YEREMIA 4:30 - Alkitab Singog In Mongondow Masa In Tanaa

³⁰ Ei Yerusalem, iko in sinaḷáandon bo diádon mokopongonu! Onubí in mangaḻenea in mogiḷambung in ḷambung nopura bo moḷambá kon awak mopomaké in buḷawan bo saḷaka, poḷat moponggares in cilá kon mata? Diábí in mangaḻenea in iko in mopogaga in pogotmu, sin intau mita inta kinotabimu in doí bidon kon inimu, nodapotbí in mosia in moibogbí morabut kon nyawamu.

YEREMIA 4:30 ပူးပေါင်းရင်းမြစ်များ

DATU MITA 2 9:30

Noiyaputdon in ki Yehu kon Yizreel. Naonda in kinodongogan i Izebel onu inta ain nobaḻí, nonoguḷanoi in sia kon buoknea bo nomaké in cilá, bo iḷumongow monag nongkon jandela in komaḻig.

AMSAL 6:25

Dika in iko koakaḷan monia in koḷunat monia, dika moitontong kon mata monia inta modondouḷug.

AMSAL 7:10

Bobay tatua in bobay inta diá motantú in mogutun kon baḷoinea. Topi-topí kon bingkí in daḷan in sia, onda intua kon rawang, andeka simindog mogoḷat kon poyotangaan in daḷan. Dodianea in mobarani bo diá oyáan. Inontongku in sia iḻumuai nogiḷambung naonda bo sundaḷ, bo nokipodungkuḷ kon tayowmobiag tatua takin tomayá inta moraat.

YESAYA 10:3

Onu in pomiaan monimu kon singgai ki Allah mohukum kon i monimu? Onu in aidanmu kon dodai in Sia mopoangoi in anib nongkon ḻipú inta moyayú? Ki ine in pokituḷungan monimu? Kon onda in pobunian monimu kon kaoyúonanmu tatua?

YESAYA 20:6

Kon tungkuḷ intua intau mita inta nogutun kon bingkí in dagat in mogumandon, ‘Indoiaika onu inta nobaḻí kon bangusa inta pinongata naton sin moḷukad kon i naton nongkon datu in Asyur. Umpaka yo mosaḷamat in kita?’ ”

YESAYA 33:14

Intau mita binaradosa kon Sion mourot popisí in moondok. Guman monia, “Bontow in tosingogon i Allah in naonda bo tuḷú inta nodokot modapot in mononoi. Degá oyúon in mokotahang kon bonu in tuḷú inta moyopú tatua?”

YEREMIA 13:21

Onu in singogon monimu aka intau mita inta binaḻí monimu yobayatmu mita nonaḷow bo mongawasa kon i monimu? Notantúbí kon korasaan monimu in monakit naonda bo bobay inta koyogot mononggadí.

YEREMIA 22:23

Moiko in mogutun moaman iḻibu in oigi mita in kayu ḷokuyú in Libanon, táe kon singgai moiduduimai aka moiko kotugatan in inta mokonakit, moiko in mororigabí naonda bo bobay inta koyogot in mononggadí.”

YEREMIA 30:14

Bayongan in intau inta kinoibogmu nokoḻiongdon kon inimu; mosia in doí bidon morai kon inimu. Naonda bo musung Akuoi ain nonubu bo nohukum kon i monimu kinoḻingá, popisí in nobayongdon in dosamu bo moḷoben in taḷámu.

YEREMIA 5:31

nabi mita in monguboḷ, imang mita mogundoi podudui in ibognea tontaní bo moiko umat-Ku in moibog doman kon natua. Táe onu in aidan monimu aka moiangoidon in singgai imbuitnea?”

OMBAḶ 1:19

Akuoi in nogoiní kon yobayatku mita inta mongodagin táe nomaḻidawan in mosia kon inakó. Imang mita bo itoi in bangusa komintandon minatoi kon daḷan mita in kotá. Kon tungkuḷ in notayak kon kaanon sinbá mobiagpa.

OMBAḶ 1:2

Kinoouput in doḷom sia in mongombaḷ moajar in gina, ḷuánea in motutug kon putongi. Diá tobatúmai in kon sigad in yobayatnea mita in moibog moḻipoi kon inia. Sia in Pinomaḻidawan in yobayatnea mita inta ain nonoḻikud bo nobaḻídon musung.

OMBAḶ 4:17

Moḷopídon in mata nami in moindoi, mogoḷat mako kon totuḷung inta diá doman moiango-angoi. Kami in moharap mako kon totuḷung in bangusa tobatú, inta sabanarnea in diábí mokoogoi kon onu bo onu.

YEHEZKIEL 28:13

Pogogutunanmu in kon Eden, taman i Allah. Pakeangmu iḷambáan in noyagi-yagimai in permata: batu delima bo intan, topas, batu pirus, batu yakut, ratna, cempaka, batu nilam, zamrud bo batu alkali nopura. Ḷambá buḷawanmu in mobayong doman. Pakakat mita tatua in pinomia kon inimu kon singgai iko binaḻí.

YEHEZKIEL 28:9

Yo, aka moiangoidon in wakutunea tatua, mokopogumanpa degá in iko kon iko in ki Allah? Kon tayowon in moḷoḻimodmu mita, moniatadon kon iko in tongábí intau ilo-ilow.

OBAJA 1:7

Iko in inakaḷan in intau mita inta noyopopogmumai, bo inuntun nongkon butámu. Iko in sinaḷow in yobayatmu mita, pinotobok in intau mita inta nongaan noyotakinmu. Mosia in mopoḻibo-ḻibómai kon soaḷ iko, ‘Kon onda degá in bayongan in kopopandoinea?’

IBRANI 2:3

Apapa doman oyúon in kasaḷamatan inta motoya-toyang nongkon koyow mita tatua! Aka tongá pomayá mako naton in kasaḷamatan tatua, dá tantú diábí in kotaḻiban hukuman tatua in kita. Sin ki Tuhanbí tontaní in muna-munamai noguman kon kasaḷamatan tatua. Bo intau inta muna-munamai nokodongog kon Habar tatua in noguman doman kon i naton kon totuubí mita in habar tatua.

WAHYU 17:13

Mosia naa in notobatúbí kon singog bo makusud kon moposarakan in ropot bo kawasa monia kon mahaḷuk tatua.

WAHYU 17:2

Datu mita kon dunia naa ain nogaid kon inta mokotor takinnea, bo bayongan in intau kon dunia naa ain noḷoḷangu sin nonginum kon anggur inta ain kinotorannea.”

WAHYU 17:4

Bobay tatua nogi ḷambung in ḷambung nopars bo nopura noguyang, bo iḷambáan in buḷawan mita, permata bo mutiara. Sia in kokada-kadai in tobatú palo buḷawan inta nopuḻing in soaḷ mita inta moraat bo mokotor, bungai mita in aid monia inta mongokotor.