YEREMIA 27:9 - Alkitab Singog In Mongondow Masa In Tanaa

⁹ Dikadon mokidongog kon nabi mita andeka ki ineka doman inta mongampag kon i monimu mokiompu kon i datu in Babel, umpaka in mosia ain nongaku kon notarimadon kon topotundú nongkon togoindop, dimukud mita, andeka nopomaké in totaau mita.

YEREMIA 27:9 ပူးပေါင်းရင်းမြစ်များ

IḶUAIAN 22:18

Bayongan bobay inta mongonggaing musti ḻimodon.

IḶUAIAN 7:11

Tuamai ki datu in nogoiní doman kon intaunea mita inta mototaau bo inta mososihir, bo mosia in nogaid doman kon ná tua pinongin totaau monia tatua.

AMSAL 19:27

Adíku, aka iko doídon mobalajar bui, yo koḻionganmudon onu inta ain binalajarmu.

YESAYA 8:19

Táe intau mita in mopotabábí kon i monimu mopoigum in topotundú nongkon mongongundam mita inta gumombong bo inta mongumi-ngumit. Intau mita tatua in mogumanbí, “Patus aka degá in kita mopoigum in topotundú kon dimukud mita popisí in inta nobiagpa?”

YEREMIA 14:14

Táe ki Tuhan in notubag, “Nabi mita tatua in nopotaau in habar uboḷ pinodoyon kon tangoi-Ku; Akuoi in diábí nopotabá kon i monia, bo diábí doman nomarenta andeka noyosingog monia. Oontongon mita inta inouman monia in deemanbí nongkon i-Nakó; mosia in nonoḻindap kon soaḷ mita inta diá in mangaḻenea inta sinontuon inaidan monia tontaní.

YEREMIA 23:16

Kon intau inta nogutun kon Yerusalem, ki Tuhan Inta Totok in mokawasa noguman, “Dika indongogan in tosingogon in nabi mita inta umuran tongá mobogoi in kamang inta diá in mangaḻenea. Mosia in tongábí mopotaau in onu in inta kon raian monia tontaní bo deemanbí koyow-Ku.

YEREMIA 23:25

Bayongan inta siningog in nabi mita tatua in kinotaauan-Ku bidon. Pinodoyon kon tangoi-Ku mosia in nonguboḷ kon koyow-Ku in sinarimadon monia pinongin togoindop.

YEREMIA 23:32

Akuoi, ki Tuhan, in moḷawangbí kon nabi mita tatua inta nopotaau in togoindopnea mita inta nopuḻing in uboḷ. Mosia in nopoḷangkam in umat-Ku pinodoyon kon uboḷ bo ambungangaḷ monia. Akuoi in diábí nopotabá kon nabi mita tatua. Mosia in beresibí diá baraguna kon umat-Ku. Akuoi, Tuhan, ain nosingog.”

YEREMIA 29:8

Akuoi ki Tuhan, Inta Totok in mokawasa, Allah in Israel, mopotoingat kon i monimu sinbá diá mopomayá mako in awakmu koakaḷan in nabi mita inta nogutun kon yuakmu andeka i inekadon inta noguman kon mosia in mokotoḷanow kon singgai moiduduimai. Dika moindoimai kon togoindop mita monia.

YEHEZKIEL 21:29

Oontongon inta inontong monimu in diábí totuu oontongon, bo toḻindap inta siningog monimu in diá doman totuu bo uboḷ. Moiko in moraat bo binaradosa, bo wakutu pohukuman kon inimu pangabisan in nodiugdon. Kedang tatua in momongkóbí kon sigogowmu.

DANIEL 4:7

Táe naonda in mononoḻindap, mototaau bo intau mita inta mobayong in sinotaau bo intau mita inta nonotaau in bobayá in tundi namangoi bo inoumanku in togoindopku tatua kon i monia, yo diábí tobatúmai in intau in nokopoguman kon mangaḻenea.

MIKHA 3:7

Intau mita inta monoḻindap kon singgai moiduduimai in mooyábí popisí in toḻindapnea tatua in diá moitugat. Mosia komintan in mooyá bidon sin ki Allah in diábí motubag kon i monia.

ZAKHARIA 10:2

Intau mita mopoigum in topotundú kon berhala mita bo mononoḻindap mita, táe tubag mita inta nouḻí monia in uboḷ bo tongábí kon bibig. Oyúon in noginsilang kon togoindop, táe insilang monia in tongábí mokopoḷaḻe kon i monimu, bo ḷoḻipoi inta inogoinea diá in mangaḻenea. Tuamai in rayat noirangkapdon magí-mako naonda bo domba. Moajar monia sin diá in itoi.

MALEAKHI 3:5

Guman i Tuhan Inta Totok in mokawasa, “Akuoi in mamangoibí kon inimu sin mohakim. Akuoi in ḷagidon mobaḻí sakusi kon mososihir mita, kon intau mita inta mototuaḻingan, inta noguman kon uboḷ, inta notombogá kon dodai in nobogoi in gaji kon intau inta sinondanan, inta nondorot kon intau boba-bobay, uno-unon, bo intau ango-angoi, bo kon intau mita inta diá mohoromat kon i-Nakó.”

OUMAN IN RASUL MITA 8:11

Noonggotdon totok sia in momakémai in sihirnea, dá mopia totok gina in bayongan intau kon inia.

EPESUS 5:6

Donaai in moiko koakaḷan in singog mita inta diá in baragunanea. Sin soaḷbí mita natua inta mokopomuká kon sakí in gina i Allah kon intau mita inta diá motoindudui kon i-Nia.

ULANGAN 13:2

takin makusud sinbá moiko mosumba bo mogundoi kon ilah mita inta diá dodai onda in kinotaauan monimu, umpakabí onu inta pinodandinea tatua totu-totuu kon nobaḻí,

ULANGAN 18:14

Onda intua ki Musa noguman, “Bangusa mita kon butá inta bain ḻitúan monimu tua in dinumudui kon tonggina in mononanow mita bo motayak kon tanda mita. Táe ki Tuhan Allahmu in diábí mobogoi kon i monimu mogaid kon natua.

YOSUA 13:22

Kon sigad in intau mita inta iḻimod in bangusa israel oyúon doman in ki Bileam ki adí i Beor, ki moindoi kon onu inta mobaḻí kon singgai moiduduimai.

WAHYU 18:23

Intau mita in diá bidon mokoontong kon bayag in togá kon kotámu; bo diábí domandon kodongogan in poramean ponikaan kon tua. Podagangmu mita tua in intaubí mita moḷoben kon dunia naa, bo totaau pongonggaingmu tua in pinonguboḷmu kon bayongan in intau kon dunia naa!”

WAHYU 21:8

Táe intau mita inta ondokon, mosia inta diá mosatia, intau moromú, moḷoḻimod, intau mokotor, intau mongonggaing, mososumba kon berhala bo komintan intau mouboḷ, toko pogambat kon bonu in dagat tuḷú bo balerang inta kodoko-dokot, tuata in popatoi inta induanea.”

WAHYU 22:15

Táe intau mita inta nogaid kon soaḷ mita inta moromú, inta moibog monggaing, bo intau mita inta mogaid kon soaḷ mita inta mokotor, inta moḻimod, mosumba kon berhala, bo intau mita inta mouboḷ, pinomayá tosingogon ande oaid, komintan intau natua, kon ḷuai in kotá in tampatnea.

WAHYU 9:21

Mosia in diápa doman mogogai in moḻimod, monggaing, mogaid kon inta diá patus aidan bo monakow.