YEREMIA 38:4 - Alkitab Singog In Mongondow Masa In Tanaa

⁴ Dá minayádon in pojabat mita tatua kon i datu bo noguman, “Intau tanaa in mustibí hukumon matoi. Sin pongin singognea natua sia in mokoinggamá kon ibog in bayongan tontara bo intau ibanea inta nogutunpa kon kotá tanaa. Sia in diábí motuḷung kon rayat, táe mopoboditobí kon i monia.”

YEREMIA 38:4 ပူးပေါင်းရင်းမြစ်များ

DATU MITA IMITÁNEA 21:20

Naonda in ki Ahab nokoontong kon i Elia, sia in noguman, “Ei musung, imbuitnea nouḻímudon in akuoi!” “Totuu,” tubag i Elia. “Sin ki Tuang in takin ḻimbatú in gina nogaid kon inta moraat kon tayowon i Tuhan,

TAWARIKH 2 24:21

Táe rayat in noyopopogdon momayow kon i Zakharia, bo ki Datu Yoas in dinumudui kon pinoyopopogan tatua. Diá bidon kinotoropannea in onu inta inaidan bo kotoindudui i Yoyada, ki amá i Zakharia. Pinodoyon kon parenta i datu, ki Zakharia in inandur in batu nodapot in minatoi kon bosí in Baḷoi Tuhan. Kon dodai in matoidon, ki Zakharia in nomaḷú, “Igumon mako indoian i Tuhan in aidmu tanaa bo motuḻí.”

EZRA 4:12

Poigumon mako komangaḻean i Tuang, kon intau in Yahudi inta ain nonaḷámai kon butá mita ibanea kon bonu in dodatuan i Tuang, tanaa in nogutundon notantú kon Yerusalem bo koyogot in noposindog bui in kotá inta moraat bo moibog momarontak tua. Mosia in nomangkoidon noposindog bui in dindingnea mita bo diádon moonggot bo moḷapat in oaidan tatua.

NEHEMIA 6:9

Mosia in moḷongasi mopogogondok kon inami sinbá gogaiandon nami in oaidan tatua. Akuoi in nosambayang, “Oo Allah, iropotai in akuoi!”

IḶUAIAN 5:4

Guman i datu kon i Musa bo kon i Harun, “Nongonu sin pogogaionbí monimu in intau mita tatua kon oaidan monia tua? Potabádon in ata mita tatua mogaid!

YEREMIA 11:21

Intau mita in kotá in Anatot moibog sinbá matoi in akuoi. Mosia in noguman, “Aka iko umuran mopotaau in koyow mita i Tuhan kon inami, iko in ḻimodonbí nami.”

YEREMIA 18:23

Táe iko, Tuhan, nonotaau kon bayongan inta sinomayá monia sin moḻimod kon inakó. Tuamai, dika mongampung kon i monia; dika momopat kon taḷá monia. Bongkugdon in mosia modapot in moḷabú. Aidaidon kon i monia podudui in torú-Mu.”

YEREMIA 26:11

Imang mita bo nabi mita in noguman kon pojabat mita tatua takin rayat, “Intau tanaa in patusbí hukumon matoi sin nosingogdon in sia kon tosingogon ponayow kon kotá naton naa. Moiko tontaní ain nokodongog kon tua.”

YEREMIA 29:7

Pogaidon sinbá motompia in kotá mita inta pinoḷumbúan-Ku kon i monimu. Posambayangdon kon i-Nakó sin kopontingan in kotá mita tatua, sin aka kotá mita tatua mobiag mooyúon, yo moiko in mobiagbí doman mooyúon.

YEREMIA 38:16

Ki Datu Zedekia inumuni-uni mako nodandi kon inakó, kainia, “Pinodoyon kon i Allah inta nobiag, ki Allah inta nobogoi in kobiagan kon i naton, akuoi in mongibot kon akuoi in diábí moḻimod kon inimu andeka mobogoi kon inimu kon intau mita inta moibog moḻimod kon inimu.”

YEREMIA 38:25

Aka pojabat mita mokodongog kon akuoi in noyosingogmudon, yo mosia in mamangoibí bo moḻibó kon inimu kon onu inta inouman naton. Mosia in modandi kon diábí moḻimod kon inimu, aka oumanonmu komintan kon i monia.

YEREMIA 43:3

Ki Barukhbí ki adí i Neria tua in nondodak kon inimu kon monayow kon inami, sinbá kami kawasaan in intau in Babel bo mokoḻimod andeka mogakut kon inami pobayá in Babel.”

YEHEZKIEL 22:27

Pojabat mita in pomarentanea naonda bo serigala inta noyingki-yingkit kon kokaanonnea. Mosia in moḻimod tongábí makusud motayak kon kauntungan.

AMOS 7:10

Ki Amazia, imang kon Betel, nokidia in lapuran tanaa kon i Yerobeam datu in Israel, “Ki Amos in koyogot noyopakat in rayat monayow kon i Tuang datu. Tosingogonnea mita inta monundud kon patú in rayat in mokopopisí kon butá tanaa in morimumud.

LUKAS 23:2

Kon tua in mosia mulaidon bo moponapud in tosingogon diá totuu kon i-Nia. Mosia in noguman, “Kinokadapatandon nami intau tanaa in notundú kon diá totuu kon intau moantó. Bo bayongan intau in daiton-Nea pongaruon sinbá doí moguboḻi kon pajak kon i Kaisar, sin kai-Nia Sia in tobatú Datu Mopoposaḷamat.”

OUMAN IN RASUL MITA 16:20

Mosia in dinia monia pinotayow kon pomarenta in Rum bo noguman, “Taya dua naa intau in Yahudi. Mosia in umuran mongacau kon kotá naton.

OUMAN IN RASUL MITA 17:6

Táe diá nouḻí monia in taya dua, dá ki Yasondon takin in tongonumai intau mopirisaya ibanea in dinia monia kon tayowon intau mita moḷoben kon kotá tatua. Bo totokdon in nomaḷú nanaa: “Intau mita tanaa in mongongacau kon bayongan tampat! Mosia in namangoi doman in kotá naton naa,

OUMAN IN RASUL MITA 24:5

Aindon kinokadapatan nami kon intau tanaa mongongacaubí inta mokobahaya. Sin kon ondakabí in bayáannea, sia in umuran mokopomuká kon ropatoi kon sigad in intau Yahudi. Sia naa in nobaḻídon itoi intau in Nazaret.

OUMAN IN RASUL MITA 28:22

Táe kami in moibogbí doman mokidongog nongkon inimu tontaní kon onu inta pinirisaya bo sinundúmu tua sin ain dinongog nami komintan, kon bayongan inta sinundúmu bo inta pinirisayamu nion tatapbí bayowan monia kon ondakabí in bayáanmu.”