻé inta mogutun mako kon tubig. Sioḷmu in mokoḷobog bo mokokotor kon bayongan in ongkag.

DANIEL 5:19

Totuu moḷoben in sia, nodapot in intau mita nongkon bayongan in bangusa, inanakan, bahasa, mourot bo moondok kon inia. Aka moibog in sia moḻimod kon intau, ḻimodonneabí doman mako in intau tatua. Aka moibog in sia moposaḷamat kon intau, dá posaḷamatonneabí doman in intau tatua. Sia in mopoḷantud andeka mopoompá kon i ineka podudui in ibognea.

DANIEL 7:4

Inta muna batangannea in naonda bo singa, táe kokoḻikipan ná koḻikip in ḷagapan garuda. Naonda in inindoianku, daḻídon norabut in koḻikipnea bo noḷabú; noibingkat in sia nongkon butá bo pinosindog kon sioḷ doyowa naonda bo intau, bo inogoian in raian intau.

IMAMAT 26:31

kotámu mita umpagon-Kudon, tampat mita pososumbaanmu in rimumudon-Kudon bo kurubanmu mita in diá tarimaan-Ku.

IMAMAT 26:33

Popoangoi-Ku in parang kon butá monimu bo poyayiton-Kudon in moiko kon butá in intau. Gobá mita monimu moibiardon mako, bo kotámu mita pomayádon mako in mogoguyaat.