YEREMIA 3:18 - Alkitab Singog In Mongondow Masa In Tanaa

¹⁸ Israel in dumugangdon kon Yohuda, bo moyotakindon mamangoi nongkon butá pinoḷumbúan kon dotá in utuan. Mosia in mobuidon kon butá inta ain inogoi-Ku nobaḻí butá kapunyaan kon mogoguyangmu.”

YEREMIA 3:18 ပူးပေါင်းရင်းမြစ်များ

KINOBAḺIAN 12:7

Ki Tuhan nokipogontong kon i Abram bo noguman kon inia, “Tanaa in butá inta ogoi-Ku kon buímu.” Bo ki Abram noposindog in tobatú mezbah kon tua sin posumbaan kon i Tuhan inta ain nokipogontong kon inia.

YESAYA 43:5

Dika moondok, sin Akuoi in moḷukad kon inimu. Nongkon toyopan bo nongkon dotá in pomukaan pinotabá-Ku in ki adí bo ki ompumu mamangoi moyosipun.

YESAYA 43:6

Pinarenta-Ku kon i utuan bo kon i toḷatan, sinbá mosia in ḷagidon buḻian. Bá ki adímu mita ḷoḷaki in mobuidon nongkon moyayú, bo ki adímu mita bobay in mobui nongkon popod mita in dunia.

YEREMIA 16:15

táe podoyon bidon kon i-Nakó, Allah inta nobiag, inta nodia kon umat in Israel iḻumuai nongkon butá tobatú kon utuan bo nongkon bayongan in butá ibanea inta pinoporaritan-Ku kon i monia. Mosia in diaan-Kubí mobui kon butá monia, butá inta ain inogoi-Ku kon mogoguyang monia.”

YEREMIA 23:8

táe podoyon kon i-Nakó, Allah inta nobiag, inta nodia kon umat in Israel iḻumuai nongkon butá tobatú kon dotá in utuan, bo nongkon bayongan in butá ibanea kon tampat inta ain pinoporaritan-Ku. Mosia in mogutundon kon butánea tontaní.”

YEREMIA 3:12

Ki Tuhan in nopotabá kon inakó mayá sin mopotaau in naa kon Israel: “Ei Israel inta diá mosatia, pobuidon mangoi kon i-Nakó! Akuoi in totokbí in motabi bo diábí mononoi in torú-Ku kon i monimu.

YEREMIA 30:3

Sin moiangoibí in wakutunea Akuoi mopoguḻit bui in kaadaan in umat-Ku Israel bo Yohuda. Diaan-Kubí bui in mosia mayá in butá inta ain inogoi-Ku kon mogoguyang monia. Butá tatua in buibí mouḻí monia. Akuoi, ki Tuhan, ain nosingog.”

YEREMIA 31:8

Nongkon utuan dinia-Ku in mosia nobui; sinipun-Ku in mosia nongkon popod mita in butá. Intau bilog bo intau ḻempeng in moyotakinbí monia, bobay doman inta bagu nononggadí bo bobay inta dongkadon mogoḷat kon wakutu mononggadí. Mosia komintan in mamangoi mobayongbí totok in mamangoi in butá tanaa.

YEREMIA 50:20

Kon tungkuḷ intua Israel bo Yohuda in modarit bidon nongkon dosa, sin ampungan-Kubí in intau mita inta ain pinosaḷamat-Ku. Akuoi, ki Tuhan, ain nosingog.”

YEREMIA 50:4

Ki Tuhan in noguman, “Kon tungkuḷ intua intau in Israel bo Yohuda in mamangoi bo moyotakin mongombaḷ, motayak kon i-Nakó, ki Allah monia.

YEREMIA 50:5

Mosia in moḻibóbí kon daḷan mopobayá in Sion, bodongka mayá ná tua. Mosia in mogaidbí kon dodandian mononoi takin-Ku, bo umuranbí kumadai.

YEREMIA 7:7

Aka moiko momaḷui kon kobobiagmu bo dodiamu poḷat mogogai in mogaid kon bayongan intua, yo moiko in ogoi-Kubí mogutun motantú kon butá tanaa inta ain inogoi-Ku nobaḻí butá in mogoguyangmu.

YEHEZKIEL 11:17

Akuoi, ki Tuhan Inta Totok in moḷantud, nogumandon kon sipunon-Kubí in mosia nongkon butá mita kon tampat inta kinoraritan monia, bo mopobui in butá in Israel kon i monia.

HOSEA 1:11

Bangusa in Yohuda bo bangusa in Israel in tobatúonbí bui. Mosia in moduíbí kon itoi tobatú, bo mosia in modugangbí bo motomoman bui kon butá monia. Totuu, singgai i Yizréel in mobaḻíbí singgai inta moḷoben!

HOSEA 2:2

Ki Tuhan in noguman, “Ei adí-Ku mita, ki inámu in deeman bidon ki buḷoi-Ku, bo Akuoi in deemanbí ki buḷoinea. Tuamai, pelekaradon in sia sinbá sia in dika monuaḻing bo dikadon sumundaḷ bui.

AMOS 9:15

Popoutun-Kubí in umat-Ku kon butá inta ain inogoi-Ku kon i monia. Mosia in diá bidon rabuton nongkon tua. Akuoi ki Tuhan Allah monia ain nosingog.”

ZAKHARIA 10:6

“Intau in Yohuda in iropotan-Kubí, umat in Israel in posaḷamaton-Ku. Diaan-Ku in mosia mobui mangoi kon butánea popisí in Akuoi motabi kon i monia. Popoaid-Kubí kon i monia naonda bo bangusa inta diá kon dodai in onda in iḻiong-Ku. Akuoibí in ki Tuhan Allah monia, bayongan in sambayangnea in indongogan-Kubí bui.

ZAKHARIA 2:6

Ki Tuhan in noguman kon umat-Nea, “Akuoi in noporaritdon magí-mako kon i monimu kon bayongan in tampat. Táe tanaa intau mita inta sinokoḷumbú in poḷaguidon nongkon Babel bo pobuidon mangoi kon Yerusalem.